اغصان تتحرى البليل

٣

مساء الورد

الجزء الثالث
اغضان تتحرى البليل

لزمت هالة من ايدها وجريتها عليه حيل..
شلون تاخذين العلاكة!؟حجيت بصوت ناصي واحنا نمشي..
شبيج لهفة هو احمد قابل غريب..
لااا يمه منين غريب مو البارحة ثردنا ويا وحتى عرك شربنا..
وتالي وي لسانج شبيج..
لساني تبرى مني وشمري العلاكة يلاا..
ماشمرها لهفة ..حجت بنتر وجرت ايدها..

ماكدرت اكثر حجي وياها وشارع..
وصلنا للمدرسة وهي ماقبلت حتى تجاوبني من حاجيتها..
راحت لصفها وانا رحت لصفي ومقهورة عليها
لان ماتعرف مصلحتها..
كملت امتحاني بالكوة وطلعت..رحت انتظرها يم صفها..
طلعت البنات اغلبها وهي ماكو..
معقولة لهسه ماخلصت اكلني القلق اخاف ضوجتها وماعرفت
تجاوب..

ورا شوية وانا كاعدة ..اجت هي تمشي سريع..
باوعتلها جاية من الساحة مو من الصف!
كمت بسرعة..شوكت طلعتي ؟شلونج مجاوبة؟
دنكت وحجت ..خلصت من وكت..ايي مجاوبة يلا
امشي نروح..
احسها متوترة وبيها شي مو طبيعي..

طلعنا للبيت وهي تمشي ومدنكة واحسها فاصلة..
لزمت ايدها حيل..شبيج هيلتي ضايجة مني؟
عصرت ايدي اكثر..اباوعلها دمعت..
وكفت بقلق..شبيييج؟
امشي امشي ونحجي..
مشيت بس بطيء اريد افهم شبيها ..
حجت بتوتر..لهفة انا مساع حجيت وي احمد خابرته..

صدك تحجين!!
اي العلاقة الجايبها بيها فون ومخليلي بس رقمه..
وانت بكل بساطة اخذتي الفون وخابرتي؟!وشلون ووين!
اي اريد اعرف نهايتنا شنو..رحت للحمامات وخابرته..
وعرفتي!حجيت وانا لازمة اعصابي كوة..
اي هو يحبني ويريد يتزوجني بس يتوظف..
هه وشدعوة الوظيفة تنتظره ..عذر اقبح من فعل..وشنو
جوابج!

كتله انتظرك انا..كال نبقى نتواصل بيناتنا لحد ما
نتزوج..
حجيت بنتر ..يعني مقتنعة انت بهذا الشي؟؟؟
مقتنعة تحاجين واحد وتخابري وعندج اب مثل ابوي
يشك بروحه!
اي مقتنعة لان اريد اخلص من ابوي..اريد احس
بحب بحنان بعطف..
اريد البس مثل الناس اطلع اكل..ماريد اعيش عيشة
القحط والحرمان..حجت ونزلت دموعها..

ربج ماينسى عبده وكله اختبار منه..باجر تفرج وتهون
ويتغير الحال..
ليش تورطين نفسج بعلاقة وتخربين سمعتج وسمعة
اخونا الي الناس كلها تحترمه..
لهفة محد يعرف..احمد مايحجي كدام احد انت بس ساعديني..
انا احبه اموت عليه..ساعديني حبوبة..

ماساعدج بهيج شي ابد..معناها جاي ادمرج مو اساعدج..
هذا الانسان مايفيدج..والدليل لو صدك حابج جان اشتغل ليل
نهار وكون نفسه واجه ع الاقل خطبج لحد مايكمل
اموره وتتزوجون ..حتى لو تبقون سنين مخطوبين..
هو كال مااطول وراح اسوي كلشي لخاطرج..
فدوة لخاطري ساعديني..حتى اكدر اخابره بليل..

هههههههه ..تخابري بالليل!هالة اصحي من كابوسج..
احنا باب ينقفل مثل الناس ماعدنا..ابوج ساد فتحات القفل
بشمع وصابون حتى مانقفلهن..وبنص الليل يدخل
للغرفة حتى مايدك الباب..
بعد شلون تخابري!
بالحمام اخابر..
تريد تخابرين كيفج..بس انا طالعة من هالموضوع..
عندج حل واحد تتواصلين ويا..خلي يشتركلج نت وتراسلو..
غير هذا الشي انا ماعندي..