خرافات زمان ليبية💗

السلطانة اليتيمة و ضرايرها

#خرافتنا_اليوم...

ياحنااااا يامنا !! ربي يعطركم بالزهر والحنة، ويجعل مقامكم من مقام الجنة. قولوا آمين...
كان يامكان في قديم الزمان كان فيه راجل عايش مع وليده وبنيته اليتامى بعد ما بعيد عليكم الشر ,توفت اميمتهم وقعدو بروحهم لا من يطبطب ولا من يحن صغيرين ياناري ماعندهم والي والبو مش زي الميمة الحنينة لما تغيب ناقتصهم مية حاجة وحاجة ، وفي يوم من الايام قعمز البو يخمم ياكبادي كيف ندير اني تمرمدت و الصغويرة تمرمدو معايا خلي نجيبلهم مرت بو تحن عليهم زي اميمتهم تونسهم وترد بالها منهم ، قعد ينشد من هني من هني في ناس دلوه علي مرية قالوله باهية شكروهاله مشالها وخطبها وقال هكي تزوجها وروح بيها لحوشه اللي فيه صغويرته يحسابها بتفرح بيهم وبترد بالها منهم وبديرهم زي صغويرتها ولكن صار العكس وين ماهذا وهيا تشكي وتبكي صغارك هادم دبرلهم دور لمن تعطيهم اني معاش قادرتهم ، دبرت عليه قالتله يااني ياهما معاش قاعدتلك فيه الحوش وهديكة بنيته تسمع فيها وساكتة كل ليلة وهيا تشكي وتبكي لبوها . وقعد الراجل مسكين حاير بين حبه لصغاره وبين مراته اللي مابت تمل من الشكوة والنقان .
وتاني يوم الصبح ناض بكري وقال لصغويرته هيا نوضو معايا بنمشي للغابة بنحطب ,فرحو هدوكة الصغويرة و مشو معاه وكانت البنية عاقلة وكبيرة شوية واذكرت عراك مرت بوها في هديكة الليلة وقالت هذا اشبح لمني بيعطينا وبيخلينا، مشي خدت معاها حبيبات فول وهي على طول الطريق وين مايمشو شوية تحط حبة فولة لين وصلو ، قال لبنيته العبي انتي ووخيك هنايا و استنوني نمشي نحطب ونجيكم . ومشى البو مسافة لقي شجيرة علق فيها قربة متاع امية فاضية يابسة (مصنوعة من جلد الماعز ) وحط فيها بوبريص في وسطها وسكر عليه المغطة.
وقعدت هديكة البنية تلعب هيا ووخيها ووين ماهذا يسمعو في هداكة البوبريص يخربش في القربة يسحابوه بوهم قاعد قريب يحطب بحداهم ، قعدو على هالحال لا ماكلة لا شراب يستنوا لين جي الليل, والصوت انقطع وقعدو ياناري يتعايطو وينك يابوي وينك يابوي مارد عليهم والي والدنيا زادت ظلمت وهداكة الوليد من الخوف مظبط وخيته ويبكي وهي تقوله ياوخي اسكت تو بونا قريب يجينا يروح بينا ، استنو استنو لين حتى هديكة البنية خافت قالت لوخيها تبعني تو اني اروح بيك للحوش وقعدت اتبع في هديكة الفولات اللي في الطريق لين وصلت هيا ووخيها ، خشو للحوش لقو مرت بوهم تحط في العشاء لبوهم أشكال وألوان ماخلت مادارت فرحانة عاد بتطير، ناض بوهم قاللها ياريت صغويرتي معاي ياكلو من هالخيرات، ردت عليه بنيته هانا جينا يابوي,وقعمزت هيا ووخيها، وهديكة مرت البو طارتلها وناضت قتله والله ماني ماساته هونا تعشى انت وصغارك وفي الليل دارتله مرداح غدوة بنلقى صغارك في الحوش ماعاد قاعدتلك فيه دور وين تحذفهم .
من غدويتها الصبح عاود نفس القصة هيا صغويرتي برو معاي بنحطب وهديكة البنية رفعت صرتها معاها عبتها حبيبات فول ، تمشي وتحط في هدوكة الافيلات في الطريق ووخيها ماشي وراها ويلقط ، الحبيبة اللي تحطها يلقطها ويدسها لين وصلو وعاود بوهم دار نفس القصة علق القربة اللي فيها بوبريص ومشي روح وليل علي الصغويرة هداكة الليل راح والبنية شدت وخيها بتبع الفولات وبتروح ، قعدت ادور من هني من هني ياكبادي وين الفول مشي مالقت شيء ، يسمع فيها وخيها قالها اهوه الفول راهو امبكري انتي تمشي والفول يطيح منك واني وخيتي لقطتهولك كله اهوه ياوخيتي عندي، شدت وخيها وقعدت مرة تسكته ومرة تبكي معاه خايفين ياناري الليل ليل والدنيا سكتت وهما قاعدين بروحهم وسلمت أمرها للله رقدت وخيها في حجرها ورقدت في هديكة الغابة للصبح .
صبح الصبح نوضت وخيها وقعدت تمشي تمشي لقت روحها بالشوي بالشوي تذكر في الطريق لين وصلت لحويشهم خشت تجري فرحانة هيا ووخيها ادور من دار لدار في بوها ومرت بوها لقو هداكة الحويش فاضي مافيشي حويجة لا حويجات لا ماكلة ولا حاجة ، بوها راحل من الحوش وخلاه فاضي، قعدت هيا ووخيها في حوش بوهم بروحهم رادة بالها منه .
وتعالي ياايام وامشي ياايام وهديكة الصغويرة كبرو ،وكبر الوليد وبدي يمشي يصطاد في الغزلان وهديكة البنية كبرت وراحت زي الغزيلة تقول للقمر انزل واني نشرق في مكانك وخيها يمشي يصطاد وهي تستنى في الحوش تسكر علي روحها في الباب ماتطلعش بكل لين وخيها يجي يطقطق عليها ويكلمها وخيتي وخيك جي وجابلك باش نتسلو ونتحلو افتحيله الباب ، تفتحله
