اغصان تتحرى البليل

٣٣

مساء الخير

اغصان تتحرى البليل
الجزء الثالث والثلاثون

باسل شسالفة خوفتني!؟
لا لا ..تخافين شنو ..بس يعني انا مو اختصاص
ماعرف شلون اشرحلج..خلينا ندخل للدكتورة
وهي توضحلج ..بس مو شي يخوف يعني
كيس ع المبيض..

لزمت بطني بالم وغمضت..زين شنو علاجه
هذا كلش تدمرت من الوجع..
تنطيج علاج ويروح..بس رجعي ظهرج لورا
وارتاحي لا تضغطين ع بطنج..

رجعت ظهري ع الكرسي وانا كاتمة الوجع
لو ماعيب جان بجيت..
راح هو حاجة السكرتيرة ورجعلي..يلا تعالي
ندخل..
حط ايده ورا ظهري ومشيت ع كيف..حتى من
ادوس بطني توجعني..

دخلنا للدكتورة..وهو سلمها الفحوصات..
بقت تباوعلهن بتركيز..هو كاعد بالكرسي اليمي
مد ايده لحضني لزم ايدي..شديت ع ايده
وانا احس بوجوده وياي انطاني امل وقوة..
رفعت الدكتورة نظرها النا وابتسمت..

لهفة تحاليلج زينة..بس عندج كيس جبير
ع المبيض..والمفروض ينشال بس ماراح
نلجأ للجراحة هسه..نعتمد ع العلاج والحمية
ونشوف النتائج..
تاخذين هذا العلاج وبعد ثلث اشهر نرجع
نسوي فحوصات ونشوف..

اخذ باسل منها الوصفة وشكرها..وحط ايده
ورا ظهري وطلعنا..
حجى وهو يمشي تجاه السيارة..روحي كعدي
وانا اجيبلج العلاج لا تمشين وتتاذين..
لاا شلون غير انا اجي وتفهمني عليه..
عود انا افهمج مو فد مشكلة..فتح الباب الي
صعدت..انطاني السويج..هاج خلي يمج
وقفليها هسه اجي..

قفلت السيارة وكعدت انتظره..مخلية راسي
ع الكشن ومغمضة ..احس الالم بكل جسمي
مو بس بطني..سكن جسمي وهدأ..اندكت
الجامة..نزيت..باوعتله باسل يبتسم..
فتحت السيارة وصعد..

بعدج متاذية؟
ايي كلش..
يلا مابقى شي نوصل واخذي العلاج
واضربج ابرة تنامين ترتاحين..
منو يضربني لعد خل اضرب هنا قبل
لا نروح..

انا اضربج لان دواها حار لازم تتمددين
وترتاحين..
سكتت ماكدرت اجاوبه..رجع حجه بهدووء..
مساع اجيت كالت امج نايمة بغرفتي..
ممم..جنت تعبانة وهمام يريدني ابقي ويا
ورحت بيها نمت..

ابقي نامي بيها احسن جرباية واسعة
وتاخذين راحتج..
لا اصلا مااحب المكان الواسع احب اندحس..
ايي اندحسي بيه..
بلعت ريك وسكت..
هه..ضحك باستهزاء لان ماجاوبته..بقى يسوق
بسكوت..

وصلنا وصعدنا كبل للشقة..امي ماموجودة
امبين نازلة جوا..
كعدت ع القنفة ومددت رجليه..هو حط علاكة
الادوية ع الطبلة وراح للحمام..
جريت العلاكة جاي اباوع للعلاجات كومة
والابر هم..

اجه ومكنف ردانه للعكس..بيده كلينكس
ينشف ايديه..
كعد كدامي ويحجي وعيونه بعيوني..يلا مددي
خليني اضربج..
سكتت ودرت نظري عنه..
لهفة ترى مابيها خجل..انا دكتور وانت مريضة
بعد ليش خجلانة!؟