اغصان تتحرى البليل

٢٦

مساء الخير

اغصان تتحرى البليل
الجزء السادس والعشرون

اشوف امي تحجي من ورا الباب..مو هنا ابو فيض
ماموجود..
تقربت يمها سالتها منو؟
ولج يمه يسالون ع ابوووج..
واسمع الرجال البرا حجه..لاخر مرة اكلج حجية..لو يطلع
لو ادفرر الباب هسه..حجه بعيطة وصوته جان
مو صوت جبير يعني امبين بعمر صفوان..

امي اصفرت وبقت ترجف..وخرتها ومديت راسي
من الباب..جان واكف وناطي ظهر..
انت ماعندك اصول ماتكول بيت والته حرمته
ونسوان وحدها شلون تجي تتهجم ؟؟
اندار ووكف صار كدامي..باوع من فوك لجوا..

احترمي نفسج..وخلي ثابت يطلع لا يلبد
مثل النسوان..
مو هنا اخذ جنطته وطلع ماندري بي وين..تصدك كيفك
ماتصدك ادخل ودور بالبيت..
وين راح يعني؟؟؟حجه باستغراب..
ماندري وين راح ولا تجون يومية داكين الباب تردون ثابت
دور عليه واخذو احنا معلينا..كملت حجايتي وسديت الباب..

رادت تحجي امي اشرتلها تسكت ووكفت اتصنت..
اسم واحد يحاجي بس مااميز الصوت..
لحظة..هذا صوت باسل ..لزكت اذني بالباب اريد
اتأكد..اسمعه يكله يلا توكل ماوصيك كبل للمركز..
بعدني جاي اتصنت واندك الباب ..صارت الدكة بذاني
طفرت رجعت ليورا ..

امي لزمت ايدي..شكو يمه..
صبري يمه هذا صوت عم البنية الادرسها ..حجيت همس..
باوعتلي امي باستغراب..صبرري خنشوف شيريد ..
صارت ع جهة وانا فتحت الباب..
صار كدامي ..عيونه راحت لعيوني..حجه بنظرات
مبتسمة..عكس ملامحة الباردة..شلونج..
ههلاو..

هذا الدوا ليش كاتبه الج غزوان ليش ماجبتي مو مريضة
ليش هالاهمال لصحتج..
بلعت ريك وسكتت..منظره بذاك اليوم مايروح من بالي..
اتذكر كعدته وقهره وهو يحجي..مثل طفل وضايع
من امه..

يمكن نظراتي وملامحي خلته يحس ..جر نفس وحجه..
شلون صرتي؟
يعني احسن..بس انا نسيت اسماء الدوا بدفتر
ريما وماشتريت..
اي هي كالت نسيتي بدفترها ..
ا..شوفي ..هذا الجاي ع ابوج هسه انا كتله روح
اشتكي عليه بالمركز..فهمته ع اساس انا ابن خالكم
وهسه عرفت بالخبر..انتو شنو محد يمكم؟؟

ليش؟؟
حجه بطرف عينه من سؤالي..حتى احاجي صفوان
نشوف حل..
ها..لا  ابوي راح ومانعرف وين..
ماشي دخلي هسه ولا تفتحون الباب لاحد..حاولي
تخابرين عم او خال تنطي خبر ..
اشوف..يلا من رخصتك..
هز راسه ويباوع بصفنة..

سديت الباب ودرت لامي..
باوعتلي وتحجي بيأس..الغريب يايمه يحن علينا
ويسأل والمنا وبينا عايفنا..ينطي العافية جايبلج
دوا..
ايي مو ابو الطالبة دكتور وهو كتبلي وصفة وخطية
كايلة لعمها يشتريلي ويجيبه نعم الله عليها..
الله يستر عليهم ومايحوجهم لاحد..

يمه سمعتي حجيه.؟؟كايل للرجال اشتكي..
ادري يمه بلا مايكله هو راح يشتكي اصلا..يمه محد
يسكت عن حقه ..
الله كريم تهون..راح اخابر عمي واحجيله كلشي
كيفهم يجون مايجون بس المهم عدهم علم..
كيفج يمه كيفج..