اغصان تتحرى البليل

١٠

السلام عليكم

اغصان تتحرى البليل
الجزء العاشر

صدريتج مشكوكة وساقج وفخذج كله طالع..
فتحت عيوني بخزره وانت شكووو تباوع..فريت وجهي
ليورا اريد اشوف الصدرية..من باوعت للشك صخنت..
ياريت بس فتح لا مشكوكة القماش عايف الخياط
ومتبسل..

كمشتها بيدي ودرت عليه..اي يلا كتلي بعد
روح منا لا تبقى تباوع..اريد اكمل مشيتي ووكفني..
هووب ..درت عليه وانا عافسة وجهي..
باوع ورافع حواجبه بأستهزاء..وانت بهذا
وضعج راح تمشين؟؟
انت معليك وراي امتحان وراح اتاخر عوفني بحالي..

مشيت خطوتين وانا كامشتها من ورا حسيت الشك
زاد..
جمدت بمكاني ..هو جان بعده واكف ماصاعد
بسيارته..
بسرعة درت وجهي عليه ..ماردت انطي ظهري
لان شكلي من ورا ماينحجي..حزت بنفسي كلش..
وضعيتي وموقفي  مااتمناها لعدوي..

هو جان منتجي ع السيارة وايديه بجيوبه ويباوع
بقمة البرود..
طلعت حركتي كلها بي..انت شعدج واااكف هااا؟؟
شنووو واكف تتفرج؟؟؟
وخر منا اريد ارجع للبيت مدام الشارع فارغ..راح
يفوتني الامتحان..

لا بربج!يعني انت مشيتي خطوة طكت تنورتج ..وكل
ماتمشين تطك بعد..ع هالحال
واصلة لبيتكم بس القميص..
خزرته ونترت..احترررم نفسك فاااهم؟؟
لسانج واحترمي نفسج حتى الناس تحترمج..حجاها وباوعلي
من فوك لجوا..

اندار لسيارته وحجه..كدامج سيارة صعدي اذبج
بيابكم ولحكي بدلي وروحي لدوامج..تردين
كان بها ..ماتردين ابقي بهذا وضعج ..
بس مانصحج تمشين هيج..الساعة صارت سبعة وعشرة
والناس كلها طالعة لدوامها..يعني الشارع بدا ينترس..
بس بعد اذا مقتنعة تمشين هيج براحتج..

فريت نظري يمين يسار..صدك الناس صح قليلة بس
موجودة بالشارع..واصلا هسه اليشوفني واكفة
ويا هالوكفة شراح يحجي..
هزيت راسي وانا باعدة عيوني عنه..وصلني لبيتنا بس
بكروة..
صفن بوجهي نظراته معناها لا بلة..حجه يتنهيده..صعدي صعدي..

فتحت الباب الورا وصعدت ..كعدت كلش بطرف
الباب ولازمة اليدة..
هو عدل كعدته وباوع بالمراية جانت تعكس بس ع حلكه..
لا تكسرين اليدة يمعودة شبييج..
دمشي بسرعة فضها عندي امتحاااان تعرف شنو امتحان
وترى بيتنا ذاك دقيقتين احنا يمه بسرررعة..

طفى السيارة وعدل المراية..اجت عيوني بعيونه..
ملونات هيج عسلي والاطار مالت عينه زيتوني
مادري لونهم يحير..جان بياض عينه بيه احمرار
مثل النعسان او كاعد من النوم ..
من التقت نظراتي بنظراته مانزلتها..ماردت ابين خوفي..

وطبيعتي انا دوم احط عيني بعين اي احد ماهتم..
بس هو ثواني ماطولت..لان نظراته استفزتني..
باوعت كدام وانا احجي بعصبية..اشووو وكفت؟؟؟
عربنچي مال الخلفج لج شنوو!