حب منبوذ

١١

قالي م حتاخر قربته خلاص ، قلت ليهو اخد راحتك ، اثناء طلوعي م حسيت الا وانا خابطه لي في زول ، و م جات الخبطة دي الا في في راسي !
من غير م احس قعدت على رجولي و مسكت راسي وانا مغمضة !  سمعت صوتو و هو بيقول لي "اسف"
الصوت صداهو كان في قلبي ما في اضاني ......
رفعت راسي و انا بحاول افتح عيوني و اعاين الصوت دا طالع من بشر زينا كدا !!
قالي ممكن اساعدك ( وهو بيمد يده) بالجد اسف ، حمدلله القهوة ما دفقت فيكي .. عاينت ليهو ! و حولت نظري من عليهو بسرعه ، و قمته براي وقفت على حيلي ! و شلت شنطتي و مشيت م رديت عليهو ب ولا حرف ! بعد قبلته منو ، قالي لو سمحتي ..
برضو م رديت و مشيت على عربيتي ، قعدت و ختيت راسي على الدركسون ، بالجد صدعته شديد عارفين خبطة الروسية ( الجبهة في الجبهه ) و بتكون جات مفاجاة من غير قصد بالجد مؤلمة !
اخدت دقايق كدا لمن حسيت الوضع راق ، بقيت بفتش بي عيوني عليهم ، و من الشباك م بحصل جوا المرسم ، حاولت امد راسي ما قدرتا اشوف كويس ،
اخدت نفسي واستغفرته !
اخدت نفسي واستغفرته !
شلت الايباد ، و كملت الحاجة الكنت ببحث عنها ، و عملت اتصال صغير ومختصر وكان كالآتي :
*ايوة ...ايوة .. ايوة نعم انا رسلتا بياناتي كلها علر الايميل! ايوة اول مرة في حاجات مطلوبة قبل اجي ! ايواا اوكي فهمته ،، شكراً جزيلاً شكرا !
اثناء ما انا بقفل الخط سمعت خبطة يد صغيرة من شباكي عاينت لقيتا البنوته الصغيرة ديك !!
فتحت ليها الباب ، قلت ليها تعالي حبيبتي ، ازيك ؟
قالت لي حمدلله ، قلت ليها اها رسمتك طلعت سمحة ؟ قالت لي شديييييد ، قلت ليها طيب ممكن ابوسك ؟ قالت لي طوااالي .. و باستني هي ، قلت ليها اسمك منو ؟ قالت لي مُزن ! قلت ليها اسمك سمح شديد يا مزن ! خلاص انتي من الليله صحبتي رايك شنو ؟ قالت لي اتفقنا بس م وريتيني اسمك خالتو منو ؟ قلت ليها انا ريم ، قالت لي سمح ، انتي عيانة !! قلت ليها لا ابداً ليه بتقولي كدا ؟؟ قالت لي عشان بابا خبطك وهو م كان قصدو و كان زعلان عشان كدا انا جيت اقوليكي ما تزعلي من بابا ، هو سمح و ما بياذي زول ، ضحكته و قلت ليها ، وجعتني حبة لكن ما عيانه واسي انا بقيت كويسه و قولي لي بابا انا ما زعلانه سمح ... فرحت و قالت لي سمح و جرت ... و تاني جاتني راجعه ، قالت لي بكرة عيد ميلادي ممكن اعزمك عشان انتي قلتي بقيتي صحبتي وبابا عزم لي صحباتي كووولهم ..
قلت ليها اممممممم خلاص بجي ، قالت لي شكرا خالتو و جرت ، رغم اني ما عارفه عيد ميلاد وين وكيف ليه و متين ، المهم بس حسب رغبتها اتماشيت معاها ..
البت دي رجعتني كم سنة لي ورا ؟ والله ما بعرف لكن بالجد ذكرتني بي نفسي زمان و حاجات كتيرة اسي ما وقتها .....
نزلت من العربية .. و دخلت عند (طه) .. عاين لي كدا بي نظرة ما قدرتا افسرهاا !! قالي كويسه انتي ؟ قلت ليهو مالي حمدلله !! قالي اممممممم !!!
في سري قلته الود دا محسسني انه متربي معاي م معقول انسان يتدخل ف الناس بالسهوله دي والحاجة الغريبه انه ما ثقيل ، يعني زول بالجد مبهج وكفايه كلام عنه و ندخل في التفاصيل ..
__اتفضلي يا ستي ..
**امممم جاهز !!
__اكيد .. اتفضلي اقعدي عشان نعرف نتفاهم !
**(قعدته) و اخدت نفس ، قلت ليهو : ملامح وش بس صح ؟
__قالي اكيد !
**طيب انا م مستحضرة كويس كدا فا اتحملني لانه وصفي حيكون متقطع شوية  ..
__طيب م تشيلي هم ابدأي ..
**وشو مطاول بس ما شديد ! و عندو الفك عريض شوية !! اممممممم كان مُلتحي كدا لحد بداية رقبتو ! و عيونو م مستحضراها لانه كان لابس فريم نظر ، عدستو مستطيلة واقرب لي انها مربعة !
**وشو مطاول بس ما شديد ! و عندو الفك عريض شوية !! اممممممم كان مُلتحي كدا لحد بداية رقبتو ! و عيونو م مستحضراها لانه كان لابس فريم نظر ، عدستو مستطيلة واقرب لي انها مربعة !
__طيب نخلي العيون للاخر  .. لحظة وكملي !
**طيب ، ممكن اشوف اسي ولا بعد تنتهي ؟
—هسي م حتفهمي حاجة انتظري بعد انتهي !
**طيب !! اثناء ما قاعده بعاين فيهو ، تلفوني رن و كانت فاطمة ! قلت ليهو لو رديت حأشوش عليك !
__(ضحك)لالا م للدرجة دي شكلك مهتمة شديد بالرسمة دي انها تزبط !
**واكتر من كدا ... عن ازنك ..رديت !!
هااه فاطمة كيفك ؟
فاطمة : الحمدلله
**لسة ماطلعتو من الشركة ؟
فاطمة : لالا طلعنا بي وراكي طوالي ، بس نسبت قبيل كنت عايزة اسالك من الزيارة ديك ، و كان اجلنا المواعيد و انتظرت تلفون من رزان م رجعت لي ونسيت م سالتك ، اسي انا براجع ف الايميلات انزكرته !
**فاطمة الشغل بينتهي في الشركة ، ليه بتشيلي تشتغلي في وقت راحتك ؟
فاطمة : انا قاعدة ساي اصلا !
**اممممم طيب دي اخر مرة تعملي كدا ، و ....
عايزاكي تجيني البيت ، فاضيه متين ؟
فاطمة : عايزاني انا !!!
**ايوة .
فاطمة : حددي انتي الزمن البناسبك !**تقدري تجيني الليله بالمساء ؟
فاطمة : جداً رسلي لي اللوكيشن بس واتساب !
**تمام ما اعدمك يارب .. و قفلته !!
طه كان بيعاين لي و ساكت م كانت في اي تعبيرات قي وشو ! كل القالو لي اتفضلي كملي !
و بديت اوصف ليهو !!