حب منبوذ

٢٦

ﺭﻳﻢ ﺑﺘﻜﻤﻞ ﺍﻻﺣﺪﺍﺙ ﻭ ﻫﻲ ﺑﺘﻘﻮﻝ :
ﺍﻧﺎ ﻣﺮﻛﺰﺓ ﺷﺪﻳﺪ ﻣﻊ ﺍﻟﻌﻘﻮﺩﺍﺕ ﻭﺑﺮﺍﺟﻊ ﻓﻴﻬﻢ ﻭ ﻡ ﻛﻨﺖ ﻋﺎﺭﻓﻪ ﺍﻧﺎ ﺑﻘﻮﻝ ﻓﻲ ﺷﻨﻮ ! ﻟﻤﻦ ﺭﻓﻌﺖ ﺭﺍﺳﻲ ! ﻭ ﺍﻧﺎ ﺑﻘﻮﻝ ﻟﻲ ﻓﺎﻃﻤﺔ : ﻛﺪﺍ ﻓﻀﻞ ﺑﺲ ﻧﺤﺪﺩ ﻣﻮﺍﻋﻴﺪ ﻟﻼﺟﺘﻤﺎﺍﺍ .. ﺍﺍﻉ ‏( ﻻﺣﻈﺖ ﻟﻲ ﻋﻴﻮﻧﻬﺎ ﺍﻟﺒﻘﺖ ﺣﻤﺮﺍ ﻭ ﺍﻟﺪﻣﻮﻉ ﺍﻟﻠﻲ ﻛﺎﻧﺖ ﻣﺪﺳﻮﺳﻪ ! ﻭ ﻫﻲ ﺣﺎﺟﺰﺍﻫﺎ ﺑﻲ ﻳﺪﻫﺎ ‏) !! ﺍﺗﻠﻔﺖ ﻋﺎﻳﻨﺖ ﻟﻘﻴﺖ ﺍﻣﻲ ﻭ ﺭﺯﺍﻥ ﻭ ﻭﻟﻴﺪ ﺑﻴﻬﻈﺮﻭ
ﻭﺑﻴﺘﻮﻧﺴﻮ ! ﻣﺎ ﻋﺮﻓﺘﻪ ﺍﻋﻤﻞ ﺷﻨﻮ ! ﺍﺗﻮﺗﺮﺗﺎ ﻟﻤﻦ ﻟﻘﻴﺘﺎ ﻛﺪﺍ ! ﻭ ﻫﻲ ﻃﻮﺍﻟﻲ ﻗﺎﻣﺖ ﻋﻠﻰ ﺣﻴﻠﻬﺎ ﻭ ﻫﻲ ﺑﺘﻘﻮﻝ ﻟﻲ : ﺧﻠﺼﺘﻲ ﺻﺢ ‏( ﻣﺪﺕ ﻟﻲ ﻳﺪﻫﺎ ‏) !!
ﻗﻠﺖ ﻟﻴﻬﺎ : ﺍﻳﻮﺓ ﺧﻠﺼﺘﻪ ! ﺍﺍﺍﺍﺍ ﺍﻣﻢ ﺍﺍﺍ ﻃﻴﺐ ! ﺗﻌﺎﻟﻲ ﺣﺄﻗﺪﻣﻚ ﻟﺤﺪ ﺑﺮﺍﺍﺍ ‏( ﻭ ﻃﻮﺍﻟﻲ ﻣﺸﻴﺖ ﻣﺎ ﺍﻧﺘﻈﺮﺕ ﻟﻤﻦ ﺗﺮﺩ ‏) ﻗﺎﻟﺖ ﻟﻲ ﻧﺎﺱ ﺍﻣﻲ ﺳﻼﻡ ! ﻭ ﻫﻲ ﻣﺪﻧﻘﺮﺓ !!
ﻟﻤﻦ ﺑﻘﻴﻨﺎ ﺑﺮﺍ ﺍﻟﺒﻴﺖ ! ﻣﺴﻜﺘﻬﺎﺍ ﻣﻦ ﻳﺪﻫﺎ ﻗﻠﺖ ﻟﻴﻬﺎ :
** ﻓﻲ ﺷﻨﻮ ؟
__ ﺷﻨﻮﻭﻭﻭ !!
** ﻋﺎﻳﻨﻲ ﻋﻴﻮﻧﻚ ! ﺍﻧﺎ ﻛﻨﺖ ﻣﺮﻛﺰﺓ ﻣﻊ ﺍﻻﻭﺭﺍﻕ ! ﻓﻲ ﺯﻭﻝ ﺟﺮﺣﻚ ﺍﻭ ﺯﻋﻠﻚ ﺑﻲ ﻛﻠﻤﺔ ؟
__ ﻻﻻ ﺍﺑﺪﺍً ﻳﺎ ﺍﺳﺘﺎﺫﻩ ! ﻳﻼ ﺍﻧﺎ ﺑﻤﺸﻲ !!
** ﻻﻻ ﻣﺎ ﺣﺘﻤﺸﻲ ! ﺍﻧﺎ ﻡ ﻋﻨﺪﻱ ﺯﻭﻝ ﻳﺪﺧﻞ ﺑﻴﺘﻲ ﻭ ﻳﻄﻠﻊ ﻣﻨﻪ ﻭﻫﻮ ﺑﺎﻛﻲ ﻳﺎ ﻓﺎﻃﻤﺔ ، ﻭ ﻳﻌﻠﻢ ﺍﻟﻠﻪ ﺍﻧﻚ ﻋﺰﻳﺰﺓ ﻋﻠﻰ ﺭﻭﺣﻲ ﻭ ﻗﺮﻳﺒﻪ ﻣﻦ ﻗﻠﺒﻲ ! ﺍﺗﻜﻠﻤﻲ ﺣﺎﺻﻞ ﺷﻨﻮ ؟
