နွေဦး ရဲ့ မိုးပိတောက်

💛 - 1

မနက်ခင်းတစ်ခုရဲ့အစ
အခန်းရှေ့က မမမြရဲ့ ခေါ်သံကြောင့် နွေဦး လန့်နိုးလာခဲ့သည်။

" နွေ.. နွေ ညီမလေး
နွေဦး..  ထတော့ ကလေး အလုပ်ချိန်ကပ်နေ​ပြီး  ကားကလည်း workshop ကနေ သွားပြန်ယူရအုံးမှာမလား ထတော့ မြန်မြန် "

နွေဦး အလုပ်စလုပ်သည်မှာ တစ်လခန့်ရှိပြီးဖြစ်သော်လည်း မနက်အိပ်ရာထဖို့ အတော်လေးအားခဲယူရသည်။
ဘွဲ့ရပြီးသည်နှင့် နွေဦး သူငယ်ချင်း ဖြူဖြူက သူ့အလုပ်ဝင်နေသည့် Dasiy company တွင် နွေဦး ကိုပါအတူတူလုပ်စေချင်သည်နှင့် နွေဦး တစ်ယောက်အလုပ်ဝင်ဖြစ်ခြင်းဖြစ်သည်။ ဖြူဖြူက နွေဦး ထက်ငယ်ပေမယ့် သူငယ်ချင်းပေါင်းပေါင်းတဲ့ ညီမလေးဆိုလည်းမမှားဘူးလေ..
Company မှာ အမျိုးသမီးသုံးရေမွှေးထုတ်သည့် ကုမ္ပဏီဖြစ်၍ နွေဦး ရဲ့ ဝါသနာအရ အလိုက်ဖက်ဆုံး အလုပ်လည်းဖြစ်နေသည်လေ။

" ဟုတ်ကဲ့ မမမြ.. ညီမလေး နိုးပြီးရှင့် ''

နွေဦး လည်းနာရီကြည့်မိတော့ မနက် ၅နာရီသာရှိသေး..

" အမလေး ငါ့ အစ်မ ကတော့လုပ်ပြီး ၅နာရီလေး ရှိသေးတာကို '' မမကိုစိတ်ထဲက ပြောမိပြီးမှ နွေဦးစဥ်းစားမိသည်။
မိဘနှစ်ပါး မရှိတော့ကတည်းက နွေဦး အတွက်တော့ မမမြသည်သာ အမိ မမမြသည်သာ အဖ ဖြစ်ခဲ့ရသည်မဟုတ်လား။ မမမြသည် နွေဦး ထက် အသက် ၁၁ ကျော်ကြီးသည်မို့ နွေဦး မှာ မမမြအတွက် ညီမဆိုသည်ထက် သမီးလေးလို ဖြစ်နေခဲ့သည်ဆိုပါတော့

မိဘများ မရှိတော့ကတည်းက ညီအစ်မနှစ်ယောက် ကိုယ့်အားကိုယ်ကိုးပြီးနေလာခဲ့ကြတော့ ဝင်ငွေအသင့်အတင့်ရှိသည်မို့ အဆင်ပြေသည်။
မိဘ အမွေအဖြစ် ကားနဲ့ တိုက်အိုလေးတစ်ခုသာ ရှိခဲ့သည်မို့လည်း ညီအစ်မနှစ်ယောက်လုံးက ပို၍ကြိုးစားခဲ့ကြသည်။
နွေဦး လည်းကိုယ့်အတွေးနဲ့ကိုယ် ပြန်ပြုံးမိရင်း ရေချိုးဖို့ပြင်တော့သည်။

ပြီးသည်နှင့် မမမြ ပြင်ပေးထားသည့် မနက်စာ စားပြီး အလုပ်သွားဖို့ စောစောထွက်ခဲ့တော့သည်။
ဒီနေ့က အလုပ်သင်တစ်လပြည့်ပြီးမို့ ပုံမှန်ဝန်ထမ်းအနေနဲ့ အလုပ်စဆင်းရမည် ဖြစ်သည်။