وتقعد هيا ووخيها يلعبو بهداكة الغزال الصغير ولما يعيو من اللعب يدبحه وخيها ويتعشو بيه ،وتاني يوم وثالث يوم نفس الحكاية
وكان وخيها خايف عليها من كثر ماهي جميلة يقلها ردي بالك تطلعي من الحوش لين اني اروحلك ماتفتحيش الباب لين تسمعيني جيت ونكلمك
وفي يوم من الايام مشي خوها يصطاد ووخيته اضم في هداكة الحوش لقت حويجات خوها كلهم خامرات قالت تو وخيي بيروح في الليل معاش يلقى ما يلبس خلي نمشي فيسع فيسع للوادي نغسلهوله من بيشوفني ، لقطت هدوكة الحويجات ومشت، وصلت للوادي وبدت تغسل في حويجات وخويها يمشي حراس السلطان يشوفوها , مشو يجرو للسلطان قالولوه ياسيدنا السلطان راهو اليوم شفنا بنية بحدا الوادي سبحان من صورها ,اية في الجمال قالهم دوروها وين ماهيا وجيبوها للقصر ,من غدويتها مشو للحوش واستنو خوها لين طلع للصيد وجو طقطقو عالباب مابتش تفتحلهم قتلهم لا انت بوي ولا انت خوي ولا انت عزيز عليا ماني فاتحتلك ماهو خوها موصيها ما تفتح لحد، قعدو هدوكة الحراس قرب الحوش لين رجع رجع خوها بالغزال اللي اصطاده وطقطق عالباب وقال : ياوخيتي وخيك جي وجابلك معاه باش نتسلو ونتحلو.... عرفاته وخيها فتحتله لعبو مع الغزيل لين عيو وذبحوه وتعشو ورقدو..
تاني يوم نفس الشي راجو خوها لين مشي يصطاد وطقطقو عالباب ونفس الشي هديكة البنية مابتش تفتح الباب قرب واحد من الحرس للباب وغير صوته وقلها وخيتي حلي الباب وخيك جي وجابلك باش نتسلو ونتحلو، جت تجري لهداكة الباب قالت هذا وخيي روح
فتحت الباب خدوها هدوكة الحراس وبيرفعوها لقصر السلطان قعدت تبكي وتترجى فيهم خلوني تو وخيي يجي مايلقانيش قالولها شي توة تمشي معانا ....قالتلهم باهي خلوني نرفع معاي سطيلي متاع النحاس ، قالولها باهي رفعوها ومشو
وفي العشية روح وخيها ومعاه الغزال وقعد ينادي ياوخيتي افتحي الباب وخيك جي وجابلك باش تتسلي وتتحلي ، مارد عليه حد ولا الباب انفتح .. كسر هداكة الباب قال هادي وخيتي اشبح شن صارلها، قعد يدور من دار لدار الحوش كله مالقاش وخيته، قال هذا اشبح من خطف ، بات هديكة الليلة ومن الصبح ناض بيدور علي وخيته.... وقعد ايام يلود من مكان لمكان وينشد من هني من هني ماحد قاله شفتها
يسمع في دوشة عالبير قال خلي نمشي ننشد بالك حد شافها عالبير مشي لقي بنات ونساوين ولقي وحدة من البنيات شادة السطح النحاس متاعهم عرفه ،، قلها اسقيني امية بنشرب ..عبتله هديكة المية في سطل تاني واعطاته يشرب قالها لا اني نبي في هداكة سطل النحاس، قتله لا ياحنا هذا سطل السلطانة مش مهبولة نعطيك تشرب فيه بعدين السلطان يقطعلي راسي، قلها راهو هذا السطل متاع وخيتي , وراني ندور فيها ، قتله كيف اختك ؟ عطاها موس صغير نحاس وقلها وريه لمولاتك تو كانها وخيتي تو تعرفه وكان مش وخيتي ربي يعوضني ونلقى وخيتي
مشت هديكة الخدامة وورتها الموس وبدت تبكي من الفرحة وقالت للخدامة خودي حصيرة ولوي فيها وخيي ودخليه للقصر وراهو يشوفوك الحراس
مشت الخدامة ودخلت وخيها للقصر فرحت وخيته قريب طارت وحكت لوخيها شن صار هدرزت علي وخيها لليل ، علي جية السلطان يسمع فيها تضحك تغني وفرحانة ، قلها خيرك انتي اليوم قداش ليك معانا وانتي مهمومة وغير تبكي وخلاص واليوم فرحانة بطيري قالتله يامولاي اعطيني الامان ونقولك شن صار ... قالها عليك الامان غير قولي ,قالتله راه جي خويا اليوم وحكتله شن صار قالها مرحبتين بيه .وهو السلطان جابها للقصر لكن ماتزوجهاش قلها لين ترضى بروحك وتوافقي علي زواجنا مانبيش نغصبك
قتله يامولاي اهو خوي توة اطلبني منه للزواج واني موافقة
طلبها منه و دارو العرس سبعة أيام وسبعة ليالي وعاشو في هناء حتى من نساوينه التانيات غارو منها بدي السلطان أكثر الايام معاها بعد شهور حملت وقربت موعد ولادتها وكان السلطان طالع في حرب
خاف عليها من ضرايرها في غيابه قبل مايسافر وصى عليها وخيها
يرد باله منها
سافر السلطان وهدوكة الضراير قالو هاذي فرصتنا خلي نفتكو منها مشو زعميتك يهدرزو عليها وكل وحدة تمنتلها حاجة وحدة قتلها انشاء الله كل شعيرة بيبرة والتانية قتلها جعنك بين شاردة وواردة والثالثة قتلها نبيك تحنيني اديريلي عصيدة بيدياتك الحلوات طبعا هيا مافهمتهمش شن يقولو
وبعدين قالولها ماعمركش شفتي الرمان الضحاك قالتلهم ما عمريش شفته قالولها تعالي اطلعي معانا للجنان ونوروهولك ,مشت معاهم لين وصلو للبير وقالولها طبسي وشوفي الرمان الضحاك طبست عالبير يمشو يدفوها اطيح في وسطه

