رِحـلـــةُ قلبـيْ

لِـي

ضَحكتچ عِافيه لگلبي ..
اريدچ طلبه من ربَي ،
فِداها .. شحلاها .. سبتني .. شجاها
وآنه بغمازتچ مسبي .

.
.
.

-شنو آسِر..

-يعني تسوين نفسچ غبية؟ لچ انا طرطور گدامچ هنا؟

-حشاك

-اني شحچي!

-شنو گولي سويت شي خطأ اني؟

-وكل هاي الفرة والروحة للنجف من الصبح لليل واني ضال الوب وحدي هنا اگول قهرتها وزعلتها وماسويتي خطأ!؟

-اي ماسويت خطأ اني.. انت گلتلي وين متردين تروحين هالاسبوعين روحي ولحگي تجهزين روحچ لو نسيت ها صح يطبني مرض وين ما اروح مو؟

-تااج! لاتستفزيني.. گلت روحي وين متردين بس غير تگوليلي! شنو اني رجل مال كرسي وراكنتني وكت العازة؟

-انت شمدريك رحت؟

-وهذا الهامچ مو؟ تردين تعرفين منو گالي؟ يعني لو مادريت ماچان گلتي اصلا!

-لا بس

-بس شنو؟ ها بس شنو يلا هسه اريدچ تبرريلي شنو الخلاچ ما تگوليلي هسه

-انت! اي انت!.. مو گلتلي روحي وين متردين؟ هاي اول شي.. وثاني شي اني مو عساس يطبني مرض وتخلص مني؟ شو رجعت تخابر وتتعارك لأن رحت وي مخلد وماما ازور واجهز للعقد؟ علمود هاي؟ تمام مرة ثانية من اريد انزل من الغرفة ادزلك رسالة انزل لو لا استاذ آسِر.. من رخصتك

سديت الموبايل واني احس اختنگت من البچي.. ماعرف شلون حچيت واني اناشغ واذا اصلا فهمني لو لا ولا عرفت ردة فعله لان سديته بوجهة..
غطيت نفسي باللحاف كلي واني ابچي من الحرگة.. ضايجة منه وعليه.. اول مرة بحياتي اشوفه هيچ يحچي وياي واول مرة انام بدون مايگولي احلامچ اني! لو تصبحين على خير..
اباوع للموبايل.. لا رسالة ولا مكالمة منه وصار ساعة.. مادري شلون نمت واني اباوع لأسمه وصورته عالواتساب انتظر منه ولو نقطة حتى ابادر اني واعتذر منه لو ابررله.. بس منو گاله؟ مستحيل تبارك لأن واني احجي وياها هي جانت دتريد تنام منين وصلله الخبر..

ثاني يوم گعدت اباوع الساعة ٨ الصبح والبيت هدوء.. ماما اكيد طالعة للخياطة تسويلها البردات ومخلد نايم..
احس عيوني ماينفتحن من كثر ما منفوخات وحمر يحرگني حيل.. گمت غسلت وجهي ونزلت ادور على قطرات لعيوني.. شفت وجهي بالمراية واجيت ابچي من الخوف.. هاي اني شمسوية بروحي.. هسه يگعد مخلد ويشك لو تجي ماما ماتهدني الا تعرف شبية شگوللهم.. لگيت قطرات خليت وطلعت القوري اسوي چاي.. راسي موتني والبراسيتول ميفيدني الا بندول وماعدنا.. وين اروح هسه..

مشطت شعري وعفته مفتوح ورحت وگفت گدام السبلت الكنتوري ووجهت المراوح عليه.. حر حر موطبيعي رغم هسه دنيا صبح وشمس لسه مطالعة.. واگفة گدام السبلت ودشداشتي الوردية برسوم لولو كاتي قصيره لركبتي تطير واحس بالانتعاش..