__ ‏( ﺑﻲ ﺍﺑﺘﺴﺎﻣﺔ ﻣﺼﻄﻨﻌﻪ ‏) ﺍﻧﺎ ﻛﻮﻳﺴﻪ ﺑﺲ ﻟﻤﺘﻜﻢ ﺫﻛﺮﺗﻨﻲ ﺑﻲ ﺍﺑﻮﻱ ﺍﻟﻠﻪ ﻳﺮﺣﻤﻮ !
** ﺍﺗﺬﻛﺮﺗﻴﻬﻮ ﻛﻴﻒ ﻭﺍﺑﻮﻱ ﻣﺎﻓﻲ !
__ ﻋﺸﺎﻥ ﻣﺎﻓﻲ ﺍﻧﺎ ﺍﺗﺬﻛﺮﺗﻮ ! ﻛﻨﺎ ﺑﺘﻘﻌﺪ ﻓﻲ ﺻﻴﻨﻴﺔ ﺍﻻﻛﻞ ﻧﺎﻗﺼﻴﻦ ﻛﺪﺍﺍ !
** ﻃﻴﺐ ﻣﺎ ﺣﺄﺿﻐﻂ ﻋﻠﻴﻜﻲ ﻳﺎ ﻓﺎﻃﻤﺔ ! ﺍﺫﺍ ﺍﺣﺘﺠﺘﻮ ﺣﺎﺟﺔ ﺍﻧﺘﻲ ﻭﺍﻟﺒﻨﺎﺕ ﻛﻠﻤﻴﻨﻲ !
__ ﻃﻴﺐ ﻃﻴﺐ !! ﺷﻜﺮﺍً ﺍﺳﺘﺎﺫﻩ !
ﻭ ﻓﺎﻃﻤﺔ ﺑﺘﻘﻮﻝ ﻛﻨﺖ ﻣﻨﺘﻈﺮﺓ ﺍﻟﻠﺤﻈﺔ ﺍﻟﻠﻲ ﺍﻛﻮﻥ ﻓﻴﻬﺎ ﺑﺮﺍﻱ ﺑﺮﺍﻱ ﻋﺸﺎﻥ ﺍﻃﻠﻊ ﺍﻟﻐﺒﻨﺔ ﺍﻟﻮﺍﻗﻔﺔ ﻟﻲ ﻓﻲ ﺻﺪﺭﻱ ﺯﻱ ﺍﻟﺠﺒﻞ ! ﻭ ﻣﻦ ﺭﻛﺒﺘﻪ ﺍﻟﻌﺮﺑﻴﻪ ! ﺍﻧﻔﺠﺮﺕ ﺑﺎﻟﺒﻜﻰ ﺯﻱ ﺍﻟﺸﺎﻓﻌﻪ ! ﻗﻠﺘﻪ : ﺍﻧﺎ ﻟﺴﻪ ﻣﺎ ﻋﻤﻠﺖ ﺣﺎﺟﺔ ﻋﺸﺎﻧﻮ ﻟﺴﻪ ﻣﺎ ﻋﺒﺮﺗﻪ ﻋﻦ ﺣﺒﻲ ﻟﺴﻪ ﻣﺎ ﺳﻮﻳﺖ ﺣﺎﺟﺔ ﺍﺭﻳﺢ ﺑﻴﻬﺎ ﻧﻔﺴﻲ ﻋﺸﺎﻥ ﻟﻮ ﺍﻟﻌﻼﻗﻪ ﻣﺎ ﻧﺠﺤﺖ ﻛﺎﻥ ﺍﺗﺠﺎﻭﺯ ﺑﻴﻬﺎ ! ﻟﺴﻪ ﻣﺎ ﺑﺪﻳﺖ ! ﻟﺴﺔ ﻣﺴﻜﺖ ﺩﺭﺏ ﺭﻳﺪﻭ !! ﺍﺳﻲ ﺍﻧﺎ ﻛﻴﻒ ﺍﺗﺨﻄﺎﻫﻮ ﻛﻴﻒ ! ﺍﻭﺩﻱ ﺣﺒﻲ ﺩﺍ ﻭﻳﻦ ﻳﺎ ﺍﻟﻠﻪ .. ﻳﺎﻟﻠﻪ ﻭﺍﻟﻠﻪ ﺍﻟﻤﻮﻗﻒ ﺩﺍ ﺣﺎﺭ ﻳﺎ ﺍﻟﻠﻪ ﺍﻧﺎ ﻋﺎﺭﻓﻪ ﺍﻧﻪ ﺍﺧﺘﺒﺎﺭ ﻟﻲ ﻭﺑﺘﺨﺘﺒﺮ ﺻﺒﺮﻱ ﺑﺲ ﻭﺍﻟﻠﻪ ﺣﺎﺭ ! ﺣﺎﺭ ﺷﺪﻳﺪ ﻋﻠﻲ ! ﻳﺎ ﺍﻟﻠﻪ ﺍﺩﻳﻨﻲ ﻗﺪﺭﺓ ﺍﻟﺘﺨﻄﻲ ﻭﺍﻟﺘﺠﺎﻭﺯ ﻭﺍﻟﻠﻪ ﻗﻠﺒﻲ ﺣﺎﺭﻗﻨﻲ ﻭﺍﻧﺖ ﻋﺎﺭﻑ ﻳﺎ ﺭﺑﻲ .... ﺍﺍﺍﺥ ﻳﺎ ﺭﺑﻲ ﺍﺳﺘﻐﻔﺮ ﺍﻟﻠﻪ ﺍﺳﺘﻐﻔﺮ ﺍﻟﻠﻪ ....
ﻟﻤﻦ ﺭﻓﻌﺖ ﺭﺍﺳﻲ ! ﻳﺎﺩﻭﺏ ﺍﻧﺘﺒﻬﺖ ﻟﻲ ﻋﻢ ﺍﺑﺮﺍﻫﻴﻢ ﻭ ﻋﺎﻳﻨﺖ ﻟﻘﻴﺖ ﺍﻧﻪ ﺍﻧﺤﻨﺎ ﺍﺻﻼً ﻣﺎ ﺍﺗﺤﺮﻛﻨﺎ ﻣﻦ ﻣﺤﻠﻨﺎ ﻭ ﺍﻥ ﺍﺳﺘﺎﺫﺓ ﺭﻳﻢ ﻛﺎﻧﺖ ﺷﺎﻳﻔﺎﻧﻲ ﻃﻮﻝ ﺍﻟﻮﻗﺖ ﺩﺍ !!!
ﻃﻮﺍﻟﻲ ﻗﻠﺖ ﻟﻲ ﻋﻢ ﺍﺑﺮﺍﻫﻴﻢ ﺍﻣﺸﻲ ﻋﻠﻴﻚ ﺍﻟﻠﻪ ﺑﺴﺮﻋﻪ ﺑﺴﺮﻋﻪ .... ﻗﺎﻝ ﻟﻲ : ﺭﺑﻨﺎ ﻳﺠﻌﻞ ﺍﻟﺴﻜﻴﻨﺔ ﻓﻲ ﻗﻠﺒﻚ ، ﺍﻳﺎً ﻛﺎﻥ ﺍﻟﺤﺎﻝ ﻣﻌﺎﻙ ﻳﺎ ﺑﺘﻲ ﺍﺗﺬﻛﺮﻱ " ﺇﻻ ﺑـﺬﻛﺮ ﺍﻟﻠﻪ ﺗﻄﻤﺌﻦ ﺍﻟﻘﻠﻮﺏ " ﻗﻠﺖ ﻟﻴﻬﻮ : ﺍﻟﺤﻤﺪﻟﻠﻪ ..
*ﺭﻳﻢ ﺑﺘﻘﻮﻝ :*
ﺍﻟﺸﻲ ﺍﻟﺤﺼﻞ ﺩﺍ ﻏﺮﻳﺐ ﺷﺪﻳﺪ !! ﻡ ﻛﻨﺖ ﻗﺎﺩﺭﺓ ﺍﺭﺑﻂ ﺍﻻﺣﺪﺍﺙ ﻋﺸﺎﻥ ﺍﻭﺻﻞ ﻟﻨﻘﻄﺔ ﺗﻮﺿﺢ ﻟﻲ ﺍﻟﻤﻮﻗﻒ ﺍﻟﻠﻲ ﺣﺼﻞ ﺩﺍ ! ‏( ﺍﻧﺎ ﻛﻨﺖ ﺟﻤﺐ ﺑﺎﺑﻨﺎ ﻭ ﺍﻟﻌﺮﺑﻴﻪ ﺍﻟﻠﻲ ﻓﻴﻬﺎ ﻓﺎﻃﻤﺔ ﻋﻠﻰ ﻣﺴﺎﻓﺔ ﻣﻨﻲ ، ﻓﺎ ﻣﺎ ﻛﻨﺖ ﺳﺎﻣﻌﻪ ﻫﻲ ﺑﺘﻘﻮﻝ ﻓﻲ ﺷﻨﻮ ، ﻋﺸﺎﻥ ﻛﺪﺍ ﻛﻨﺖ ﺑﺤﺎﻭﻝ ﺍﻓﻬﻢ ﺑﻄﺮﻳﻘﺘﻲ ‏) ! ﺍﻟﻤﻬﻢ ، ﺩﺧﻠﺖ ﺍﻟﺒﻴﺖ ، ﻛﻤﻠﺖ ﻓﻄﻮﺭﻱ ﻣﻌﺎﻫﻢ ! ﻭ ﻗﻠﺖ ﻟﻲ ﻭﻟﻴﺪ : ﻣﻔﺮﻭﺽ ﻧﻤﺸﻲ ﺍﻟﺴﻮﻕ ﺑﻌﺪ ﻛﺪﺍ ﻋﺸﺎﻥ ﻟﺤﺪ ﻣﺎ ﻧﺮﺟﻊ ﻣﺎ ﺣﻴﻜﻮﻥ ﻓﻲ ﺯﻣﻦ !!
