اغصان تتحرى البليل

44

صباح الخير

اغصان تتحرى البليل
الجزء الرابع والاربعون

فتح باسل الباب وطلع يركض..انا دخلت لفيت
روحي بالعباية وطلعت وكفت ع الدرج..اسمع صوت
صريخ رعبني عبالك جاي يصرخون على ميت..
ماتحملت نزلت وانا لازمة عبايتي ودموعي نزلت
خوف وقلق وهذا الصريخ يذكرني بوفاة اختي..

نزلت الدرج ركض والتفيت من الحديقة..
اباوع بيت غزوان مفتوح والصريخ بي..
دخلت وعيوني تتلفت بخوف شنو الصار ماعرف..
وي دخلتي اشوف الكل يعيط ويبجي!والحجية
وريمة
وامها مكابلين ابنها مدد بنصهم وتلطم تلطم
ع وجهها وغزوان يريد يلزمها وتدفع بي..

باسل شابك ريمة  يريد طكومها وصفوان
حاضن الحجية من ظهرها وهي فاقدة
وتصيح عوفني خليني اموت ويا..
وكفت بمكاني ودموعي تنزل تنزل ..انعاد
عليه يوم فراك اختي..بس هذا الطفل
المسكين شموته!!

باسل سيطر ع ريمة ووخرها من يمه 
وهو يحاجي غزوان..خنحاول ويا غزواان
خنحاول..
جاوبه غزوان بدموع ويحجي مثل الطفل
الفقد امه..شرجعه ولك انا اضحك ع روووحي..
لا نحاول خلينا نحاول..حجى باسل وشبك
اصابعه ثنينهم وكام يضغط ع كلبه..

يضغط بيدي حيل ويطبطب بقبضته ع جهة
صدره اليسار..
اكثر من محاولة وهو مايستجيب..حط ايده
جوا راسه وجوا رجليه وشاله..سنده غزوان ويا
والكل تكابلت عليه وهو يحجي بصوت عالي..وخروو
خل ناخذه للمستشفى نسويله صعقاات..

اخذه كدامهم شايلة وهم وراه..بقينا بس
النسوان بالبيت ..اباوع الحجية حاطة ايدها
فوك راسها وتنحب وتنعي..حضنت ريمة وكعدت 
يمها وابجي وياها سكتة..
هنا مقرفصة روحها وحاضنة نفسها حيل
وتهتز من البجي..حتى زهراء شابكة على امها
ومصفنة..حتى ايات موجودة ومغطية
وجهها بايدها وتنحب..

ريمة تبجي وتسولف..كتله عوف الواير
ماتعرف بابا يربطه كتللله ..لو انا لازمته
ولا هو جان انا متت بداله..الي فهمته
بلك المايكرو خربان ومفلتي مخلين بس الواير
وهو مستخدمة ولازمته الكهرباء..
عاطت الحجية..جيبلي تلفووون ..خلني
اخابرهم ولجججن...

صاحت ريمة ..شتخابرييين ماات ماات
ودو يشرحونه ولج بيبي اخووووووي ...ورجعت تملخ
بروحها ولزمتها..
اريد اصبرها بس ماكدر حقها ماتنلام..
اعوذ بالله الموت شكد قريب من عدنا..

بقينا ع هالحالة وتعبنا من البجي..مرت ساعتين..
ودخل علينا صفوان يركض ومبتسم وعيونه
مدمعة..
رجععع عاااش مااماات..
كلنا ركضنا عليه ونصلي على محمد وال محمد
ومامصدكين شلون رجع وهو انتل ومات..

طلع كلبه بالفعل متوقف بس روحتهم للمستشفى
وباسل طول الطريق ينعش بي حفزه
يرجع يستعيد نفسه..لحد ماوصلو واستخدمو
جهاز الصغقات ورجع والحمدلله..