رِحـلـــةُ قلبـيْ

العُـراق

انا بلياك اذا ارمش الك تنزل الف دمعة
واذا انتنفس بدونك الك وي النفس وجعة..

.
.
.
.

-شنو؟

-للعراق!

-آسِر! تريد تعوفني وترجع مرة ثانية! والله اموت اذا سويتها مرة ثانية اموت اموت فاهم!

حسيت بخنگة صارت ببلعومي من تخيلت يرجع يعوفني مرة ثانية.. وهو ضحك وكأن الوضع عادي عنده وگام تقدم اتجاهي واخذ الملف من ايدي..

فتحه وطلع ورقة الفيزا وطلع ورقة ثانية مثلها وخلاهن گدام وجهي وهو يأشر على كتابه موجودة بالورقة..

-اقري شمكتوب هنا..

-اسمك

-زين وهنا

-هذا اسمي!؟

-حبيبتي شو صايرة ماتستلميها بسرعة؟

-شنو آسِر فهمني ترا دخت!

-بزونة غبية حنرجع اني وياج للعراق

-ها؟

-ومن اگول غبية تلوميني..

ضليت صافنة من گال حنرجع اني وياج للعُراق مثل ميگول هو.. شوكت هاي وليش نرجع ومن يمتى مخطط لهالشي

-ليش نرجع؟

-ماتريدين اخطبج من اهلج رسمي؟ بكيفج

هسه يالله ربطت عدل.. ضليت صافنة عليه وهو رجع وگعد بمكانه وكلا كأنه.. من استوعبت عدل صرخت

-آسِر صدگ دتحجي!

-اي والله

رحتله ركض وشمرت نفسي بحضنه وهو ضحك وحاوط جسمي بأيديه وباس راسي واني من خنگتي مگدرت احجي رغم ببالي هواي اسئلة..

-نرجع اني وياج وتروحين لأهلج واجيبلج حتى شيخ عشيرتنا لباب بيتكم واسويلج مشية اخلي الناس تحجي بيها سنين..

يحجيلي شلون حنرجع للعراق ويسويلي المشية واني كل هذا ممصدگته.. شبسرعة.. والاهم من هذا.. وشركته وجامعتي !

-آسِر.. وشركتك!

-دبرتها عمري.. يجيج الصافي

-واني وجامعتي شلون!

-شلون ياعمري قابل نضل هناك بعد منرجع.. اخطبج رسمي.. واذا الله راد وتسهلت نتزوج هناك ونرجع نكمل هنا سوه كـ زوجين

رجف گلبي من گالي نتزوج هناك ونصير زوجين.. ويحجي ويباوعلي بنظرات عميقة خلت كل جسمي يرجف لهالفكرة.. رجعت حظنته واني متشبثة بي.. ماعندي حجي اگوله وماگدر احجي من صدمتي وفرحتي بنفس الوقت..

ورا فترة سألته

-زين شوكت نرجع؟ و وصلت خبر لأهلك؟..