ﻗﺎﻟﻲ : ﻣﺤﺘﺎﺟﻴﻦ ﺷﻨﻮ ﻏﻴﺮ ﺣﻠﻮﻳﺎﺕ ؟
ﺍﻣﻲ : ﺣﻠﻮﻳﺎﺕ ﺷﻨﻮ !! ﺟﻴﺒﻮ ﺟﺎﺗﻮﻩ ﻛﺪﺍ ﺩﺳﺘﺘﻴﻦ ﻣﺜﻼً ﻭ ﻫﺪﻳﺔ ﺑﺴﻴﻄﻪ ﻛﺪﺍ ﻟﻠﺒﻨﺖ ﻭﻻ ﺷﻨﻮ ؟
ﻗﻠﺖ ﻟﻴﻬﺎ : ﻡ ﺍﻇﻦ ﺑﺠﻴﺒﻮ ﻫﺪﺍﻳﺎ ﺍﺳﻲ ﻋﺸﺎﻥ ﺗﻌﺎﺭﻑ ﻣﻤﻜﻦ ﻟﻘﺪﺍﻡ ﻭﻻ ﺷﻨﻮ ﻳﺎ ﻭﻟﻴﺪ ؟
ﺍﻣﻲ : ﻭﻟﻴﺪ ﺑﻴﻌﺮﻑ ﺍﻟﺒﺖ ﺻﺢ ؟ ﻳﺒﻘﻰ ﺍﻟﻬﺪﻳﺔ ﺩﻱ ﻣﻦ ﻭﻟﻴﺪ ﻟﻴﻬﺎ ﺩﺍ ﺭﺍﻱ ﻛﺪﺍ ﻏﺎﻳﺘﻮ !
ﻗﻠﺖ ﻟﻴﻬﻮ : ﺍﺳﻤﻊ ﻛﺪﻱ ﺍﻟﻠﺒﺲ ﻟﻲ ﻋﺒﺎﻳﺔ ﻭ ﺍﺟﻲ ﺑﻌﺪ ﻧﻤﺸﻲ ﺑﻨﻘﺮﺭ .. ﻳﻼ !
ﺑﻌﺪ ﻣﺸﻴﺖ ﻟﺒﺴﺖ ﻋﺒﺎﻳﺘﻲ ﻭ ﺟﻴﺖ ! ﺭﻛﺒﻨﺎ ﻋﺮﺑﻴﺘﻲ ، ﻭ ﺍﺗﺤﺮﻛﻨﺎ .. ﻛﻨﺎ ﺑﻨﺘﻨﺎﻗﺶ ﻣﺪﺓ ﻋﻦ ﺍﺣﺴﻦ ﻣﺤﻞ ﻣﻤﻜﻦ ﻧﺸﻴﻞ ﻣﻨﻮ
ﻭﻓﺠﺎﺓ ﺗﻠﻔﻮﻧﻲ ﺭﻥّ ﻭ ﻛﺎﻥ ﻗﺎﻋﺪ ﻓﻲ ﺍﻻﺳﺘﺎﻧﺪ ﺣﻘﻮ ﻓﻲ ﺍﻟﻌﺮﺑﻴﻪ ! ﻓﺎ ﺗﻠﻘﺎﺋﻴﺎً ﻋﻴﻦ ﻭﻟﻴﺪ ﺑﻘﺖ ﻓﻲ ﺍﻟﺸﺎﺷﺔ ! ﻭ ﻛﺎﻥ ﺧﺎﻟﺪ ... ﺭﻓﻀﺖ ﺍﻟﻤﻜﺎﻟﻤﺔ ! ﺗﺎﻧﻲ ﺍﺗﺼﻞ ! ﻡ ﺭﺩﻳﺖ ﻭ ﺑﻌﺪﻫﺎ ﺭﺳﻞ ﻟﻲ ﺭﺳﺎﻟﺔ ﻡ ﻛﻨﺖ ﻗﺎﺩﺭﺓ ﺍﻓﺘﺤﻬﺎ ! ﻛﻞ ﺩﺍ ﻭ ﻭﻟﻴﺪ ﻣﺮﻛﺰ ! ﻗﻤﺘﻪ ﻭ ﻗﻔﺖ ﺍﻟﻌﺮﺑﻴﻪ
ﻭﻧﺰﻟﺘﻪ ﻗﻠﺖ ﻟﻲ ﻭﻟﻴﺪ ﺳﻮﻕ ﺍﻧﺖ ! ﻭ ﺍﺗﺒﺎﺩﻟﻨﺎ ﻭ ﻣﺴﻜﺖ ﺗﻠﻔﻮﻧﻲ ﻭ ﻓﺘﺤﺖ ﺍﻟﺮﺳﺎﻟﺔ : } ﻭ ﺍﻟﻤﺸﺘﺎﻕ ؟ {
ﺭﺩﻳﺖ ﻟﻴﻬﻮ : } ﻧﺸﺘﺎﻕ ﻟﻴﻬﻮ ﺑﺎﻟﺤﻴﻞ { ..... ﻭ ﺑﻘﻴﻨﺎ ﻧﺘﺮﺍﺳﻞ ﻃﻮﻝ ﻓﺘﺮﺓ ﺍﻟﻄﺮﻳﻖ ﺭﺍﻳﺢ ﺟﺎﻱ !! ﺍﺧﺮ ﺣﺎﺟﺔ ﻟﻤﺤﺘﻬﺎ ﻭ ﺍﻧﺤﻨﺎ ﺭﺍﺟﻌﻴﻦ ﻋﻠﻰ ﺍﻟﺒﻴﺖ ، ﻛﺎﻥ ﻣﺤﻞ ﻭﺭﺩ ، ﻭﻗﻔﺖ ﻭﻟﻴﺪ ﻭ ﻧﺰﻟﻨﺎ ﺟﺒﻨﺎ ﺑﻮﻛﻴﻪ ﻇﺮﻳﻒ ﻛﺪﺍ ﻭ ﺭﺟﻌﻨﺎ ﻋﻠﻰ ﺍﻟﺒﻴﺖ !!
*ﺧﺎﻟﺪ ﺑﻴﻘﻮﻝ :*
ﻛﻨﺖ ﻋﺎﺭﻑ ﺍﻥ ﻳﻮﻣﻲ ﺣﻴﻜﻮﻥ ﺳﻴﺊ ﺑﺲ ﻣﺎ ﻛﻨﺖ ﻣﺘﻮﻗﻊ ﺍﻧﻪ ﻳﻜﻮﻥ ﻟﻠﺪﺭﺟﺔ ﺩﻱ ! ﻭ ﻏﻴﺎﺏ ﺭﻳﻢ ﺣﻴﺄﺛﺮ ﻋﻠﻲ ! ﺭﻏﻢ ﺍﻥ ﻛﻞ ﺍﻟﻠﻲ ﺑﻴﻨﺎ ﻳﻮﻣﻴﻦ ﺍﺗﻐﺪﻳﻨﺎ ﻓﻴﻬﻢ !
ﻡ ﻛﻨﺖ ﻋﺎﺭﻑ ﺣﺄﺩﻣﻦ ﺷﻮﻓﺘﻬﺎ ﻭ ﺍﻟﻌﻘﺪﺓ ﺍﻟﻠﻲ ﺑﻴﻦ ﺣﻮﺍﺟﺒﻬﺎ ، ﺻﺮﺓ ﻭﺷﻬﺎ ﺍﻟﻠﻲ ﻛﻨﺖ ﺑﺸﻮﻓﻬﺎ ﻏﺮﻳﺒﻪ ﻭ ﺍﻟﻠﻴﻠﻪ ﻋﺸﻘﺘﻬﺎ ﻋﺸﺎﻥ ﺑﺘﺨﻠﻴﻨﻲ ﺍﺣﺲ ﺑﺎﻻﻧﺠﺎﺯ ﻟﻤﻦ ﺗﺒﺘﺴﻢ ﺍﻭ ﺗﻀﺤﻚ ﺑﻌﺪ ﺍﻟﺼﺮﺓ ﺩﻱ ! # ﺍﻟﻤﻬﻢ !
