شياطين الانس

حلقة46

شياطين الانس
لكاتبه اسيل بن ناصر

حلقة 46
........

🌳🥀
‏"اللهُم اجعل أصعب أيامنا ما فات منها وأجملها ما سوف يأتى يا الله"🧡

......

في مستشفي فتحت نجمه عيونه وهي تحس باالم في راسها من قوة خبطه تاوهت وحست بحد جنبها مسك يدها شافت بنص عين كانت عمتهاولا اراديا نزلن ادموعها وانهارت ..

ام منذر وهي تمسح في دموعها ..خلاص وراس بنتي الا ناخذلك حقك انتي مش كنتي ..انتي بنتي يانجمه ...

نجمه وهي تبكي ..نا مضايقه مش متريحه مخنوقه في حوشي نا معش نبي ..

ام منذر ..غير تعوذي من الشيطان سلم بنتي والله مروان ولدي ماهو هك طبعه نا مستغربه الي صار ..

نجمه وهي تبكي وترعش سمعني كلام ياعمتي نا بروحي ماتوقعت نسمعه منه ..

ام منذر ..غير توا اهدي سلم بنيتي وكل شي ينحل وحياتك حقك نا خذا نا لك بس قصه انك اتسيبي حوشك لا تعالي اقعدي عندي لوطه بس طلعه من حوش حرجانه لا نا منرضاها ...

سكتت نجمه وهي تبحث لعمتها وهي تواسي فيها وتقنع فيها ..

....
مروان روح للحوش وهو مضايق ومهموم وخش لداره دوش ورقد كان الي صار بالنسبه له كابوس ولاول مره يرتاح في نومه ويتهني من كوابيس ...

....
فرحات ومراته قعدو مع نجمه في مستشفي وفهم فرحات ام منذر كلام تخش تساله لنجمه وتجي تقوله شن قالت عشان يتاكد وفعلا خشت ام منذر وقعدت جنب نجمه ع سرير ..

ام منذر ..يابنتي نا نبي نسالك كم حاجه ونبيك تعتبريني زي امك وتحكي الي هناك يعني مانبيكش اتحشمي مني ..

سكتت وفهمت ع عمتها ..
ام منذر ..انت ومروان كيف عايشين لكم شهر ..

نزلت نجمه راسها ووجها انحمر ..

كملت ام منذر ..سلم ابنيتي لازم نعرف عشان نلقو حل ..

نجمه وهو منزله راسها ..عايشين كيف الخوت لنا شهر لاهو قرب مني ولا نا فربت منا حتي نوم يرقد بره عمره مارقد جنبي في دار النوم وعمر ماسمعت منه كلمه كويسه طول الوقت يكشخ عليا وداير علته ان دار نوم بنتها معفنه ..

ام منذر اضايقت من كلام نجمه بس سكتت تبيها اتكمل ..

نجمه وهي تبكي ..نا عارفه ان زواجنا تقليدي بس ماتوقعت ان يكون هك قصدي يعامل في مروان كاني خدامه انظف ونطيب وياريت عاجبه ياعمتي ..ديمه يعلل بقلة نظافه حوشي والبنه لمعغنه ...
ام منذر ..به يانجمه في حد خش حوشك وانتي عروس ..
نجمه ..لا محد خش ياعمتي ..ولا اذكرت ..امل امل في مره كنا انطيبو في غذاء دبشها تلبز طلبت منه لبسه ورقت معايا قاستها في شقتي ..

ام منذر وهي مضايقه ..وفي دارك ..

نجمه كملت ..اها وماجتش عليها ضيفتها وبعدين نزلت ولحقتها ..