اغصان تتحرى البليل

46

صباح الخير

اغصان تتحرى البليل
الجزء السادس والاربعون

وامك خذت ابوك بلا رضا جدك وعمامك لان
ابوك جان مسيحي..
رفع راسه باسل وباوعلها بعيون متسعة ونظرات
مصدومة..صارت عيونه عليه حسيته يستنجد بيه
رغم مكابرته..
نزلت وكعدت كدامه ولزمت ايده وانا مبتسمة..باوع
بصفنة ونظرات مستغربة..

كملت كلامها الحجية..ابوك رجااال يمه وخوش
رجال..احجيلك السالفة من يوم راد امك واجت
كلتلي..
يمه خطبني ولد وياي وخوش ولد ويحبني..
اي يمه بيها الخير خلي يدز اهله..
يمه مايقبلون يجون بس عمته تجي ويا!
ليش يمه؟؟؟
مو هو مسيحي بس..بس صار مسلم يعني ..
شلون صار مسلم ؟؟هيج من كيفه يعني طلع
من دينه واهله؟

ايي يمه على مودي صار مسلم ..يعني حب
الدين واقتنع بي ..
بس ابوج واخوانج مايقبلون يمه لا تورطين روحج..
لا يمه انت قنعي ابوي انت حجايتج ماوراها حجاية..
واخواني ماعدهم اعتراض اذا ابوي قابل..
ابوج شلون يقبل بواحد اهل ماقابلين بي؟؟
يمه انت يسمعلج حاجي عفية..
خوش يمه يصير خير..

انا هم ياماما رحت وحاجيت جدك..بس هو راسه
والف سيف لا..قنعت ردت حجيت وهو حجايته
ماتتثنى..
يا ابن الناس اقبل بي والك اجر..من دخل للاسلام
وارتبط ببتك يعني راح يصيرلك نصيب بتعليمه
للدين..ومنها يصيبك اجر جبير..
كتلج سدي الموضوع وماينفتح كدامي وهم وصلي
خبر لبتج تشيله من راسها..

سمعت امك وكامت تكت الدموع ارباع ارباع ..
تمرضت لا هي باكل لا هي بشرب..صارت خيال
من الضعف ..
وماقتنعت وخلته يجي هو وعمته ويخطبون..جدك
كلهم ماانطيها ..يعني عمام ابنها وعماته مو نفس دينه؟
جده وبيبيته من دين وهو من دين؟؟!شلون صايرة
هاي بلة؟
رجعهم وكلهم لا توصلون بعد لان حجايتي وحدة وماتراجع..

مرت فترة وامك تمرضت بالتيفو بس شنو رادت تموت..
كلت لابوها اذا متت خطيتي بركبتك..
وهي العزيزة عنده ومايوم رفض شي لو قصر وياها
بشي بس هالموضوع هذا..
عاد بوكتها كلها لو تموتين هم مااحن واقبل تتزوجين..
زعلت عليه وبقت سنة لا تحاجي ولا يحاجيها..يجي
يمي بالغرفة حتى بجي يبجي لان هيج صارت
ويا ويتمناها ترجع بنيته الحنينة ..بس كدامها لا قاسي
وجلد ماينكحم..

بواحد من ايام رمضان ..هيج ورا الفطور بساعة
اجونا ناس..زلم معكلة ومعممة ووياهم المؤذن
مال الجامع اليصلي بي جدك..
جايبهم ابوك وجاي يخطب..وهم حجي ومحاولات
وترغيب والمؤذن كله الولد صايم توة اجه يمي بالجامع
فطر وصلى واجينا ..وانت المفروض تشجعه
وتفتحله بيتك وتحببه بالدين وتنطي بنتك بدون مهر
يكفي مهرها الشهادة..

عاد جدك وافق..بس كلهم ياخذها وبعد ماريد
لا اشوفها ولا اشوفه ببابي..اليوصل منهم لبيتي
ارمي وادفنه ومحد يعرف خبره..
عمت عيييني..فرحت امك فرحة وكالت ميخالف
لاجله ويستاهل..
وعقد عليها وخذاها لا زفة لا هلهولة..لان جدك ماقبل
واهل ابوك هددو ابوك..اذا سويت عرس نكتلكم
ثنينكم..جانو اهل ابوك رافضين الموضوع ومهددين
ابوك يكتلونه..