ﻡ ﻛﻨﺖ ﻣﺨﻄﻂ ﻟﻲ ﺍﻱ ﺣﺎﺟﺔ ﺑﺲ ﻓﺠﺄﺓ ﻟﻘﻴﺖ ﻧﻔﺴﻲ ﻗﺎﻋﺪ ﺟﻤﺐ ﺍﻣﻲ ﻭ ﺑﺤﻜﻲ ﻟﻴﻬﺎ ﻋﻦ ﺭﻳﻢ ! ﻛﻨﺖ ﺑﺤﻜﻲ ﻋﻨﻬﺎ ﺑﻲ ﺣﺐ ، ﻟﺪﺭﺟﺔ ﻣﺎ ﺣﺴﻴﺖ ﺑﻲ ﻭﺟﻮﺩ ﻧﻬﺎﺩ ﺍﺧﺘﻲ ﻭ ﻫﻲ ﻭﺍﻗﻔﺔ ﻭ ﺑﺘﺴﻤﻊ ﻓﻲ ﻛﻼﻣﻲ ﻋﻦ ﺭﻳﻢ ، ﻟﻤﻦ ﺟﺎﻧﻲ ﺻﻮﺕ ﻧﻬﺎﺩ ﻭ ﻫﻲ ﺑﺘﻘﻮﻝ ﻟﻲ :
__ ﻧﺴﻴﺖ ﺍﻡ ﻣُﺰﻥ ﺧﻼﺹ؟
ﺍﻣﻪ : ﻧﻬﺎﺍﺍﺍﺍﺍﺩ ! ﺍﻟﻤﺎﺕ ﺭﺍﺡ ﻟﻲ ﺭﺑﻮ ﻭ ﺍﻟﺤﻲ ﺍﺑﻘﻰ ﻣﻦ ﺍﻟﻤﻴﺖ ! ﻭ ﺍﻧﺤﻨﺎ ﻣﺎ ﺻﺪﻗﻨﺎ ﺍﺧﻮﻙ ﻃﻠﻊ ﻣﻦ ﺍﻟﺤﻔﺮﺓ ﺩﻱ !
** ﺍﻧﺎ ﺑﺘﻜﻠﻢ ﻣﻊ ﺍﻣﻲ ﻳﺎ ﻧﻬﺎﺩ ! ﻭ ﻣﺎ ﺻﺢ ﺗﻘﻴﻔﻲ ﻭﺗﺴﻤﻌﻲ ﻛﻼﻣﻨﺎ !
__ ﺍﻧﺎ ﻣﺎ ﻭﻗﻔﺘﻪ ﺍﺗﺴﻤﻌﺘﻪ ! ﺍﻧﺎ ﺟﻴﺖ ﻭ ﺍﻧﺖ ﺑﺘﺤﻜﻲ ﻭ ﺍﻟﺒﺎﺏ ﻓﺎﺗﺢ !
** ﺍﻗﻮﻟﻴﻜﻲ ﺣﺎﺟﺔ ! ﺍﻧﺎ ﻡ ﻋﻨﺪﻱ ﺣﺎﺟﺔ ﺍﺩﺳﻬﺎ ﻭ ﺍﺳﻤﻌﻲ ﺍﻟﺪﺍﻳﺮﺓ ﺗﺴﻤﻌﻴﻬﻮ ﻻﻧﻪ ﻣﺼﻴﺮﻙ ﺗﻌﺮﻓﻴﻬﻮ !
ﺍﻣﻲ : ﻋﻠﻴﻜﻢ ﺍﻟﻠﻪ ﺑﻄﻠﻮ ﻣﻨﺎﻗﺮﺓ ! ‏( ﺟﺎﺕ ﻧﻬﻠﺔ ﻏﺰﺕ ﻛﻮﻋﻬﺎ ﻓﻲ ﻧﺼﻬﺎ ﻭ ﻭﻗﻔﺖ ﺟﻤﺐ ﺍﻟﺒﺎﺏ ﺗﺴﻤﻊ ‏) !! ﺳﻮﻗﻲ ﺍﺧﺘﻚ ﻳﺎ ﻧﻬﺎﺩ
ﻭ ﺍﻃﻠﻌﻮ !
__ ﺍﻣﻤﻤﻢ ﻃﻴﺐ ﻳﺎ ﺍﻣﻲ !
ﻧﻬﻠﺔ : ﻓﻲ ﺷﻨﻮ ! ﺣﺎﺻﻞ ﺷﻨﻮ ! ﻟﻴﻪ ﻧﻄﻠﻊ ﺑﺮﺍ !!
__ ﺍﻃﻠﻌﻲ ﺍﻃﻠﻌﻲ ﺍﺧﻮﻙ ﺩﺍﻳﺮ ﻳﻌﺮﺱ ﺍﻟﻈﺎﻫﺮ !
ﻧﻬﻠﺔ : ﺍﺣﻠﻔﻔﻔﻲ !
__ ﺍﻃﻠﻌﻲ ‏( ﺟﺮﺗﻬﺎ ﻭ ﻃﻠﻌﻮ ﻭ ﺑﻘﻮ ﻭﺍﻗﻔﻴﻦ ﺟﻤﺐ ﺍﻟﺒﺎﺏ ﻳﺘﺴﻤﻌﻮ ‏)
ﺍﻣﻪ : ﻛﻤﻞ ! ﻳﺎ ﺧﺎﻟﺪ !
** ﺍﻟﺒﺖ ﺩﻱ ﻳﺎ ﺍﻣﻲ ﻇﺮﻭﻓﻬﺎ ﻣﺨﺘﻠﻔﺔ ! ﻭﻻﺯﻡ ﺍﻧﻮﺭﻙ ﻗﺒﻞ ﻧﺎﺣﺪ ﺍﻱ ﺧﻄﻮﺓ ﺗﺠﺎﻩ ﺍﻟﻤﻮﺿﻮﻉ !
ﺍﻣﻪ : ﻟﻴﻪ ؟
** ﺍﺍﺍﺥ ﻳﺎ ﺍﻣﻲ ﺑﺲ ! ﺍﻟﺒﺖ ﺩﻱ ﺭﺍﻳﺤﺔ ﻣﻦ ﺍﻫﻠﻬﺎ ﻣﻦ ﻋﻤﺮﻫﺎ ﻛﺎﻥ ﺧﻤﺴﺔ ﺳﻨﻮﺍﺕ ! ﻭ ﺍﻻﺳﺮﺓ ﺍﻟﺮﺑﺘﻬﺎ ﻳﺎﻫﻢ ﻫﺴﻲ ﻣﻌﺎﻫﺎ ﺑﺎﻗﻴﻦ ﻟﻴﻬﺎ ﺍﻫﻞ !
ﺍﻣﻪ : ﺷﻨﻮﻭ !!!! ‏( ﺑﻲ ﺻﻮﺕ ﻋﺎﻟﻲ ‏) ﻳﺎﻫﺎ ﺩﻱ ﺭﻳﻢ ﺍﻟﺸﺎﺑﻜﻨﻲ ﺑﻴﻬﺎ ﻟﻴﻚ ﺳﺎﻋﺘﻴﻦ ﺑﺘﺤﻜﻲ ﻟﻲ ﻋﻦ ﻭﺣﺪﺓ ﻣﻘﻄﻮﻋﺔ ﻣﻦ ﺷﺪﺭﺓ ﻣﺎ ﻣﻌﺮﻭﻑ ﻟﻴﻬﺎ ﻭﻟﻲ !!
