رِحـلـــةُ قلبـيْ

شُكــوك

أريـد اصـفن بوجهَـك صفنة الميتيـن..
ما أرمـش لوّن شچيتنـي بسِلـة..

.
.
.
.

من بعد بوسته اللي ماعرف شسميها صعدت بالعمارة واني متيهة الدنيا.. اجيت اطب لشقتي بس تذكرت اني گلت انظف شقته.. واكيد هسه اجتماعة مهم وحيتأخر لذلك رح الحگ النظفها بسرعة واطلع..

رجع لشقته دخلت الرقم ودخلت.. نزعت شالي والشبشب والروب واني اصرفن ردانات الدشداشة وبلشت انظف بالصالة.. چان متروسة علب وگطوف جگاير فارغة وكوابة فارغة مسطرة وچبس واگع متطشر عالتخم.. ضليت انظف بيها وانقل الشغلات اللي تحتاج غسل للمطبخ اخلي اخر شي.. خلصت من الصالة وشلت ملابسه اللي چانن مذبوبات بيها ورحت عالغرفة... صفنت هسه هي متروسة ملابس شلون ادخلهن للكنتور وارتبهن لو فشلة؟ يا فشلة هسه انتي عليمن جاية تنظفين اذا فشلة..
جبت مكناسة كهربائية ووصلة مسح للأخشاب.. اول شي سويته رتبت الجورباية واني اجيت اختنگ من كمية العطر الموجود بالفراش لدرجة تشبعت رئاتي بي چان بصف الجورباية كومدي صغير مخلي بي صورته هو وابوه وأمه وياهم زعطوطة صغيرة عرفتها هاي تبارك من كفشتها والصورة قديمة...
رتبت ملابسه النظيفات بالكنتور والوسخات خليتهن بسلة الغسيل وبديت امسح بميز المراية.. اجاني فضول افتح الجرارات واشوف شبيهن.. فتحت اول جرارة وجانت متروسة ساعات وعطور بس مخربطة.. رتبتهن عدل واني كل عطر اشوفه گبالي ارش منه رشة.. وبعد عناء طويل خلصت الغرفة جانت اصعب وحدة لأن هواي بيها غراض.. دخلت للغرفة الصغيرة لگيته مخلي بيها كراتين مال مادري شنو بس كلها اوراق وكتب وجنط سفر و اوتي وستاند مالته.. خليت الملابس بالغسالة ورحت عالحمام جان نظيف مابي شي عفته ورجعت للمطبخ وبديت اغسل المواعين وارتبهن بمكاناتهن وامسح الكاونترات.. فجأة قررت اسوي شوربة عدس بمناسبة الجو الجامد هذا.. طلعت غراض بسرعة وسويتها.. يمكن هاي الاكلة الوحيدة اللي اتقنها واسويها طيبة كلش لأن تعلمتها من جدتي.. سويتها ورجعت للغسالة شريت الملابس داخل الغرفة ورجعت اكمل بتحظير الشوربة.. باوعت الساعة صارت ٦ يعني آسِر اكيد على جية لازم اخلص بسرعة.. گلت ما اضل گاعدة واني انتظر الشوربة تصير طلعت خضروات وبلشت اسوي سلطة.. الجو بالشقة صار دافي لأن فتحت كل التدفئات بس ضليت احس ببرودة.. ايد ممتعودة على هالجو.. ربطت شعري سويته عقدة بالنهاية لأن مجايبة وياي قراصة وبدا يضوجني..
چنت ناسية انو من دخلت چنت مستعجلة ونسيت باب الشقة مفتوح شوية ما طبگته عدل حتى نزيت واني سمعت صوت واحد يتحمحم وراي..
درت وجهي بسرعة واني شفته آسِر.. راجع ونازع جاكيته ومنتجي على الحايط ومكتف ايديه.. هذا كله واني ماسمعته.. لو داخل علية حرامي چان هسه اني بخبر كان..

توترت من نظرته وزادت بالاخص ورا بوسته اللي ماعرف شسميها..

-آـ آسِر اني شسمه

ما رد علية واني اشوفه نظراته مظلمة وهو يباوعلي بهدوء يخوف.. انتبهت لروحي بلا حجاب وبدشداشتي الگصيرة وتحركت حتى البس روبي وشالي.. بس هو چان قاطع الطريق و وي ما اجيت امر حسيته ايده صارت على خصري..
رجف گلبي واني احس فراشات ودگات گلبي كلها صارت بهالمنطقة وابصم بالعشرة انه سمع صوت گلبي..
انكمشت على روحي واني مامصدگة كلشي هسه واني احس بي يتنفس من شعري ويجر انفاس عالية منه ونزيت واني اسمعه يگول