اغصان تتحرى البليل

٥

مساء الخير

اغصان تتحرى البليل
الجزء الخامس

قبل لا يكمل انطته امه علبة الذهب..
امه مرة كبيرة بالعمر وشكلها فقير..
بدا يلبسها وانا واكفة يمها وكل شوي يذب حجاية
وانا اباوعله بنظرات..هسه شتريد!!
مابقى شوية وبناتهم كلوله اطلع نريد نركص..
طلع وعلو الدي جي وشبعو ركص وانا جسمي
بقى يحكني ..شلون اسمع موسيقى وماركص..
بس تحملت ماردت تجيني حجاية خفيفة..

بعد ماراحو اهله وهو راح وياهم مابقى..
اباوع لهالة الفرحة بعيونها ماتنوصف ..
قراببنا كلها راحت محد بقى ..اصلا زين
من اجو لان ابوي يفشل ..اتذكر من جنا صغار وصار
تجمع ببيتنا بعرس عمي..
كلهم كلمن يروح لبيته انا حالتي ضعيفة وماعندي اسوي
غدا لو عشا ..
ومن يومها محد يبقى عدنا ويزورونا نادرا بالمناسبات..

بقيت انا ارتب بالبيت وهي راحت تسبح وتبدل ..
جاي اكنس بالطارمة واندك الباب..اجه فيض فتحه
انا صرت ورا السدرة بالحديقة..
سمعته استقبل احمد..بس هو ماقبل يدخل وانطاه
علاكة كله هذا الفون لمرتي وسلم عليه وراح..

ورا ماسد الباب فيض واجه يريد يدخل انا جاي
الم البطالة من الكاع..
باوعلي وضحك..وينها العروسة جابولها فون..
راحت تسبح وترتاح خطية تعبت..
خوش هاي العلاكة انطيها الها رجلها جابه..
اخذت العلاكة واريد امشي ..حاجاني..
تريدين اشتريلج واحد؟
لا بعد عمري..

واخذها انطيها الها خل اكمل شغلي..
اخذ العلاكة ودخل وانا اشتغل وافكر بهذا وخايفة
على اختي منه..
خاف يطلعون سوا لو يجي هنا ويسوي بيها شي
ويعوفها ..
الله يستر علينا ويهدي الها وعسى ولعل يتغير..
كملت شغلي ودخلت ..لكيت ابوي وامي
وفيض كاعدين..
زاد من الكيك الجابو مساع؟؟سأل ابوي..
اي اكو كيك وعصير هم..
خوش جيبو ناكل ولا تسون عشا..

رحت حضرت الكيك وحطيت ويا العصير وجبته
للهول..
فيض كام كال راح انام مااشتهي..
وامي اخذت قطعة صغيرة وابوي اكل الباقي كله..
انا كاعدة وصافنة..فززني وهو يصيح..هييي راح
اغص حاطة عينج ع لكمتي..
كومي اخذي المواعين غسليها ..
اخذت الصينية وكمت بلا مااجاوبه..
غسلتهن ودخلت للغرفة..

اباوع هالة متغطية وصوت همس..معناها
جاي تحاجي الشفية..
حست عليه دخلت رفعت الغطا وابتسمت..
اي هاي لهفة اجت..هههه لا لا مخنزرة اصلا
مبتسمة..باوعتلها بطرف عيني بقت تضحك..
تعاي سلمي ع رجل اختج..
عود وصليله سلامي..حجيت وتمددت وغطيت وجهي..

بقت هي تسولف ويا وتهمس..عفتهم وغفيت ..
يوم ثاني كعدت ع صوت طكطكة بالغرفة..
فتحت عيوني لكيت هالة جاي تبدل..
ها بسم الله خو ماكو شي..حجيت وانا اتثاوب..
جاولت مبتسمة..
لا رايحين نحلل ونعقد محكمة..تجين وياي ؟
ليش محد يجي وياج؟
لا طبعا امي راح تجي..
الله يسهل عليج حبيبة ..روحو انا راجعة انام..