** ﺍﻣﻲ ﺩﺍ ﻛﻼﻡ ﺷﻨﻮ ﺍﺳﺘﻐﻔﺮﻱ ﺭﺑﻚ ! ﺍﻟﺒﺖ ﺩﻱ ﻋﻨﺪﻫﺎ ﺍﺏ ﻭ ﻋﻨﺪﻫﺎ ﺍﺥ !! ﻛﻴﻒ ﻡ ﻣﻌﺮﻭﻑ ﻟﻴﻬﺎ ﻭﻟﻲ !!!
ﺍﻣﻪ : ﺍﺳﻤﻊ ﻫﻨﺎ ﻳﺎ ﺧﺎﻟﺪ ‏( ﺍﺧﻮﺍﺗﻮ ﻭﻗﻔﻮ ﻋﺪﻳﻞ ﻓﻲ ﺍﻟﺒﺎﺏ ﻳﺴﻤﻌﻮ ‏) ﺍﻧﺎ ﺑﻴﺘﻲ ﺩﺍ ﻣﺎ ﺑﺘﺪﺧﻞ ﻟﻲ ﻓﻴﻬﻮ ﻭﺣﺪﺓ ﻣﺎ ﻋﻨﺪﻫﺎ ﺍﻫﻞ ﺑﻌﺪ ﻣﺎ ﻛﻨﺖ ﻣﻌﺮﺱ ﺑﺖ ﺍﻻﺻﻮﻝ ﻭ ﺍﻟﺤﺴﺐ ﻭ ﺍﻟﻨﺴﺐ ﻭ ﺍﻻﺩﺏ ﻭﺍﻻﺧﻼﻕ ! ﺩﺍﻳﺮ ﺗﺠﻴﺐ ﻟﻲ ﺑﺖ ﻳﻤﻜﻦ ﺗﻜﻮﻥ ﺑﺖ ﺣﺮﺍﻡ ! ﺟﻨﻴﺖ ﺍﻧﺖ ؟؟؟
ﻧﻬﺎﺩ : ﻣﺸﺸﺸﺸﻴﻢ !! ﻣﺤﻦ !
ﻧﻬﻠﺔ : ﺍﺻﻼً ﺍﻟﺴﻤﺢ ﻣﺎ ﺑﻴﻜﻤﻞ ! ﻛﻤﺎﻥ ﻗﺎﻝ ﺳﻤﺎﺣﺔ ﻭ ﺟﻴﻬﻪ ﻭ ﻋﺮﺑﻴﺔ ﻭ ﺩﺍﻙ ﻳﺎ ﺍﻟﻜﻌﺐ ﺍﻟﻌﺎﻟﻲ ﻭ ﺩﺍﻙ ﻳﺎ ﺍﻟﻠﺒﺲ ﺍﻟﻤﺎ ﺧﻤﺞ ! ﻭﺩﺍﻙ ﻳﺎ ﺍﻟﺘﻠﻔﻮﻥ ﺍﻟﺒﺮﻗﺶ ، ﻭ ﺩﻳﻚ ﻳﺎ ﺍﻻﻛﺴﺴﻮﺍﺭﺍﺕ ، ﻫﻴﻴﻴﻴﻪ ﺳﻤﺎﺣﺔ ﺍﻟﺒﻨﺎﺕ ﻟﻲ ﺣﺪﻫﻦ ﻣﺸﺸﺸﻴﻢ ﻣﺨﻴﺮ ﺍﻟﻠﻪ !!
** ﻭﺍﻟﻠﻪ ﺍﺗﺨﻴﻠﺖ ﺍﻱ ﺣﺎﺟﺔ ! ﺍﻻ ﻛﻼﻣﻜﻢ ﺩﺍ ﻣﺎ ﺍﺗﺨﻴﻠﺘﻜﻢ ﺗﻜﻮﻧﻮ ﺑﺎﻟﺴﻄﺤﻴﺔ ﺩﻱ ﻭ ﺍﻟﻄﺮﻳﻘﺔ ﺩﻱ ! ﻭ ﺭﻳﻢ ﺍﻧﺎ ﻟﻮ ﺩﺍﻳﺮ ﺍﺗﺰﻭﺟﻬﺎ ! ﺣﺄﺗﺰﻭﺟﻬﺎ ﺳﻮﺍﺀ ﻭﺍﻓﻘﺘﻮ ﺍﻡ ﻻ !!
ﺍﻣﻪ : ﻧﻬﺎﺩ ﺣﺼﻠﻴﻨﻲ ﺑﻲ ﻛﺒﺎﻳﺔ ﻛﺮﻛﺪﻱ ! ﺣﺎﺳﺔ ﺿﻐﻄﻲ ﺩﺍ ﺣﻴﻄﻴﺮ ﺍﻟﺴﻤﺎﺀ ...
ﻭ ﺧﺎﻟﺪ ﻃﻠﻊ .....
*ﺍﻣﺎ ﻓﻲ ﺟﺎﻧﺐ ﻓﺎﻃﻤﺔ -*
ﻭﺻﻠﺖ ﺍﻟﺸﺮﻛﺔ .. ﻭ ﺩﺧﻠﺖ ﺍﻟﺤﻤﺎﻡ ﻏﺴﻠﺖ ﻭﺷﻬﺎ ! ﻭﺟﺎﺕ ﺩﺍﺧﻠﻪ ﺍﻟﻤﻜﺘﺐ ﻣﺤﻞ ﺳﺎﺭﺓ ﻭ ﻭﺟﺪﺍﻥ ! ﻭ ﻛﻞ ﻭﺣﺪﺓ ﻓﻴﻬﻢ ﻛﺎﻧﺖ ﻣﺮﻛﺰﺓ ﻓﻲ ﺍﻟﺸﻐﻞ ﺣﻘﻬﺎ ! ﺍﻻ ﺍﻥ ﻓﺎﻃﻤﺔ ﻣﺎ ﻗﺪﺭﺕ ﺗﺘﻤﺎﻟﻚ ﺍﻋﺼﺎﺑﻬﺎ ﻭ ﺭﺟﻌﺖ ﺗﺒﻜﻲ ! ﻭﺟﺪﺍﻥ ﺭﻓﻌﺖ ﺭﺍﺳﻬﺎ ﻋﺎﻳﻨﺖ ﻟﻲ ﻓﺎﻃﻤﺔ !!!!! ﻭ ﺟﻮ ﺟﺎﺭﻳﻦ ﻋﻠﻴﻬﺎ ﻫﻤﺎ ﺍﻻﺗﻨﻴﻦ !
ﻭﺟﺪﺍﻥ : ﺑﺴﻢ ﺍﻟﻠﻪ .. ﺑﺴﻢ ﺍﻟﻠﻪ !! ﻓﻲ ﺷﻨﻮ ؟
ﺳﺎﺭﺓ : ﺍﺳﺘﻬﺪﻱ ﺑﺎﻟﻠﻪ ﻳﺎ ﻓﺎﻃﻤﺔ ! ﻣﺘﻨﺎﻗﺸﻪ ﻣﻊ ﺯﻭﻝ ﻓﻲ ﺍﻟﻘﺴﻢ ﺍﻟﺘﺎﻧﻲ ﻭﻻ ﺷﻨﻮ ؟؟
ﻓﺎﻃﻤﺔ : ﺧﻠﻮﻧﻲ ﺧﻠﻮﻧﻲ ﺣﺄﺭﻭﻕ ﺍﺳﻲ !
