رِحـلـــةُ قلبـيْ

بدايـة جديـدة

بعـّز بـرد اللّٰـه نسـماتَـك چـونّــاي
يچـوي النَـاي بس ونّــي چُـوه النــاي...
تظن ونّك حرب! خايب چا ونّاي؟
احس هولاكو طب بغداد بية...

.
.
.
.
.

صحيت من نوبة البواچي الي استمرت لنص ساعة تقريبا.. وگفت واني استكشف زوايا الشقة الي حگعد بيها.. بالبداية صالة متوسطة الكبر بيها تخم جلد جوزب وبلازما چبيرة وراها شباك ماخد نص الحايط مفتوح عليها مطبخ بي ثلاجة بابين چبيرة.. وعاليمين فتحة بالحايط نص دائرة وممر بي ٣ بيبان فتحت الباب الأول طلع نفس غرفة الملابس وبيها غسالة ملابس.. عاليمين باب الحمام الي بي بانيو راح يشهد على حفلات التدليل الي حسويها وعاليسار هي غرفة النوم بيها چرباية چبيرة ميز تواليت ومجرات بيضة ومرايا طولية والكنتور صاير داخل بالحايط ٤ بيبان و باب زجاجي.. مال شنو هذا؟ اخذني الفضول اله وخرت البردات البيض عنه وفتحته.. بلكونة بيها كرسي وطبلة صغيرات واصايص مال ورد فارغة والمنظر اللي گبالي بالليل شي فضيع حديقة چبيرة بنصها ساحة دائرية بيها نافورة وما بعد الحديقة تل ناصي كله اشجار صنوبر.. اخذت نفس عميق ورجفت على بردوة الهوا.. رجعت سديت الباب واخذت جنطي من عند الباب َدخلتهن الغرفة.. نزعت شالي وسترتي ورحت ركض للثلاجة.. فتحتها انصدمت! متروسة غراض واكل وصاير وفواكه! سعبلت حرفياً من المنظر.. ولان جوعانة بس موكلش طلعت قطع توست وجبن ومربى وعصير رمان ومشيت للغرفة.. واني اكل بديت ارتب بالجنط
بديت بالجنطة الصغيرة اللي چانت بس مواد احتاجها و اصلا نصها متروسة علب بن رضا علوان! اي فـ اني اذا ادمنت شي فهو بن رضا علوان اللي اتمني الگي محل هنا يبيع منها.. والباقيات كتب احتاجها واكسسوارات ومكياج وجواريب وهالسوالف.. رتبتهن بالمجرات بسرعة.. الجنطتين الثانيات ملابس واحذية خليتهن شلون مچان لان مجايبة تعلاگات.. بدلت ملابسي ولبست تراك نوم قطني وگلت باچر اسبح لأن هلكانة.. وقتت الموبايل ونمت على وجهي من التعب...

ماحسيت بروحي واني نايمة ويمكن حتى احلام ما حلمت... فزيت على صوت الموبايل يدگ برنة واتساب؟ فتحته داشوف الساعة سبعة ونص الصبح ورقم ماما يطلع..
رديت عليها طمنتها انو اني وصلت بعد ما حصلت رزالة مرتبة لأن مرديت من اول اتصال...
فركت عيوني وگمت سبحت وطلعت بالبرنص فتحت الثلاجة ضليت صافنة شاكل ماشتهي شي ونفسي تلعب سويت.. سويت گهوة وشربتها واني افتر بالشقة واحفظ تفاصيلها وكلشي موحو بيها.. صارت ساعة ثمانية ونص بدلت لبست ثوب تسعين نود قماش ثخين وعالجسم ولبست فوگه بشت اسود شال اسود وترانشوز ابيض لان اكيد حنفتر هواي واتعب بالكعب.. مكياجي اليومي ايلاينر مسكارا رتبت حواجبي هايلايتر بس هالمرة حمرة احمر مات وگعدت انتظر.. زين هسه اروحله اني لو هو يجيني والله فشلة.. زين نساني بالله وراح ع شغله؟ شسوي بهالحالة.. لهيت روحي وضليت اخذ صور واسوي فيديوهات لماما واني اصور الشقة وافتر بيها دگ جرس الشقة.. اخذت جنطتي سحبت نفس وفتحت الباب وتصنمت بمكاني.. يمه شو هذا طويل حيل! دقيقة داسم ريحة كلونيا هذا مزين؟.. زين هو شبي لابس كله اسود اليوم شكو منو مات.. وج تاج اصحي تنفسي اكيد صرت حمرة هسه وهذا رافع تك حاجب ويباوعلي شنو شبية!.. طگ اصبع بوجهي