طريق المدينة

بارت الـ ٢٧

قصه : طريق المدينه ..
للكاتبه : زهراء علي شناوه ..

شفتكم متقرون الاشعار كلت بعد المن اتعب نفسي و اكتب اشعار .. فَـ هم توكلو على الله و اقرو البارت ..

طيبه : اني طيبه بنت مؤيد و ناديه .. عمري ٢٤ سنه حاليا.. خريجه من كليه علم النفس .. جان بنفسي بس اكمل جامعه ادخل دوره ضباط  بس تزوجت و مكدرت ادخل ..
جنت البنيه المدللَ عند زوج امي عباس جان كولش يحبني و يخاف عليه من الهوَ .. جنت مغروره حيل بس دائما البنات يحبن يصيرن صديقاتي و بهايَ الحاله اني مصادقه الجامعه كوله .. حياتي بسيطه حيل مابيها شيء مميز.. حبيت مره وحده بحياتي و هوَ ياسر و من قررت اعترفله طلع انكس خلق الله و تراجعت و بهايَ الحاله غصبا ما عليه نسيته .. امي جانت دائما تنصحني ولا مره حجت عليه ولا رزلتني .. اقرب انسانه اليه ايه أحــبه حيلل هيَ سندي بهايَ الحياه هيَ صندوق اسراري كل اسرار طيبه عند ايه ..
حياتي طبيعيه مابيها اي حدث مهم .. من جنت صغيره جنت مدبدبه و الكل يحبني و بيضه حيلل و محبوبه ههه اهل عباس كولهم يحبوني بس اني ما احبهم ما اعرف ليش .. يا اخي ثكيلين على المعده ههههه مينطاقون .. حياتي جانت طبيعيه و حلوه و حايره بالدراسه .. يوم من الايام و هاذا اليوم الي نهَ حياه ٥ بنات يوم وفاه امي و ابويه .. جانت فاجعه جبيره علينا .. وراها أخــتي زينب اطلكت و كملت السبحه .. بعدها زهَــرة القويه مالتنا. .. زهراء حرفيا انسانه ما اعرف شلون اوصفها !! اني اختها و ما اعرف طبعها ولا شخصيتها بس الاعرفه عنها صاحبه كلب طيب و حنينه حيللل و بنفس الوقت لبوه ثكيله لو الف شخص مراح يكدر يكسر خشمها .. و بنفس الوقت قويه لدرجه كسرت خشم اكبر عشيره .. بيوم كاعدين و اجتِ زهراء كالت اتصلت على خالي .. و عرفنه عدنه خال و رحنه وياه للانبار .. اني اعرف بالانبار زلمهم زلم سباع و قويين و اهمشيييي عرضهم .. و من رحت و عشت بالانبار طلع الاعرفه صح و من صدك ناس ورده مال الله ..
بيوم الوصلنا بيه للانبار طلعت من الغرفه مالتنا و دا اروح للحمام صار بوجهي طركاعه!! ولد حلو قليله عليه !! و عضلات و طويل يابويهههه  .. اني اريد افوت للحمام و هاذا واكف صافن عليه
سئلته منين ؟ .. طلع ابن خالي حسين
راح و فتت للحمام .. بس بقه ابالي هلكد ما حلو !!!
مرت سنه و أحنــة ابيت خالي و حياتنا عاديه و مابيها شيء و مواقفي ويه حسين هواي و هوَ كام يحبني ☺️.. و طبعا يا غبيه متحب هيج واحد !؟
بادلته الشعور و صار روحي من الدنيا هوَ و وره سنتين خطبني و تزوجنه.. حسين قوي حيلل و ثكيل بس بنفس الوقت صاحب شخصيه مرحه و يضحك الواحد غصب عنه يحب يشوف الكل سعيدين و هوَ ميهمَ نفسه ان كان سعيد او حزين !
حسين هواي عانه بحياته.. و شاف اشياء لو جان حجر جان انفلق بسبب المواقف الصايره بحياته !!
قبل فتره توفه صديق حسين خطاب .. خطاب فد خوش ولد و مـاشـاءالله كولش حلو .. بس بعد كولنه على هاذا الطريق و توفه قبل بيوم من عرسه ..
حسين ٣ اسابيع و هوَ نفسيته صفرر و كاره حياته .. من توفه خطاب اجه ضابط اسمه زين يم حسين ابكان خطاب
اليوم ماكو احد بالبيت بس أحنــة البنات .. سويت كابتشينو و صعدت فوك و طكت براسي اله امسح البنكه و حسين ميقبل ..
جبت الدرج و صعدت امسحها ..
دا امسحها و اغني اغنيه ..
" يا كاع ترابج كافوري ..
على الساتر هلهل شاجوري
على الساتر كولنه تعنينه.. "
ما احس غير رجلي تزحلك من الدرج و اوكع حطيت حملي كوله على ايدي
حسيت ايدي نكسرت و الدرج وكع و صارت طبه قويه ..
عطت بصوت عالي من الم ايدي
اييييي ايدييي .. خالههههه ايهههه تبارككككك وينكممم