ﻭﺟﺪﺍﻥ : ﻧﺨﻠﻴﻚ ﻛﻴﻒ ! ﺣﺎﺻﻞ ﺷﻨﻮ ﺑﺲ ﺍﺣﻜﻲ ﺍﻟﻀﺎﻳﻘﻚ ﻣﻨﻮ ! ﺍﺳﺘﺎﺫﺓ ﺭﻳﻢ ﺳﻤﻌﺘﻚ ﻛﻠﻤﺔ ﻭﻻ ﺣﺎﺟﺔ ؟
ﻓﺎﻃﻤﺔ : ﻻﻻﻻ ﺍﺑﺪﺍً ﺣﺎﺷﺎﻫﺎ ﺍﻟﻜﻠﻤﺔ ﺍﻟﺸﻴﻨﺔ ! ﺍﻧﺎ ﺑﺲ ﺑﺮﺍﻱ ﻣﺘﻀﺎﻳﻘﺔ ! ﺷﻮﻳﺔ ﻭ ﺣﺄﺭﻭﻕ ﻣﺎ ﺗﺸﻴﻠﻲ ﻫﻢ !
ﺳﺎﺭﺓ : ﻋﺎﻳﻨﻲ ‏( ﻭﻫﻮ ﺑﺘﻤﺴﺢ ﻟﻴﻬﺎ ﺩﻣﻮﻋﻬﺎ ‏) ﺍﺳﺘﻐﻔﺮﻱ ﺍﺳﺘﻐﻔﺮﻱ !
ﻭﺟﺪﺍﻥ : ﺍﻳﻮﺓ ﺍﺳﺘﻐﻔﺮﻱ
ﻓﺎﻃﻤﺔ : ﻣﺎﺷﻴﻴﻲ ﻳﺨﻄﻄﻄﺐ ﺍﻟﻠﻴﻠﺔ ﻳﺎ ﻭﺟﺪﺍﺍﺍﻥ ﺍﺍﺍﺥ ﻳﺎ ﻗﻠﺒﻲ ، ﻳﺎﺭﻳﺘﻨﻲ ﻣﺎ ﻣﺸﻴﺖ ﻳﺎ ﻭﺟﺪﺍﻥ ﻳﺎﺭﻳﺘﻨﻲ ﻣﺎ ﻣﺸﻴﺖ ﻳﺎﺭﻳﺖ ﻳﺎﺭﻳﺖ ...
ﻭﺟﺪﺍﻥ : ‏( ﺍﺗﺼﺪﻣﺖ ﻡ ﻗﺪﺭﺕ ﺗﺘﻜﻠﻢ ، ﺑﺲ ﺣﻀﻨﺘﻨﻬﺎ ﻭ ﺑﻘﺖ ﺗﻄﺒﻄﺐ ﻋﻠﻴﻬﺎ ‏)
ﺳﺎﺭﺓ : ﻣﺎ ﻓﺎﻫﻤﻪ ! ﻣﻨﻮ ﺩﺍ ﻳﺎ ﻭﺟﺪﺍﻥ ؟
ﻭﺟﺪﺍﻥ : ‏( ﺍﺷﺮﺕ ﻟﻴﻬﺎ ﺑﻤﻌﻨﻰ ﺍﻧﻪ ﺗﺴﻜﺖ ‏)
ﺳﺎﺭﺓ : ﺍﺳﺘﻐﻔﺮﻱ ﻳﺎ ﻓﺎﻃﻤﺔ ﻣﺎ ﻋﻠﻴﻜﻲ ﻛﻞ ﺷﻲ ﺣﻴﻌﺪﻱ ﻭ ﺣﺘﺒﻘﻲ ﺑﺨﻴﺮ ..
*ﻭﻫﺎﺩ ﺑﺘﻘﻮﻝ :*
ﻳﻮﻣﻲ ﻣﺎ ﺍﺣﺴﻦ ﻳﻮﻡ ! ﻡ ﻋﺎﺭﻓﻪ ﻟﻴﻪ ﺍﻧﺎ ﻛﻨﺖ ﺑﺴﻮﻱ ﺣﺎﺟﺔ ﻣﺎ ﺩﺍﻳﺮﺍﻫﺎ ﻭ ﻣﺎ ﻗﺎﺩﺭﺓ ﺍﻓﺮﺡ ﺑﻴﻬﺎ !
ﺍﺍﺍﻱ ﺍﻧﺎ ﻣﺘﺸﻮﻗﺔ ﺍﻋﺮﻑ ﺍﻟﻌﻨﻴﺪ ﺩﺍ ﻣﻨﻮ ﻭ ﺷﻜﻠﻮ ﻋﺎﻣﻞ ﻛﻴﻒ ! ﻭ ﻧﻔﺴﻲ ﻟﻮ ﺍﻗﺪﺭ ﺍﻋﻴﺶ ﻣﻌﺎﻫﻮ ﻓﺮﺣﺘﻮ ﺩﻱ
ﻭﺍﺗﻘﺒﻠﻮ ﻭ ﺍﺗﻤﺴﻚ ﺑﻴﻬﻮ ﺯﻱ ﻣﺎ ﻣﺘﻤﺴﻚ ﺑﻲ ! ﺑﺲ ﺍﻧﺎ ﻋﺎﺭﻓﻪ ﻧﻬﺎﻳﺔ ﺍﻟﻘﺼﺔ ﺣﻘﺘﻮ ﺩﻱ ﺷﻨﻮ !!
ﺍﻟﻤﻬﻢ ﻃﺎﺭﻕ ﺍﺧﺪ ﺍﺫﻥ ﻣﻦ ﺍﻟﺸﻐﻞ ﻭ ﻛﺎﻥ ﺑﻴﻨﻀﻒ ﻣﻌﺎﻱ ﻭ ﺑﻴﻔﺮﺵ ﻣﻌﺎﻱ ﻭ ﺍﺧﺮ ﺣﺎﺟﺔ ﻗﺮﻳﺐ ﺍﻟﻤﻐﺮﺏ ﻧﺰﻝ ﺟﺎﺏ ﺑﺎﺭﺩ ﻭ ﺗﻘﺪﻳﻤﺎﺕ ﻭ ﺍﻣﻮﺭ ﺯﻱ ﺩﻱ .. ﻟﻤﻦ ﺟﺎ ﺭﺍﺟﻊ ، ﻛﺎﻧﻮ ﺑﺘﻜﻠﻤﻮ ﻫﻮ ﻭ ﺍﻣﻲ ﻋﻠﻰ ﺟﻤﺐ ، ﻭ ﺍﻧﺎ ﺩﺧﻠﺖ ﻏﺮﻓﺘﻲ ﺑﻌﺪﻫﺎ ﻭ ﻗﻌﺪﺕ ﻟﻤﻦ ﺍﻟﻤﻐﺮﺏ ﺍﺫﻥ !
ﺟﺎﻧﻲ ﻃﺎﺭﻕ ، ﺧﺒﻂ ﻟﻲ ﺍﻟﺒﺎﺏ ﻗﺎﻟﻲ : ﺍﻟﻠﺒﺴﻲ ﺍﻟﻔﺴﺘﺎﻥ ﺍﻟﺮﻣﺎﺩﻱ ﻋﺸﺎﻥ ﻋﺎﺟﺒﻨﻲ ﻭ ﺍﻟﻄﺮﺣﺔ ﺍﻟﻮﺭﺩﻳﻪ ! ﺍﻧﺎ ﻣﺎﺷﻲ ﺍﺣﺼﻞ ﺍﻟﻤﻐﺮﺏ ﻋﺎﻳﺰﺓ ﺣﺎﺟﺔ ﻣﻦ ﺑﺮﺍ ؟
ﻗﻠﺖ ﻟﻴﻬﻮ ﻭ ﺍﻧﺎ ﺍﻟﻌﺒﺮﺓ ﺧﺎﻧﻘﺎﻧﻲ : ﻻﻻ ﻳﺎﻃﺎﺭﻕ ﻡ ﻋﺎﻳﺰﺓ ﺣﺎﺟﺔ ... ! ﻭ ﻗﻌﺪﺕ ﺍﺑﻜﻲ ﺑﻲ ﺻﻮﺕ ﻣﻜﺘﻮﻡ !!
