اغصان تتحرى البليل

١٥

مساء الخير

اغصان تتحرى البليل
الجزء الخامس عشر

كام ياسر يريد يجي يمي وجره صاحبه..لك عوفنييي..
ايي عوفه..اريده يجي اشوووف شيسووي سبع البرمباا..
دفع ايد صديقه واجه حط وجهه بوجهي ويخزر..الا
اندمج ع هاي حجايتج بت الفكرر..
حجيت باعصاب تغلي..مامجدية بباب الخلفك
والفكر فكر باخلاقه..جريت
البسمار حطيته بوجهه اخترع ورجع ليورا..

انت صدك مخبللة..جماعته ورا يحاجو يكلوله
كافي هو دفعهم وضحك..خاب شوف جايبة
وياها بسمار ههه..
مو شغلك ..وهالمرة فلتت المرة التجي اكتلك
بحذائي خاااف عبالك اخاف لو استحي..لا انا النسوان
المثلك امدهن بالكاع..حجيت ومشيت بسرعة..

بهاللحظة انعتت ايدي..ساقطة عليمن نسواان..عاط
ياسر بعصبية..
دفعت ايده وركعته بجنطة الملازم..واكو الولد
بسرعة لزمو وانا هجمت عليهم واكفخ بيهم بالجنطة..
تعبت ونزلت الجنطة لزمتها بيدي وحجيت بعيطة..
اليندك بيه اندددمه ..هم بقو باهتين عدا ياسر وجهه صار
دم..عفتهم وكملت طريقي..

احس رجليه ترجف من الاعصاب انقهرت وكرهت
نفسي ..
طلعت ادور على سيارة ماحصلت لان تأخر الوقت..
بقيت واكفة شوية مااجت ولا سيارة..كملت الشارع مشي
لحد ماوصلت لنهايته قريب التقاطع حصلت..
صعدت بسرعة جانت كية مسكربة ..
باقي مكان واحد بالاخير..كعدت وحطيت الجنطة بحضني
بصفي كاعدة بنية هم طالبة..

حاجتني اول ماكعدت..وين تداومين؟انا ترجمة..
درت وجهي الها..قانون..
حلوو ليش عصبية ههه ..
لا مابيه شي بس مشيت هواي وتعبت..
اي امبينة وجهج صاير احمر..اكلج مامحتاجة خط تاجرين؟
لان الخط مالتي بطل ..
حاجيتها وانا طالعة روحي ..لا ماريد خط..
ليش لعد بهذلة الفورتات شلون متحملة..
انا هيج احب البهذلة ..
كيفج..حجتها باستغراب وسكتت..

يمكن لو باقية تحجي اكثر جان هفيتها بالجنطة..
انا منا تعبانة ومنا السيارة تعتعت وكل خضة تخضني
تطير معدتي بمكان بلعومي ..
على ماوصلت متفلشة تفليش..
انتظرت الكدامي ينزلون حتى انزل..

واحد سوا روحه يعدل بعلاليكه وهالحجي كاعد بالكرسي المتحرك
الكدامي..وانتظر وهذا بكل هداوة..
تالي شالها ويم الباب ووكف..وانا مدنكة واريد انزل
وهي الكية ماينوكف بيها وكفة كاملة يعني تدنيكة
تفشل..
شفته متعمد يبطأ ..بجنطتي ودفعته وانا دايرة بحجة مادري..
التفتت ويتأسف..عفته ونزلت ..لو باقية عليه اليوم
للمغرب هنا..

مشيت للبيت وعظامي تطكطك كلها ..
حتى لو واوي مايمشي هالكد الله يسامحك ياثابت
على مااتخرج يمكن بس الجمجمة باقية..
دخلت للبيت وكبل للمطبخ..فتحت الجدر صبيتلي تمن
وعليه مركة واكلت وانا واكفة..
جاي اغسل المواعين ودخلت امي..ها يمه بالي يمج
بطيتي..
اي ماحصلت سيارة مشيت شوية يلا لكيت..
الله يساعدج حبيبة..
ويساعدج همام كاعد لا ..
لا نام مخليته يمي بالهول..ابوج طلع وي صحبانه
رايحين للفاو اليوم..