اغصان تتحرى البليل

٢٨

مساء الخير

اغصان تتحرى البليل
الجزء الثامن والعشرون

ليش ماكتيلي صاحب اخوج حصلج الشغل؟؟
بقيت مترددة اكلها مو صاحبه اصلاً..
راح تشوفني جذابة واستحي!زين هسه انا
مو المفروض اكون موافقة بباسل!اذا تزوجته
وبيوم رجع فيض والتقو شنو موقفي!!
زين وابوي من يشوفه ويعرفه هو المقدم نفسه!
حبل الجذب قصير احجيلها كلشي افضل..

بديت احجيلها من يوم اخذني ابوي للمركز
وشفت صفوان لحد البارحة..بس ماذكرتلها
شي عن باسل بس مجرد هو اخو صفوان
وحجيتلها عن اهله وشلون يعاملوني امه
وبيبيته من اروحلهم..سمعتني للاخير وما
سألتني ولا سؤال..

خلصت كلامي..بقت تباوعلي وتتمعن بيه..
ليش ماحجيتي من الاول؟؟
ماردت ابوي يعرف المقدم ساعدنا وهو التكفل
بينا من انسجن وكذلك الشغل لو يعرف هو
دبره الي وانا جاي اروح لبيتهم مستحيل يقبل..

طول عمرج تفكرين صح..كبرتي كبل عمرج
وعقلج جبير..ولا اعتب عليج ولا الومج..انت فخر
الي ورفعة راسي بكل مكان..
يعني ماضجتي لان ضميت عليج؟
لا لان انت تفكرين احسن مني ..انا خوافة وكضيت
عمري كله اتراجف واخاف من خيالي..
ومن خذيت ابوج صرت اخاف بالزايد..

وشحصلت؟؟ضيعت بتي ..وضيعت ابني..
لا تصورين انا مانقهر عليكم يمه..بس مو كلشي
ينكال..والحمدلله تعوضت بيج..
صرتيلي الابن والبت والام والاب ..وراضية
عنج منا للحشر..وادعيلج بكل فرض يمكن
حتى اكثر من اخوج...

اخوج الهج ومافكر وراه ام واخت حتى يطمنهن
ويكلهن انا رايح..
يمه معذور ماندري بظروفه شنو..المهم ندعيله
يرجع لو حتى نعرف عنه خبر..
ادعيله يمه واتمنى كبل لا اموت اشوفه لو اسمع
صوته بس..
اسم الله عليج عمرج طويل..

صدك شوكت كال يجي صفوان؟؟
كالو الصبح يجون..الله يستر عليهم دنيا
واخرة ويغفرلهم بعدد كل لحظة ساعدونا
بيها..
الله يسمع منج..اكوم اسبح انا الشامبو
الجديد حلو ههه..
ههه روحي يمه روحي..

كمت سبحت وكملت تنظيف وهمام
كعد ريكته وحطيت دفتري بالهول و
كعدت اقرا هالكم
يوم هاملة دراستي..
للساعة تسعة اندك الباب..كامت امي لبست عبايتها
وطلعت..
انا طفرت للغرفة..اجه همام يركض وراي..
بقيت افتر مدري شبيه..بطني انخبصت
ورعشة باطرافي..

سمعت صوتهم يسلمون ع امي..همام باوع
للباب من سمع الصوت..منوو حجه وهو فاتح
عيونه يباوعلي بفضول..
مادري تعال ماما بس البس عبايتي..درت
اريد البس العباية فتح الباب وركض..
صرت ورا الباب بسرعة ..هذا مو يستغرب
من الناس وللللك شطلعك ..

لبست وكملت وبقيت واكفة ورا الباب..هذا
همام السخيف طلع عود جنت اريد اتحجج
بي وابقى يمه بس طلع قبلي انووب..
حاطة اذني ع الباب واتصنت..انفتح الباب
وانركعت بكصتي..
رجعت وانا لازمة كصتي وامي دخلت
و سدت الباب بسرعة وتضحك..