رِحـلـــةُ قلبـيْ

سنـة جديـدة

حَبنِـي آني وهوستي وشعري الطـويل...

.
.
.

حسيت كل عضو بجسمي يتوقف من حچايته وانفاسه التضرب على اذني خلتني اتصنم بمكاني واني احس بشالي وگع من راسي.. مرر ايده على زندي لأيده وهو يشابك باطن كفه بظهر كفي ويتحكم بيها.. حرك ايدي ناحية القوري وشاله واني ما ابدي ذرة قوة لأن هو اللي يتحكم بيها.. صب بالكوابة وبالالف يالله حتى خلص.. هد ايدي واني لميتها لصدري بسرعة وهو ياخذ كوب اكثر ويسبب احتكاك قوية بين اجسامنا..

-هسه نشرب چاي مهيل من ايدين ام جناغ

اخذ الكوب ورجع يتبختر بمشيته وهو يخوط بالكوب ويحجي وي ذياب اللي يفتر داير مدايره.. ماعرف هسه شسوي اغلس عالسالفة مثل ما هو غلس لو ابين انو اني متأثرة واسئله سبب كلامه وفعلته؟.. بس مدام هو غلس عالوضع اني هم حغلس شنو وحد..

اخذت نفس عدلت شالي شلت الكوب ورجعت گعدت مقابيله واني اشرب بالكوب واباوع لذياب اللي يفتر بالشقة وكلما يصير قريب مني انكمش على نفسي.. ويمكن متجاهلة نظرات آسِر اللي احسه مضيع شي بوجهي.. شوي سمعت صوت موبايله يدگ جاوبه وطلع اخوه من العراق.. ضل تقريب الربع ساعة هو يحجي وياه بأندماج ويضحك... بعد ما غلق التلفون وگف على حيله واني انقبض گلبي.. بسلا حيروح؟

-حتصير العاب نارية بهالمنطقة تگدرين تشوفيها من البلكونة لأن قريبة.. تشوفيها؟

اني تحمست علمود الالعاب النارية لأن متشوقة اشوف تحظيراتهم للسنة الجديدة.. خليت الكوب عالميز وگمت متحمسة

-صدگ!..

مالحگت اسمع جوابه واني اركض لغرفتي وافتح باب البلكونة وهو يمشي وراي.. فتحت الباب الزجاجي وجان الجو متجمد! خليت ورجعت طلعتلي ملحف صغير ورجعت وهو گاعد على الكراسي الحديد گعدت بصفه واني اباوع على الحديقة اللي گدام العمارة جانت كل الشجر اللي بيها مزين بأضواء حلوة و رجال متنكر بزي بابا نويل يبيع نفاخات وهواي ناس گاعدين منتظرين الالعاب..

-مامتعودة على البرد..

التفتت عليه وهو حجه وكأنه يأكد على هالشي مو يسأل.

-اي كلش باردة واحس اطرافي جمدت هسه بس مافوت هاي اللحظة..

هز راسه ورجع يباوع ليگدام واني انتبهت على 'ذياب' اللي من طلعنا لحد هسه هو مبين فرحان وكل شوي ينبح ويفتر بالبلكونة كأنه فرحان بالبرد...

شوي وسمعنا صوت ناس تبدي بالعد التنازلي.. گمت لزمت السياج واني اتلفت واعد وياهم بخفوت.. حسيت بـ آسِر وگف بصفي وهو ساكت بس ما التفتت اله

خمسة.. اربعة.. تلاثة.. ثنين.. واحد..

وبدأت الالعاب النارية تصعد وتشكل اشكال حلوة ومبهرة للعين ضلت دقايق هواي الى ان انتهت واني بس اباوع وكلشوي اشهگ بفرحة من اشوفهم يسوون شكل اعرفه..