رِحـلـــةُ قلبـيْ

لـقــاء

تغيبون وصوركم تضل
مرسومة بين عيوني...
الناس العواذل والزمن
ماگدروا يغيروني...
.
.
.
.

گاعدة بمكاني المحدد بالطيارة وبالي بغير مكان... بالمكان اللي متوجهة اله والمرحلة الجديدة من حياتي..
بدت الافكار السلبية تتزاخم بعقلي بس نفظتها واني اتذكر السنين الي ما اسميها معاناة وانما تطوير وتقدم نحو الهدف...

اني مو نفسي تاج الي قبل ٣ سنين وشهرين...

بهاي السنين تغيرت هواي... من البنت المراهقة الطايشة ام الظفاير الي ما تعرف تتصرف صح و اي شي تخلي ببالها تسوي إلى البنت الهادئة الرزنة الي تحسب لكلماتها حساب البنت الي تعبت على نفسها من كل النواحي ونجحت و وصلت للي وصلته هسه...
سنتين بالسادس بس حتى احصل المعدل الي يخليني اطلع خارج العراق و لـ كندا تحديداً
قبل چنت اگول اروح لكندا حتى بس اردلي گلبي الضايع
بس هسه لا..
بعد التعب التعبته صار عندي بدل الشغلة شغلتين...

آني تاج علي
عمري ١٩ سنة
من القادسية
حبيت شخص من اقرباء امي الي من بغداد من لما كان عمري ١٤ سنة... حتى انصدم بعد سنتين ان الشخص الي عشقته بكل طفولية واحاسيس بريئة انه ترك العراق وماممكن يرجع الا بعد ٧ سنوات اقل شي حتى يكمل مشروعه...
واني وبعد ما سمعت الخبر اتخذت قرار يمكن هو القرار الوحيد الي صممت عليه ومشيت عليه من مراهقتي حتى عمري هذا وكان عين الصح...

اخرجني من صفنتي صوت المضيفة وهي تقدم طبق الغداد مدري العشاء الساعة هسه ٤ العصر بتوقيت العراق قبل ساعة قلعت الطيارة بعد ما ذبيت طن دموع بحظن امي...
امي هي الشي الوحيد من بعد اخوي راح اشتاقله بالعراق
والدي كان عقيد ركن سابق استشهد سنة ٢٠٠٣ بسقوط بغداد چنت صغيرة بوقتها بس رعم قلة الاحداث الي تجمعني بي فقده يسببلي غصة بگلبي... وبعدها رباني اخوي مخلد الي اكبر مني ب١٠ سنين هو وامي تعب علينا وشقى الى ان وصل وهسه هو دكتور معروف...
ماعندي صديقات او نگول چان عندي بس اكتشفت نفاقهن وكذبهن من وراي بعدها اعتزلت الصداقة لأن صدمتي بيهن اثرت بية كلش...

كملت غداي الي چان عبارة عن سلطة دجاج وعصير برتقال وقطعة توست وككو شوية.. بعدني جوعانة اكلهم مال عصافير.. تذكرت ماما مخليتلي بالجنطة قطعتين توست وجبن مثل متگول هية *تجوعين وتگومين تبچين*
وهي الصادگة لان اني من النوع الي اكل وما اشبع ولا اسمن
يمكن على اكلي هذا اصير مثل البرميل بس بعدني محافظة على رشاقة جسمي الي نادرا ما يتعدى ال ٥٥ وطولي الي توقف من لما جنت ١٦ سنة وضل هو هو ١٥٩سم...

اكلت التوست اخذت جنطتي ورحت على حمامات الطيارة... غسلت وعدلت حجابي الي تورطت ولبسته بدون كاب وهو جرجيت وكل شوي خارط..
چنت لابسة بنطلون بويفرند بلوز ابيض وسترة اوفر سايز كابوي اسود وترانشوز عالي اسود وشال بيجي..