اغصان تتحرى البليل

38

صباح الخير

اغصان تتحرى البليل
الجزء الثامن والثلاثون

حجى غزوان ويباوع لباسل..شوفو لهفة
صورة عمة بس هي ماشايفتها..
سويت الموضوع طبيعي وكمت اخذت الصور
من ايد ريمة..
الحجية يمي بس صوت نفسها اسمعه..ابد
ماحجت حرف..

باوعت بالصورة هي بابتسامة..اركز بملامحها
بيها شي من باسل ..
غزوان حجى وهو مبتسم..هاي عمتي 
ال..ميتة ..عمتنا انا وصفوان ..وباسل..
باوعلي صفوان ووجهه يريد يطك من العصبية..
الكل جان يحاول يلتهي بالصور البيدهم
بس متوترين والجو مشحون..

رجع غزوان حجى بكل حقارة..ركزي
بيها مو بينا شبه هواي منها..؟
جاوب باسل وبكل برود عكس الغضب البداخله
صرت حافظة نبرته..
ايي بلا ماتركز وتحتار..انا اشبهه غير انا
ابنها..حجى وهو يلف ايده ورا ظهري..

هنا الوجوه اصفرت وبس العيون مفتوحة 
على اتساعها..
صفوان باوعلي بعتب..هزلي راسه بمعنى ليش..
غمضت عيوني احاول افهمه مايحجي شي..
اكتفى بالسكوت وطلع جكارة يدخن..غزوان
كام وهو يعدل ملابسه..كعدتكم حلوة يلا تصبحون
ع خير..

اخذ عائلته وطلع..والبقية بقو بسكوت
تام ومحد رفع عينه من الارض..
كسرت حاجز الصمت حجية هيلة..وهي نفس
كعدتها ومدنكة وصافنة..
ياهوو كلك باسل ياهو كلك ؟؟
واحد ابن حلااااال مو مثلي هه..

باوعتله بخزرة..لا تنعثل..والكلك هالسالفة
ماكملها الك؟؟؟
لا للأسف بس هذا السامعة..حجى وكام ..
يلا لهفة نعست امشي..
اكعد بمكانك خلينا نفتهم..حجت بعيطة..
تعبان اريد اروح..
تنهدت وحجت بتعب ..روح الله يحرسك..

اخذ ايدي ومشينا..اجه ورانا صفوان..
باسل انتظر شوية..
مشى باسل بلا مايلتفت..
باااسل لا تستزمل عاااد..
ماهتم باسل وكمل ..نريد نعبر الحديقة ..جره
صفون من ايده..ولك صاير كلش انت..

تفضل؟جاوبه ويبتسم ابتسامة مستفزة..
منين عرفت هسه تكلي..
عرفت من اكثر شخص يحبني..اصلا اكثر
شخص تهمه مصلحتي..
باوعلي صفوان وهو فاتح عيونه..ليش
حجيتي لهفة؟؟

نطيت عيوني بخوف..وباسل باوعلي
وعقد حواجبه..
حتى انت!!!!!ولكم الله اكبر حتى انتتتتتت 
تدريييييين!!!!ومسوية روحج مقهورة عليه؟؟؟!
كام يصيح ويعيط ووجهه وعيونه ترعب بكل
معنى الكلمة..باسل صار مثل الجمرة..

لزمه صفوان ويعت بي..باسل اوكف..
دفع صفوان وطاح على ظهره بالكاع..
عتني من ايدي وحط وجهه بوجهي وعاط..تحلمووون
تشوووفون باسل بعد..
دفعني وصعد للشقة ركض..وراي الكرسي
جريته وكعدت..اباوع لصفوان كام ولازم
ظهره وصافن..

اجه جر الكرسي وكعد يمي..عذريني بس
عبالي انت حاجيتله من كال واحد يحبني..
مو ذنبك..اول وتالي لازم يعرف..خلي هسه
يفرغ غضبه وبعدين اتفاهم وياه..
ياخوفي مايقبل يتفاهم بعد..
لا ليش هيج تكول!
لان هذا رابي وياي واعرفه من يطنكر..