اغصان تتحرى البليل

١٧

السلام عليكم

اغصان تتحرى البليل
الجزء السابع عشر

مرتبطة!!؟ليش تسأل هيج بلة؟؟حجيت بتعصب..
ليش تضايقتي مو قصدي شي..انا اعرفج بابا وحاسبج
من اهلي بس ردت اتأكد من شي..
وشنو هذا الشي؟
ياجر اجيج للكلية واسولفلج يرادلها كعدة..
الكاج بالحديقة كون نفسها الكعدنا بيها ذيك المرة..
ماشي بس قبل لا يخلص رصيد المرة ردت اوصيك على
شغل عفية..
شتردين تشتغلين بضبط؟

اي شي يحفظ سمعتي قابلة بي المهم اطلع مصرف همام..
لهفة كتلج انا اساعدج شلج بالشغل..
اي ادري انت راح تساعدني والكى شغل واعتمد ع نفسي..
انتظر منك خبر عفية ..اذا حصلت خابر
على هذا الرقم مالت جيرانه
وكلها صيحلي لهفة وانا اجي واتصل عليك
بعيوني بابا ..حجه بتنهيده..
يلا لازم اروح انا مع السلامة..

سديته منه ويالي مشوش احس صفوان وراه
سالفة مو خالي ابد..
طلعت وتشكرت من خالة ام دعاء وكتلها رايحة
للبيت كالت حضرتلج صينية اخذيها وياج..
محضرة مركة قيمة تجنن وتمن وخضرا وطرشي
اخذتها ورحت للبيت..
اول مادخلت حطيتها بالمطبخ ودخلت للهول ..ابوي
كاعد يباوع تلفزيون وهمام بحضن امي ..

شافني وكام لحضني وتعبان وجهه اصفر..شميته
من ركبته واخذته للغرفة..
حياتي ليداتي ليش ضايج.؟
حط راسه ع صدري ويتدحس نعسان..
يابعد عمري تعال نام تعال..حطيته ع رجليه
لحد ماغفى ..خليته بفراشه وكمت بدلت وحطيت
المادة كعدت اقرا..

انفتح الباب ابوي مد راسه..منين هذا الاكل بالمطبخ؟؟
ثواب من ام دعاء لاكتني بالباب وانطتني..
خووش دام هيج انت اكلي الغدا السوته امج وانا
اكل الثواب..
ميخالف..حجيت وانا مدنكة ع الدفتر اكتب..
سد الباب وطلع..وكلت مااطلع هسه وهم يتغدون لان مايقبل
ومالي خلكه..

طيرت نص المادة يلا كمت اكلت هم نايمين والبيت
هدوء..اخذتلي ماعون وياي لهمام حتى من يكعد اوكله..
مشيت بهدوء وومخليته بكتري خاف ع حظي يطلع
ابوي من الغرفة..
دخلت بسرعة وسديت الباب وغطيت الماعون بورقة
وخليته وراي..
لشوية كعد همام اخذته غسلتله ووكلته وخليته يمي
بالغرفة..

اليوم احسن شوية كحته قلت بس وجهه اصفر حيل..
صفنت عليه وطاحت دموعي..عبالك اشوف هالة بصغرها
يمي..
وهو بس شافني بجيت اجالي باوع بوجهي وبرطم ..
ضحكت جذب وانا اسويله تييي العب وياك مابيه
شي وامد لساني وهو بقى يضحك..
شبكته لصدري وانا احمد ربي واشكره لان عوضني
بي بدل امه ..يمكن هو الصبرني على فقدانها وانطاني
قوة وارادة اصبر واتحمل..

مر اليوم بدون مااطلع من الغرفة لان ابوي موجود..
ورا المغرب بشوية نمت لان نص الشهر وهاي اليومين تنزل
كلش ظهري واجعني..
كعدت الفجر على الوجع البطني ..احس برودة تخوط بيها..
غطيت همام وطفيت الضوا وطلعت بهدوء لا يكعد..
دخلت للمطبخ اتخنس ولازمة بطني ..حميت الجاي ع النار
وعيني ع الباب لا يكعد ابوي..