رِحـلـــةُ قلبـيْ

الأيام الأخيرة

اربعينچ بشر
بس انتِ حوريّـة...

.
.
.

فتحت عيوني واني احسني فاقدة الذاكرة.. هاي شلون نمت هنا وشصار بية وليش دنيا ضلمة والاضواء مطفية... مديت ايدي للتيبل لامب الي على الميز وراي وفتحته.. هاي اني بالصالة ويمي كومة ادوية وابر.. ايدي بيها كانونة ومشدود بيها مغذي خالص.. فلتت صوندة المغذي وگمت على حيلي.. حسيت بدوخة بس شوي وراحت.. عطشانة كلش.. ماما فارشة فراش يمي بالگاع ونايمة.. رحت للمطبخ شربت ماي وباوعت للساعة.. عزا! ب ٣ بالليل واني من امس ١٢ لحد هسه نايمة ومامحاجية آسِر وميدري! هسه يرجمني.. صعدت على كيفي للغرفة اجيب الموبايل.. فتحته وجان اشوف طن اشعارات من آسِر وتبارك من كب البرامج الي عندي.. ومخليته صامت..

والله هسه شلون حيصدگني آسِر ماعرف..

دخلت عالواتس حتى اتصل بي واشوف رسائلة الي تعدت السبعين..

-وصلت حبيبتي..
-وينج
اتصال
-ليش متردين
اتصال
-بعدج نايمة
-ردي مو طيحتي حظي
اتصال
-تاج اذا مرديتي خلال ساعة اتصل بأمج..
-اني اعلمج بسيطة
اتصال
-اذا ما اطلعهن من عينج وحدة وحدة ما اتسمى ابن ابوي..
اتصال
-العرس بعد شهر مبيها مجال..
اتصال
-حدگ على امج..
-مريضة يروحي..
-واني اگول زعلانة وافكر شگلتلها وزعلت
-بية ولابيج يروحي انتي..

وآخر رسالة چانت قبل عشر دقايق
-شلون علمتيني ما انام الا على صوتج وانتي عايفتني هسه.. گلبي محترگ عليج شسوي اجيج؟

رديت عليه
-لا لاتجي

شافها بسرعة واتصل.. رديت عليه

-هلو
-هله يروحي شلون صرتي.. ليش ماگلتيلي
-والله اني ماوعيت على نفسي واني مريضة حتى صارلي يومين نايمة وستوني گعدت..
-خابرت امج وكالت مصخنة ونايمة ومخلد حاول هواي حتى گدر يسيطر على حرارتج.. كون بية ولا بيج..
-اسم الله عليك هي صخونة وراحت مابية شي هسه وحتى صعدت لغرفتي حتى اخذ الموبايل واطمنك..
-يگلبي انتي.. اكلي زين ونامي واخذي حبوبج عالموعد اريدج بعافيتج يوم العرس..
-تطمن اجيك حتى زايد وزني..
-وهذا المريود
-اي حتى اصير مضحكة للوادم... تاج الي محافظة على وزنها ورشاقتها تسمن بوقت العرس..
-وانتي شلج بالوادم اني راضي ومكيف..
-مكيف لو تبريد
-حبيبي الصخونة ضاربة على راسج روحي نامي واني اخابر مخلد ياخذج لدكتور زين..
-يعني اني هسه مخبلة؟
-لا يعيوني شاخطة شوية..
.
.
ضلينا نسولف وماحسينا بالوقت لن مأذن الصبح.. سلمت عليه وراح يصلي وينام.. واني نزلت حتى اشوف ماما اكيد تگعد للصلاة اخليها تسويلي اكل جوعانة..

نزلت لگيتها ستوها گاعدة وتدور علية.. تطمنت وراحت تصلي حتى تسويلي اكل..

صليت وانتظرتها واكلت وهي تسولفلي شلون جنت مصخنة حيل واهذي ومخلد تعب حتى خفض حرارتي حتى منام وهو عنده خفر