اغصان تتحرى البليل

١٤

مساء الخير

اغصان تتحرى البليل
الجزء الرابع عشر

شلت همام وطلعت وانا مرعوبة..وجهه ازرك وكوة
يبجي ويكح ويختنك وبالكوة يجر النفس مثل الغركان..
البيت هدوء وظلمة..ركضت لغرفة امي دكيت الباب
حيل..
كمت ادك بخوف متجاهلة ابوي وغضبه من احد
يدك الباب عليه..بس وضع همام خلاني بخوف
وكرر عليه مشهد امه..هذا الموقف اتذكره بهالة
من جنا صغار ..لحد ما ماتت..

فتح الباب ابوي ويصيح شكووو..وامي ورا دفعته
وطلعت..جرت همام من ايدي وانا ارجف واحجي..
يمه همام مدري شبيي..
ولج هذا نفس امه يبوووي ثابت اخذنا حبوبي ثابت..
ادري شبي شنسويله وين اخذج..
مثل هالة امبين مثلها ربووو لو حساسية دشوفه راح
يموت سودة بوجهي يمه..

دخل ابوي يلبس وانا ركضت جبت لامي عبايتها
ولبست واجيت بس مشدوهة واركض وادعي بس
كون يعيش..
اخذنا ابوي وطول الطريق يدردم ويكول انا شعليه
متحمل مسؤوليته تالي عمري وشيب تارس راسي
اراكض بفرخ صغير ..
وماسلمت انا من مسبته ولومه ورزالته..

لحد ماوصلنا للمستشفى واخذو من عدنا جان
مزورك ويكح بتعب وحتى الممه مايكدر
ياخذها ..
بعد الفحص والتجييك والحمدلله حصلنا طبيب خفر
عنده ضمير تعامل ويانا بكل انسانية..
بس التبين همام مصاب بالربو مثل امه..او يمكن
برودة اليوم التشبع بيها هي الحفزت عنده
هالشي او اصلا هي السوت بي ربو لان جان
الجو يكص الخشم كص..

انطو علاج وبخاخ ووصونا ندفي زين ومايتعرض
لمكان بي تدخين او حتى دخان بخور او غيره..
بعد البخاخ استقر همام وغفى ..لفلفته امي وحطته
جوا عبايتها وطلعنا..
طول الطريق دموعي ماوكفت..كل يوم جاي يزيد
الحمل والوضع يتأزم وابوي يزيد قساوة..

وصلنا للبيت جان الوكت بداية الليل..اخذت همام
من امي ورحت للغرفة..
نيمته وتمددت بصفه وانا اسولف وي امه وابجي..
مشتاقتلها حيل وموقف همام اليوم ذكرني بيها وبضيمها..
جانت تختنك وتبقى مجلبة بيه تكلي ماريد اموت..
لهفة انا احب الدنيا احس بعدني ماعايشة ..اريد
اتزوج حتى اعيش ..لان طول مااحنا وي ثابت
احنا اموات...
ورحتي ياهالة وماعشتي..متي بدل المرة مرتين..

بدموع ووجع وحسرات غفيت..فزيت على بجية
همام..
كعدت وانا اشيله واضمه لصدري..عنده
كحة قليلة ووضعه احسن..
قريت حلكي وبوسته بركبته وهو يدور بحلكه
جوعان..
نزلت دموعي على وجهه وانا اضحك..يبعد روحي
جوعان..
كمت خضيتله ممه وشربته وبقيت ادكدك ع ظهره
شوية وغفى..ادري بعلاج الربو يدوخ وينوم..

رجع نام وانا كمت لان جانت ساعة بالخمسة..
نظفت وحضرت ريوك وصليت ..
بدلت وطلعت للهول امي وابوي كاعدين..اجيت
كعدت اريد اصبلي جاي زبر ابوي..كوميي..
باوعتله باستغراب..
جبببح هالعيون..كومي ماكو ريوك هذا عقاب الج..
امي جانت تريد تشرب الجاي مالتها من حجه ابوي
عافت الكوب بالصينية وبقت تباوعلي بقهر..