اغصان تتحرى البليل

41

مساء الخير..عظم الله اجوركم..

هذا البارت اسمي بارت حرك الدم لان كاتبة 2000 كلمة وعلگ برنامج الكتابة وطلع لوحده وضاع كله..رجعت كتبت هالبارت بساعتين مع اعصاب تلفانة..

اغصان تتحرى البليل
الجزء الواحد والاربعون

شلت القميص مالته وطاحت كصيبتي منه..
شلتها وانا اتأملها..هاي جانت شكد عزيزة
على هالة وهسه باسل اعتز بيها اكثر..شعور
بداخلي حلو صار ..يمكن تطمنت او حسيت
بفرحة من هو مزاعلني وطالع من البيت بس
ماكاهرني مثل ماكال..ولدرجة فاتح كنتوري
ومطلع كصيبتي وماخذها ويا..

شلت الكصيبة حطيتها ع الميز
وكملت تعزيل جنطته..
شلت الملابس بيدي وطلعت ماخذتها للحمام..
لكيته متمدد ولابتوب ع بطنه جاي يشتغل بي..باوعلي صفح
ودار..
رجع دار عليه بسرعة من انتبه لملابسه بيدي..
ماحجه شي وحاول يسوي نفسه مندمج
بالبيده..

ذبيت الملابس بالغسالة ورجعت للغرفة..تمددت
وانا مغمضة عيوني ..انفتح باب الغرفة وانسد..
حسيت حركته بالغرفة..بعدها حسيت حركته
على السرير تمدد بصفي..
صح مغمضة بس احس بي جاي يباوعلي
واصلا قريب عليه حرارة انفاسه لفحتني..

ادعيت السكون وبقيت بهالوضع..حجى بهدوء
وبحة وهاي البحة نقطة ضعفي..
محتاجج..
ماحركت ساكن وبقيت نفس وضعي..سكت
بعدها مانطق بكلمة..وانا هم من التمثيل
غفيت..

ثاني يوم راح للدوام ورجع واحنا ع كد الكلمة
الضرورية ..هو عافس روحه وانا اكثر منه..
اعرفه موضوع الشرب تعذب يلا تعود بدونه..
وهسه مدام شارب بالايام الطلع بيها معناها
رجع وصعب يتحمل..

قررت اعوضه بعصائر..ورا العشا سويت عصير
رمان ومليته ثلج واخذته اله كاعد بالهول جان..
اخذه من ايدي وجره جرة وحدة..
باوعتله ببلاهة..باوعلي نص عين ..اكو بعد؟
اي طبعا اجيبلك؟
لا اريده لبعدين..
اي موجود..

كعدت يمه باوعت ويا فلم..تجيت راسي ع
طرف القنفة وغفيت..
شوية وفزيت..لكيته صافن عليه ومبتسم..
تثاوبت وباوعت للساعة..وهو بعده بصفنته
عليه..
حركتله حواجبي بمعنى شنو!
هيج..بس انت بس تنتجين ع القنفة تغفين..

ابتسمت وتذكرت من غفيت بالدوانية من جنت
مريضة واجيت ادرس ريمة ..بوقتها
حلمت هو شابكني وتفاصيل الحلم خلتني
ابتسم اكثر..
حجيت شي غلط!سأل بفضول..
لا ..بس تذكرت مرة جنت ادرس ريمة وغفيت
ع طرف القنفة..

ههههه..وهم كعدتي مبتسمة ..
عقدت حاجبي..شلون عرفت مبتسمة!
عندي تصوير الج من نمتي لحد ماكعدتي..
شنوووو!!!
ريمة ههه..ريمة خليتها تصورج حتى اشوفج..
تحجي صدك يعني!!
اييه شكو بيها ليش مصدومة؟
بااسل مصورني!!تتفق وي بت اخوك عليه..؟

مواتفاق بس تدري مشتاقلج ..
باسل انت بوكتها سافرت وخليت الكل يدور
وخابف عليك!شلون دزتلك ريمة صورتي بعد!
صح الكل قاطعته بس ريمة مستمر اراسلها..
لحظة لحظة انت دزيتها يعني ورا المشكلة
ثاني يوم من طلعت؟
ايي دزيتها تتطمن عليج وهم دزتلي صورة..