قعدت في هداكة البير لين ولدت ورجع السلطان من الحرب وسأل عليها قالوله راه خوها حذفها في البير قالهم جيبوه واربطوه وجيبولي السيف بنقطعله راسه. جابوه قال للسلطان نبي نطلب طلب اخير ياسيدي ..قاله شنو قاله ارفعوني للبير بنودع وخيتي وافق السلطان ورفعوه حدا البير ، وقعد يقول ياوخيتي وخيك جي القيود في يديه و في رجليه والموس في رقابيه ، وهي تقوله : المية تحتي تجري ووليد السلطان في حجري والحنشة دايرين بيا ,والسلطان يسمع فيها عرفها قال لخوها عاود لكلام اللي قلته قال : ياوخيتي وخيك جي ا لقيود في يديه و في رجليه والموس علي رقابيه ، وهي ترد عليه المية تحتي تجري وولد السلطان في حجري والحنشة دايرين بيا
قالهم السلطان فكوه حتى نشوف شن صاير ومشي السلطان حدا البير وطل على مراته وقالها انزلك قفاف فيها لحم كل حنش حطيله قفة علي راسه يلهى فيها ونزلها حبل شدت فيه هي ووليدها وطلعت من البير قلها السلطان مني اللي دار فيك هكي قالته نساوينك جابوهم وكل وحدة قلهم ديرولها اللي تمناته الضرة الاولى متاع كل شعيرة بيبرة قطعولها شعرها وكل مكان شعرة دخلولها يبرة والتانية امر الحراس وجابو ناقتين وكتف كل ناقة يد ورجل الضرة من جهة ويد ورجل من جهة تانية وحط تحتهم سطيلات فاضيات يقربعو انخلعو النياق وهربو وكل ناقة رفعت معاها طرف من الضرة والثالثة قلها حنيها وديريلها عصيدة من يدياتك تاكلها....وبعد التعب واليتم عاشت هيا ووخيها في القصر متهنيين الكلمة كلمتها والشور شورها...
ومشيت عليهم وخليتهم بوذني سمعتهم وبعيني ماريتهم
وانشاء الله عجبتكم الحكاية

#منقول
#ام_ايهم_الايهم