اغصان تتحرى البليل

١٩

مساء الخير

اغصان تتحرى البليل
الجزء التاسع عشر

درت اريد امشي..صار بوجهي باسل..
واكف بباب غرفة قريبة ع الدرج ومخلي ايديه
بجيوبه ويباوع..
احساس غريب صار عندي..يمكن خجلت من نفسي
لان اعرف بي رايدني ودخلت لبيتهم ..بهاي
اللحظة لمت نفسي..درت نظري عنه ومشيت
بسرعة...

فتحت الباب وطلعت..بالحديقة البرا كاعد
صفوان ع كرسي وكدامه ميز وبي نفاضة
جاي يدخن..
شافني طلعت ..طفى الجكارة بالنفاضة وكام
تقرب يمي مبتسم..
كواج الله..
شكرا ..وينه الولد اجه مو؟حجيت ودرت نظري
عنه..
اي برا بس شبيج!؟احد ضوجج احد حاجاج
ليش ضايجة؟؟!
لااا محد بالعكس كلش اسلوبهم حلو واستقبالهم
الي رغم اول مرة يشوفوني..

بس انا اريد ادرس ريمة ببيتهم ..يعني الافضل
اروحلها هناك..هذا بيت العائلة وو..وزحمة اجي
يومية واخربط نظامهم..
لهفة!حجه وهو رافع حاجبه..
بلعت ريك وحجيت..اكيد فاهمني ..
هز راسه بصفنة..فاهمج بابا فاهمج ..بس اليوم
كلت تتعرفين ع اهلنا وباجر عود روحي لبيت
ريمة..

اي احسن هذا الافضل..يلا اترخص صارت دنيا
مغرب..
اي ينتظرج يوسف برا..مد ايده بجيبه وطلع
ظرف..مد ايده الي..خلي ذني جوا ايدج واعتبري
اتعابج بس مقدم..
مامديت ايدي بس حاجيته باستفسار..شكد؟
ههه ليش تسألين؟

ماريد اخذ شي زايد ومو تعبي..
تحاجيني هيج؟لهفة انا كتلج قبل واكلج هسه..
حاسبج بتي ..
والنعم منك والي الشرف..بس افضالك كثرت وانا
ماكدر اردها هسه..ياريت تنطيني فلوس تناسب
تعبي حتى مااحس انا ماخذة شي مو الي..
بالاول اخذي الظرف من ايدي عيب ابقى
مادها..

مديت ايدي اخذته وبقيت لازمته بيدي..
حجه بابتسامة..ضمي بالجنطة ولا تحسبين وراي
عيب انا حاسبج بتي وهمام حفيدي يعني
مو كيفج تقبلين لو ترفضين انا اجيبله اليعجبني
واشتريله ماتمنعيني..
ابتسمت بقهر..شكراً ع كلشي انا اترخص..
محروسة..حجه وهو يمشي كدامي..

طلع قبلي وكف حاجه يوسف لان جان منتجي
ع السيارة ينتظر..
سلمت عليه وكعدت بالسيارة..شوية وصعد يوسف..
ها خوية عندج شي لو نتوكل؟
لا ماعندي توكل..
الله يسهل..حجه وهو يشغل السيارة..
عدلت كعدتي وفتحت الجنطة..فتحت الظرف
شفت بي صفطة عشرات..حسبتها وهي داخد الجنطة ..
مبلغ ٢٥٠ الف..

انقهرت وشفته هواي قياساً بتدريسي يعني
انا اصلا مو اختصاص بس لا قوية
بالرياضيات درستها..وصفوان لان يريد
يساعدني خله مستقبل البنية بيدي وهم ينطيني
هلكد..
لازم ارجعله ع الاقل ١٠٠..عزلت ١٥٠ ضميتها
بالجنطة و١٠٠ رجعتها بالظرف باجر انطيها اله..
سديت الجنطة وحاطتها بجتفي عدل وافكر
بس كون ابوي مايحس بيه..

وصلت وي الاذان..دخلت لكيت امي تصلي
بالنول وابوي مو هنا..فرحت فرحة طرت ..شلت
همام وابوس بيه ودخلت للغرفة..بسرعة طلعت
الفلوس وضميتها بوجه المخدة..ضمة قريبة
ومايفكر بيها ابوي..