رِحـلـــةُ قلبـيْ

عودة

كلما ذكرتك تبتسـم امسح دموعي وابتسـم..
حظ اللي انت بينهم واللي يشوفونك..
كاسرنـي بعدك واغترف ماني بگد فراگـنا ...

.
.
.

-مشتاق..
لضحكتج.. خجلج من اصيحلج ام جناغ.. نظرات عيونج وخوفج عليه.. وشعرج.. سوالي علة بگلبي

-اسم الله على گلبك

-اسم الله عليج من عيني ونظراتي..

بلعت ريگي وحجيت واني احسني ارجف من التوتر والخوف بسبب جوابه

-آسِر

-لا تسأليني تاج.. اني بنفسي ماعرف واذا سألتيني راح اضعف اكثر.. ارجوچ لاتحجين لهالموضوع.. خليني اشبع شوگي بصوتج عالاقل

مايريد يجي.. ولا اله نية بهالشي.. هذا اللي عرفته..

-واني؟.. اني شلون؟

-احجيلي.. سولفيلي واسأليني دوم حتى لو اشياء بسيطة..

مادري شنو اگول بهاللحظة.. هو مشتاقلي واني الشوق يذبحني بس يكابر يرجع..

ماعرفت شسوي غير انو امسح دموعي واغير الموضوع وابدي احجي وياه بأي شي يخطر ببالي.. حتى مادخلت للمحاظرة الاولى وخلصتها بالحديقة احجي واحجي لحدما تعبت..
اخر ربع ساعة ماسمعت منه اي رد وگلت يمكن نام لأن ليل عدهم هسه..

همست بصوت ناصي
-انت مشتاگلي صح.. بس مو كثر شوگي صدگني.. تصبح على خير يا آسِر گلبي

وحرت الموبايل عن اذني وعلما اجيت اغلقه سمعته يگول *وانتي بخير ام جناغ*

سمعني.. اريده يسمعني بعد اكثر واكثر.. ماريد اضم عليه شي بعد.. تعبت بما فيه الكفاية من الكتمان والصبر.. اريد احجيله شلون حبيته شلون كلشي بي يجذبني وكل عاداته وتصرفاته حافظتها عن ظهر قلب.. هو آسِر گلبي الي ماحبيت واحد غيره.. هو حب الطفولة والمراهقة والشباب.. هو انيسي وكت الليل وبطل احلامي وقصص تالي الليل..
هو كلشي..
هو كلهم

من بعد هالمكالمة رحت للقاعة وكملت المحاظرات ورجعت للبيت.. الجو بارد كلش وبدت تمطر وضباب وانسدت الطرق كلها.. وعاداتي بأوقات البرد القارص هيج هو ان افتح التدفئة وگهوة واضوية قليلة واغاني هادئة.. كلش احب حسام الرسام واغانيه وصوته.. من غير حبي لـياس خضر طبعا وكل الاغاني القديمة اعشقها حيل.. تذكرت بهيج اجواء دائما اني ومخلد نسوي راشي ودبس وخبز نحمي عالصوبة ونگعد ناكل وماما ترزل بينا لأن حاظنين الصوبة وگاعدين.. صوتي نوعا ما حلو.. واذا اظرب اكثر يصير بعد احلى..هيج سالفة فطرية او وراثة من بابا الله يرحمه.. چانت ماما تگولي ابوچ هواي يغني ويحب اغاني قبل ف يمكن اكتسبت هالصفة منه.. بينما مخلد صوته دمار وبعد اكثر مني خصوصا بالمواويل..
مخلد عاش ٨ سنين ببيت جدي بالبصرة علمود دراسته هناك وجان بالشهر مرة يجينا.. فـ تشوفونه لهجته اقوى من لهجتي الجنوبية..
قاطع تفكيري والاغنية الي مطلعتها صوت الموبايل وهو يدگ.. برقم آسِر..