اغصان تتحرى البليل

١٨

السلام عليكم

اغصان تتحرى البليل
الجزء الثامن عشر

اندفع ياسر وطاح بالكاع..التفتت بفزع..واشوف حسنين
طفر عليه وضربه بوكس وياسر ضربه كله..واجه ناحيتي
وانا واكفة مصدومة من الموقف..
وصل يمي وجره حسنين من قميصه..اندار يريد
يضربه وانا ذبيت روحي
ع ايده جريت البسمار ..عاط من الوجع ووي عيطته
صوت ولد اجو يركضون..

دخلو يريد يفكوهم وحسنين صاح بيه..لهفة روووحي..
هزيت راسي ومشيت سريع..ومادري شنو صار وراي..
البسمار بيدي اباوعله
كله دم ..طلعتلي ورقة ولفيته بيها وحطيته بالجنطة..
وكفت ع الشارع وبيه رجفة من المطر ..ملابسي مبللة
وحيلي مهدود من الوجع..

لشوية اجت سيارة ..صعدت وانا ارجف..كعدت بكرسي
كاعدة بصفه مرة جبيرة..
جانت لابسة عباية وع ظهرها غطوة صوف..شالتها
وحطتها ع جتفي ..باوعتلها بتعب وردت اشيله من ظهري..
لزمت ايدي وهزت راسها..خلي يمه خلييي شوفي
حالج جاي ترجفين ..
لا خالة لا يتبلل..
هزت راسها بهدوء وسكتت ..

شكرتها ولفيت الغطىة ع ظهري عدل واحاول اتدفى..
تنفسي سريع وبطني واجعتني..مغمضة عيوني وافكر
بحسنين بسببي تعارك وي ياسر وخاف تصير مشكلة..
والاعظم الطلاب الموجودين بالفاعة منتبهيلي من اتلفت ملابسي .!
شكد صايرة بيه مواقف بس هذا الموقف محرج
وخصوصا بالمجتمع الجامعي..لو صاير بالمدرسة يهوون...

باوعت للطريق وصلت..صحت نازل وشلت الغطوة من
ظهري انطيتها للمرة..
عقدت حواجبها بعتب وماقبلت ارجعها..بس حطيتها
بصفها ع الكرسي ونزلت..
الشارع العام فايض والسيارات تشخط ..مشيت ركض
خفت تعبر سيارة وتزيد الطين بلة عندي..

مشيت بطريقي للبيت تقريبا المطر شبه وكف ..
بس قطرات ناعمة تنزل..
لاكاني وعد الطالب الدرسته..جان يمشي ومخلي كتاب
فوك راسه..
بس شافني اجه يمشي سريع..تقرب يمي ويحجي
وهو مدنك..تفضلي ست غطي راسج بالكتاب..
حجيت برجفة ..مشكوور انا واصلة للبيت..روح انت
لا تتمرض..حجيت وانا امشي سريع..وهو دنك وكال
مااشي ست..ومشى..

وصلت للبيت بعد عناء..دخلت سمعت ركض
ذبيت جنطتي واريد ادخل للحمام لكيت اهلي يتغدون
بالهول..صاحت امي خيرج وهمام اجه جلب بيه..
بسته وجاوبت امي..تبللت من المطر داخلة انزع
لا اتمرض..
اجت يمي شالت همام وتباوعلي بقلق..
دخلي دخلي هسه اجيبلج هدومج ..

دخلت للحمام وابوي يصيح..كومتي امج من الاكلللل
شماطرة عليج هو ماي قابل جيبير..
وبقى يدردم ويحجي واسمعه يصيح امي تعاي
كملي اكلج..وكفت اسبح وماهتميت لان متعودة ع سوالفه..
دكت الباب امي فتحته اخذت منها الملابس
وسديته..
كملت ولبست وطلعت..

جاي اسد باب الحمام وعاط ابوي..جان مخلص غدا
وبعده بمكانه كاعد..ريحة الشامبووو
وصلت يمي تسدين الباب عبالج ماشمممم..
لفيت شعري ومشيت عبرت من يمه..ترى الشامبو
مابي زدته ماي..
خلصتتتي بت الجللب كصي شعرج بعد شامبو ماجيب
اناااا..
غلست ماجاوبته دخلت للغرفة ولفيت روحي
بالبطانية..