ﻗﺮﻳﺐ ﺍﻟﻌﺸﺎﺀ ﺍﻧﺎ ﻛﻨﺖ ﻗﺎﻋﺪﺓ ﺯﻱ ﻡ ﺍﻧﺎ ﻻ ﻟﺒﺴﺘﻪ ﻭ ﻻ ﻋﻤﻠﺖ ﺍﻱ ﺣﺎﺟﺔ ! ﻟﻤﻦ ﺍﻣﻲ ﺟﺎﺕ ﻟﻘﺘﻨﻲ ﻗﺎﻋﺪﺓ ﻓﻲ ﺯﺍﻭﻳﺔ ﻛﺪﺍ .. ﻗﺎﻟﺖ ﻟﻲ :
__ ﻣﺎ ﺣﺴﺄﻟﻚ ﺍﻗﻮﻟﻴﻜﻲ ﻣﺎﻟﻚ ؟ ﻷﻧﻲ ﻋﺎﺭﻓﺔ ﻣﺎﻟﻚ !! ﺑﺲ ﺩﺍﻳﺮﺓ ﻣﻨﻚ ﻃﻠﺐ ﻳﺎ ﻭﻫﺎﺩ !
** ‏( ﺟﻴﺖ ﻣﺴﻜﺘﺔ ﻳﺪﻫﺎ ﺑﻮﺳﺘﻬﺎ ‏) ﺍﻧﺘﻲ ﺗﺄﻣﺮﻳﻨﻲ ..
__ ﺑﻐﺾ ﺍﻟﻨﻈﺮ ﻋﻦ ﻣﺨﺎﻭﻓﻚ ﻳﺎ ﻭﻫﺎﺩ ! ﺧﺘﻴﻬﺎ ﻋﻠﻰ ﺟﻨﺐ ﺍﻭ ﺍﻗﻮﻟﻴﻜﻲ ﺣﺎﺟﺔ ؟؟ ﺍﻗﻔﻠﻲ ﻣﺨﺎﻭﻓﻚ ﻓﻲ ﺍﻟﻐﺮﻓﺔ ﺩﻱ ! ﻟﻤﻦ ﺗﺠﻲ ﻃﺎﻟﻌﻪ ﻟﻴﻬﻢ ! ﻭ ﺍﻃﻠﻌﻲ ﻟﻴﻬﻢ ﻭ ﺍﻧﺘﻲ ﺭﺍﻓﻌﺔ ﺭﺍﺳﻚ ﻭ ﻗﻮﻟﻲ ﻟﻴﻬﻮ ﺍﻧﺎ ﻭﻫﺎﺩ ﺑﻨﺖ ﺣﻨﺎﻥ ﻭ ﺣﺴﻴﻦ ! ﻭ ﺍﻧﺠﺒﺘﻨﻲ ﺍﻟﺪﻧﻴﺎ ! ﺍﻧﺎ ﻛﻨﺖ ﻭ ﻣﺎ ﺯﻟﺖ ﻗﻮﺗﻚ ﻭ ﺩﻋﻤﻚ ﻓﻲ ﺍﻟﺪﻧﻴﺎ ﻭﺣﺪﻱ ﻣﻌﺎﻙ ﺍﻻﺧﺮﺓ ﻳﺎ ﻭﻫﺎﺩ ﻳﺎ ﺑﺖ ﻗﻠﺒﻲ ﻭ ﺭﻭﺣﻲ .. ! ﺍﻳﺎً ﻛﺎﻥ ﺍﻟﺤﻴﺤﺼﻞ ﻣﺎ ﻳﻬﺰﻙ ﻭ ﺯﻱ ﻣﺎ ﺍﺧﻮﻛﻲ ﻗﺎﻟﻴﻜﻲ ، ﺩﻱ ﺣﻴﺎﺗﻨﺎ
ﺍﻟﺪﺍﺭﻧﺎ ﻣﺮﺣﺒﺘﻴﻦ
ﻭﺍﻟﻤﺎ ﺩﺍﺭﻧﺎ ﻫﻮ ﺣﺮ !!
** ‏( ﺣﻀﻨﺘﻬﺎ ‏) ﻭ ﺷﻤﻴﺖ ﺭﻳﺤﺘﻬﺎ ﻣُﺪﺩﺩﺩﺩﺓ ، ﻭ ﻣﺴﻜﺖ ﺻﻮﺭﺓ ﺍﺑﻮﻱ ﺍﻟﻔﻲ ﺭﻗﺒﺘﻲ ، ﻭ ﻗﻠﺖ ﻟﻴﻬﻮ ﻗﺪﺭ ﺷﻨﻮ ﻭﺟﻮﺩﻙ ﻛﺎﻥ ﻣﻬﻢ ﻓﻲ ﺍﻟﻴﻮﻡ ﺩﺍ ﻳﺎ ﺍﺑﻮﻱ ، ﻭ ﺭﺣﻤﺔ ﺍﻟﻠﻪ ﺗﻐﺸﺎﻙ ﻭ ﻣﺎ ﺗﺘﻌﺪﺍﻙ ﻳﺎ ﻏﺎﻟﻲ .. ﻭ ﺑﻌﺪﻫﺎ ﺍﻣﻲ ﻃﻠﻌﺖ
ﻭﺑﺪﻳﺖ ﺍﻟﻠﺒﺲ ﺍﻟﻔﺴﺘﺎﻥ ﺍﻟﻘﺎﻟﻮ ﻟﻲ ﻃﺎﺭﻕ ﻭ ﻛﺎﻥ ﻓﻌﻼ ﺳﻤﺢ ﻭ ﻋﺎﺟﺒﻨﻲ ﺍﻧﺎ ﻛﻤﺎﻥ !
*ﺭﻳﻢ ﺑﺘﻘﻮﻝ :*
ﻣﻦ ﺑﻌﺪ ﺍﻟﻤﻐﺮﺏ ﻛﻨﺎ ﺟﺎﻫﺰﻳﻦ !
ﻭ ﺍﻧﺎ ﻧﺎﺯﻟﺔ ﻋﻠﻰ ﺍﻟﺼﺎﻟﻮﻥ ! ﻟﻘﻴﺖ ﺍﻣﻲ ﻭ ﺭﺯﺍﻥ ﻭﺍﻗﻔﻴﻦ ﻣﻨﺘﻈﺮﻳﻦ ﻭﻟﻴﺪ .. ﻣﻊ ﻣﻨﺎﺩﺍﺓ ﺍﻣﻲ ﻟﻴﻬﻮ ، ﺟﺎ ﻧﺎﺯﻝ ، ﻗﺸﺮﺗﻮ ﻭ ﻻ ﺗﻘﻮﻟﻮ ﻋﺮﺳﻮ ﺑﻌﺪ ﺷﻮﻳﻪ ، ﺍﻟﻤﻬﻢ ! ﻭﻟﻴﺪ ﺍﺗﺼﻞ ﺑﻲ ﺍﺧﻮﻫﺎ ﻭ ﺷﺎﻝ ﻣﻨﻮ ﺍﻟﻌﻨﻮﺍﻥ ﻭ ﺍﺗﺤﺮﻛﻨﺎ .. ﺣﺴﺐ ﺍﻟﻌﻨﻮﺍﻥ .. ﺍﻟﻤﺸﻮﺍﺭ ﻛﺎﻥ ﺑﻌﻴﺪ ﻋﺪﻳﻞ ﻛﻨﺖ ﻛﻞ ﺷﻮﻳﺔ ﺑﺴﺎﻝ ﻭﻟﻴﺪ ﺍﻗﻮﻟﻴﻬﻮ ﻟﺴﻪ ! ؟ ﻟﻤﻦ ﻓﺠﺎﺓ ﻗﺎﻟﻲ ﻭﺻﻠﻨﺎ ﻭﻫﻮ ﻣﻨﺘﻈﺮﻧﺎ ﻗﺪﺍﻡ ﺑﺎﺏ ﺑﻴﺘﻬﻢ ..
