رِحـلـــةُ قلبـيْ

يوم لطـيف

قد يستغرق الأمر عاماً
وقد يستغرق يوماً..
لكن ماهو مقدر لك
سيصل إليك تمامـاً ...

.
.
.

رجعت لغرفتي واني افكر مخلد شلون حيعاقب آسِر وشيسويله؟ بين التفكير بهاي السالفة وبين الدراسة نمت واني عالكتاب وگعدت على صوت المنبه واحص رگبتي متشنجه من النومة الخطأ.. طفيت المنبه ورحت غسلت وطلعت لگيت مخلد نايم بسابع نومه ماگعدته خطية على كيفي سويت توست جبن ومربى وگلت اشتري گهوة من كافتيريا الجامعة.. رجعت بدلت ملابسي لبست قاط كامل بلون ماروني بلوز رگبة اسود شال ابيض جنطة بيضة وبوت عالي ابيض.. مكياج خفيف وطلعت من الشقة وانب امشى على اطراف اصابعي..
مر اليوم الدراسي بهدوء عدا الكويز الي خطت وخربطت بي... طلعت وي سمانثا كالعادة ودعتها واجيت اروح على محطة الميترو حتى ارجع بس صوت هورن وواي وگفت وشفت بالسيارة آسِر ومخلد الي يأشرلي حتى اجي.. صعدت السيارة

-هلاو اخي الدكتور

-هلاو اختي الطالبة الجامعية الي طلعت وماگعدتني

-موزين علية شفتك نايم تعبان وانكسر خاطري عليك.. ماگلتلي هاي شلابس شنو وين رايحين..

حچه آسِر بهدوء وهو يسوق

-غابات كيبيك..

-اليوم يوم الشواء

-صددگ! الله ذاك اليوم چنت اخطط وي سمانثا نسوي هيج حفلة شواء سوه

-سمنت منو هاي ادور

-سمانثا سمانثا شبيك صديقتي

-هاا.. ديلا سكتي نسمع اغاني علما نوصل..

بدوا يطلعون اغاني كل واحد على ذوقه واني بس صافنة عليهم.. اخير شي ربطت موبايلي وهمة صفنوا علية.. اول شي اجت عيني عليه اغنية لسعد الحلي دائما اسمعها.. سمعوها همة وجنها عجبتهم وبالأخص آسِر اللي طلع جگاره وفتح جامات السيارة وانطلق بيها.. الطريق چا نسبيا طويل واني چنت نعسانة كلش رچيت راسي على جام السيارة ومديت ايدي العب بشعر مخلد من ورا وساعة اسحل اذنه وساعة شعره وهو كلش يتنرفز من هالحركة الى ان لزم اصبعي وحسيته حيگطمه وخرته منه واني اخزر بي وهو يردلي الخزرة من مراية السيارة.. وخرت عيني عن المراية وصارت عيني بعين آسِر اللي مخلي الجگارة بحلگه وطالعة اغنية انا وليلى لكاظم الساهر.. ماعرف شلون ولشوكت بس عيني رفضت انو اوخرها عن عينه وهو كذلك.. كلشي مر وياي وياه اجه گدام عيني.. من اول لحظة شفته بيها بالمطار الى اخر لحظة مرت علية وهي قبلاته الي ماعرفت شأسميهن  وبأي ركن اخليهن.. نزلت دمعة من عيني ومسحتها بسرعة واني انزل راسي واطلع بالموبايل واختار اغنية *على حسب وداد* للعندليب عبد الحليم حافظ..

شوي و وگف عند محل يبيع احتياجات الشوي كاملة ونزل هو ومخلد راحو جابو منقلة فحم وسياخة ودجاج ولحم معلب متبل خاص بالشوي و طماطة ومواعين سفري..