مضطربة_عقلياً

البارت 22

يبست أنهار
الأمل وانتظر روحي تموت 🥀💔

#مضطربة_عقلياً

البارت_22

🌹 🌹 🌹 🌹 رزان باسم 🌹 🌹 🌹 🌹

_تطلعين بدون علمنا مو... اليوم اشوفج
نجوم الظهر بعينج... جنت اكول طفلة
خطية بس هسة لا.... اوكفيلي

_والله ما اعيدها بعد والقران عوفني
عليك الله .. جنت احجي وابجي
جنت اتوسل بي علمود لا يضربني

_مستحيل اعوفج تشوفين هذا
الحزام اليوم اخلي يركص على جسمج
علمود مرة الثانية تحسبين حساب
للموجودين بالبيت ..

_كلتلك ما اعيدها والله ما اعيدها..
جان توسلي بي عبث كام يجلد
بيه بالحزام على كل مكان بجسمي
واني اطفر منا وارجع منا .. بس جانت.
لسعة الحزام توجع بحيث احس روحي
وية كل ضربة تطلع ... من كد
البجي كمت اصرخ بدون وعي
مني وحسيت نفسي بقوة عشر زلم
لدرجة كمت على حيلي واضرب بي
. واصرخ .. اعصابي ترجف وايدية
ترجف.. بس احس حرارة جسمي
صارت نار ..

_فوكاها تضربين .. لا تبقين تصرخين
ميفيدج هذا ..

_تعبت واني احاول اشرد منه .. فقدت
بالصياح حسيت نفسي مو اني الي اصرخ اكو شي بداخلي يكلي اصرخي .. هو كأن
صار مثل الوحش يضرب بكل مكان
بجسمي ما يشوف كدامة شي

وكعت بمكاني لان باد حيلي وماكدرت
فقدت الوعي تماما .. وما اعرف شنو
صار بس بوقتها حسيت كلبي وكف وخلصت
ورقتي بالحياة .. بس الله كاتبلي عمر

ما اعرف شكد مر من الوقت او يمكن
مر يوم كامل لو يومين... بس من حسيت
على نفس وضعي .. بالكاع مشمورة

كوة كمت احس جسمي مكسر من
الضرب... اريد اتخلص منه شلون
زحفت على الكاع و وصلت يم الجرباية
سندت نفسي وكمت .. تمددت على
الجرباية اريد اريح جسمي .. حسيت

نفسي بردانة ... تغطيت وبعدة البرد
بجسمي ... جسمي احسة نار.. بقيت
اون من عظامي والنفاظة ما راحت
مني ابدا وكل هذا محد اجة وسال
ولا حتى شاف الوضع ميته لو عدلة

جنت بين الحقيقة والحلم . حسيت
الجرباية من يم الجهة مالتي نزلت
شوية وكأن احد كعد يمي .. باوعت

لكيته كاعد يمي وحاط ايده على
وجهي .. ويتلمس بي .. لمساتة
كلها دافية و حنينة.. ابتسمت من
شفتة .. طبع بوسة على خدي
وبوسة خفيفة على شفايفي .

فزيت باوعت للغرفة منا ومنا ماكو
احد .. تلمست وجهي .. نار عزة.
هذا منام .. اريد اكوم ما اكدر
حسيت نفسي عاجزة.. بجيت وجانت.
الدموع تجوي خدي .. ليش هالذلة
هاي .. ياربي  ليش .. ثواني وسمعت
باب الغرفة انفتح .. جنت كوة مفتحة
عيوني احس عليها غواش ما اشوف

شي ابدا  شفت واحد اجة عليه
غمضت عيوني لان ما اكدر افتحهن
حسيت بنفسي احد شالني... بعدها
فقدت الوعي تماما ..