ﻭ ﻟﻴﺪ ﻭﻗﻒ ﺍﻟﻌﺮﺑﻴﻪ ، ﺍﻣﻲ ﻭ ﺭﺯﺍﻥ ﻧﺰﻟﻮ ﺍﻭﻝ ، ﻭ ﺍﻧﺎ ﺑﻌﺪ ﻧﺰﻟﺘﺎ .. ﻟﻘﻴﺖ ﻭﻟﻴﺪ ﺑﻘﻮﻝ ﻟﻲ ﻟﺤﻈﺔ ﻳﺎ ﺭﻳﻢ ﻓﻲ ﺣﺎﺟﺔ ﻭﻗﻌﺖ ﻣﻨﻚ ، ﻣﺴﻜﺖ ﺍﻟﺒﺎﺏ ﻭﺍﻧﺎ ﺑﺮﺍ ﺍﻟﻌﺮﺑﻴﻪ ﻭ ﻣﺪﻧﻘﺮﺓ ﺍﺷﻮﻑ ﺍﻟﻮﻗﻊ ﺷﻨﻮ .. ﻭ ﻛﻨﺖ ﺳﺎﻣﻌﻪ ﺻﻮﺕ ﻭﻟﻴﺪ ﻭ ﻫﻮ ﺑﻴﺴﻠﻢ ﺑﻲ ﺣﺮﺍﺭﺓ ﻛﺪﺍ ﺣﺴﺴﺘﻨﻲ ﺑﻲ ﺑﻬﺠﺔ ﺷﺪﻳﺪﺓ ﻭ ﻛﻨﺖ ﻋﺎﻳﺰﺓ ﻣﺘﻴﻦ ﺍﺗﻠﻔﺖ ﻭ ﺍﺷﻮﻓﻬﻢ ..
ﻟﻤﻦ ﻣﺪﻳﺖ ﻳﺪﻱ ﺟﻤﺐ ﺍﻟﻜﺮﺳﻲ ، ﻟﻘﻴﺘﺎ ﺩﻱ ﺳﻠﺴﻠﺘﻲ !
ﻳﺎ ﺍﻟﻠﻪ .. ﻣﺴﻜﺘﻬﺎ ﻟﻘﻴﺘﻬﺎ ﻣﻘﻄﻮﻋﻪ ، ﺷﻠﺘﻬﺎ ﺩﺧﻠﺘﻬﺎ ﻓﻲ ﺷﻨﻄﺘﻲ ! ﻭ ﻣﺸﻴﺖ ﻋﻠﻴﻬﻢ ﻟﻘﻴﺖ ﻭﻟﻴﺪ ﻭ ﺍﺧﻮﻫﺎ ﻟﻲ ﻭﻫﺎﺩ ﻣﺎﺩﻳﻨﻲ ﺿﻬﺮﻫﻢ ﻭ ﻭﻟﻴﺪ ﻣﺎﺳﻚ ﺍﺧﻮﻫﺎ ﻛﺪﺍ ﺧﺎﺗﻲ ﻳﺪﻭ ﻓﻲ ﺿﻬﺮﻭ ﻭ ﺑﺘﻜﻠﻢ ﻣﻌﺎﻫﻮ ، ﻭ ﻧﺎﺱ ﺍﻣﻲ ﻭﺭﺍﻫﻢ ! ﻭ ﺍﻣﻲ ﺑﺘﻘﻮﻝ ﻟﻲ ﻋﺠﻠﻲ ! ﻋﺸﺎﻥ ﻧﺨﺶ ﻛﻠﻨﺎ ﺳﻮﺍﺍﺍ ، ﻣﺸﻴﺖ ﻋﻠﻴﻬﻢ ، ﻭﻟﻴﺪ ﺍﺗﻠﻔﺖ ﻋﻠﻴﻨﺎ ﻭ ﺑﻘﻮﻟﻴﻨﺎ ﻳﻼﺍ ..
ﻭﻟﻔﺘﻮ ﻗﺎﻟﻴﻬﻮ ﻃﺒﻌﺎً ﻋﻠﻰ ﺭﺯﺍﻥ ﻭﺍﻣﻲ ، ﻭ ﺩﻱ ﺭﻳﻢ ﺍﺧﺘﻲ ﺍﻟﺼﻐﻴﺮﺓ ﺑﺮﺿﻮ .. ﻓﺎ ﺍﺗﻠﻔﺖ ﻋﻠﻲ ﻭ ﻛﻞ ﻭﺍﺣﺪ ﻓﻴﻨﺎ ﻣﺎﺩﻱ ﻳﺪﻭ ﻟﻠﺘﺎﻧﻲ ﻭ ﻭﻗﻔﻨﺎ ﻣﺨﻠﻮﻋﻠﻴﻦ ﻋﻠﻰ ﻛﺪﺍ ﻭ ﻛﻞ ﻭﺍﺣﺪ ﻓﺎﺗﺢ ﺧﺸﻤﻮ !! ﻓﻲ ﺍﻟﻠﺤﻈﺔ ﺩﻱ ﺍﺳﻤﻮ ﺭﺍﺡ ﻟﻲ ﻭ ﺑﻘﻴﺖ ﺑﺘﻤﺘﻢ ﻭ ﺑﻘﻮﻟﻴﻬﻮ ‏( ﺍﺍﺍﻧﺘـ .. ﺍﺍ ﻧﺖ ﺍﻧﺘﺘﺘﺎ (!!!
ﻭﻟﻴﺪ : ﻣﺎﻟﻜﻢ !!
ﺍﻣﻲ : ﺭﻳﻢ ﻓﻲ ﺷﻨﻮ ! ؟
ﻫﻮ ﺭﺩ ﻭ ﻗﺎﻟﻲ : ﺍﺳﺘﺎﺫﺓ ﺭﻳﻴﻴﻴﻴﻴﻤﻤﻤﻢ !!!!
ﻗﻠﺖ ﻟﻴﻬﻮ : ﻃﺎﺭﻕ !!
ﻭ ﻓﺠﺄﺓ ﺟﺎﻧﺎ ﺻﻮﺕ ﻣﻦ ﻭﺭﺍﺍﺍ ، ﺑﻴﻘﻮﻝ : ﻋﺸﻨﺎ ﻭ ﺷﻮﻓﻨﺎ ﻟﻴﻜﻢ ﻧﺎﺱ ﺑﺠﻮﻛﻢ ﺑﻲ ﻋﺮﺑﺎﺕ ﺯﻱ ﺩﻱ ﻳﺎ ﻣﻘﺎﻃﻴﻊ !!
ﻳﺘﺒﻊ ....
ﺍﻧﺘﻮ ﻣﺘﺨﻴﻠﻴﻦ ﺍﻧﻮ ﻓﻀﻞ ﺍﺭﺑﻌﻪ ﺣﻠﻘﺎﺕ ﻭ ﺗﻨﺘﻬﻲ ؟؟؟
ﺑﻴﻦ ﻓﺮﺣﺔ ﺍﻧﻲ ﺣﺄﺭﺗﺎﺡ ﺷﻮﻳﺔ ﻻﻥ ﺣﺎﻟﻴﺎً ﻟﻲ ﺷﻬﺮ ﺑﻜﺘﺐ ، ﻣﻦ ﻳﻮﻡ ‏[ 1 ‏] ﻭ ﺍﺗﺤﺮﺭ ﻣﻦ ﺍﻻﻟﺘﺰﺍﻡ ﻭ ﺑﻴﻦ ﺯﻋﻠﺔ ﺍﻧﻲ ﻧﻔﺴﻲ ﺍﻛﺘﺐ ﺍﻛﺘﺮ !!
# ﺍﺳﺘﻜﻜﺎﻧﺔﺓ ...🍫
# ﺳﺤﺮ _ ﺳﻤﻴﺮ ..