꧁منظور جديد꧂
خرج يوسف من الشمبرة تاعها قامت تجري غلقت الباب بالمفتاح وناضت تنقز وتعيط أنا فهمتو أنا فهمت لغتو حطت صوابعها على لسانها وبعدت يااااه ونحكي نحكي مليح كيفو فرحتها كانت كبيرة كأنها ربحت شي حاجة ...
بقات تشوف من ومن تحب تتدوش تغسل جسمها تفكرت كي دخلها أول مرة للدوش باش تدوش حارت واش هذوك الحوايج كل بقات مبهوتة تهز من ومن وبلعت الصابون حسباتو يتاكل وهو يجري وراها طلق الما يوريلها كيفاه حتى لقاها تنقز وهازاتو تضحك وهي تشمخ فيه وبعدها وقفت وتشطح شطحة غريبة عجيبة من فرحتها معرفت حتى كيفاه عملتها وجات تدوش قدامو فوق قشها تشمخ وتعصر تشرب وهي مش مأمنة ... واش هاذ العجب وهو يعيط ويسخط وهي مش فاهمة شي غير ملامحو زعفانة!!!
حتى نحالها الرشاش من يدها والي شمخو حتى هو زادة وجبدها قعدها في البانيو تاع الما وعيط عليها ترتب رتبت وبقى يغسللها في شعرها بدا شمبوان يسيح علي عينيها باش تبعدو دخلاتو في عينيها وناضت تعيط تفرفط وتبكي حرقوها عينيها وهو حاير ويعيط بكل قوتو إنتي سبب قلتلك أرتبي... شح فيك كيفاه نحيلك لوجع ذرك أنا يااااا ربي ...
بقى يسيح الما وهي تضرب فيه بكل قوتها حسباتو دارها بالعاني تبكي عينيها حمارو حتى أنها تتفكر كيفاه الذيب في داخلها زمجر وحب يخرج بسيف 😂يدابز ...
ضحكت وهي تتفكر هذاك نهار شحال ضحكت وشحال ستمتعت بيه وبالدوش وبالما شحال رتاحت بعدها كان يدوشها كأنها بنتو حست ذاك نهار صح بإحساس الأبوة واش معنتها يكون عندك أب هكذا تخيلاتو أب حنين .
كان ذاك نهار وحدو ومتعتو فاقت كل الوصف ... حتى أنها تفكرت كي جا يخرجها من دوش وهي تحاول تخبي بكل قوتها جسمها خصوصا بلاصة الختم الي كانت توجع فيها شوية كلما حط يدو عليها...
خرجلها القش والمنشفة وحطهم قدامها وبدا يشورلها باش تنشف بالمنشفة وتلبس قشها مفهماتوش ... حتى هز المنشفة وهو يتنهد ونحى التريكو تاعو وبدا يفوتها على صدرو على ظهرو كل جهة باش تفهم بلي يقصد تنشف كانت تبع كل حركة لكن مش للمنشفة ليديه على كور تاعو معرفتش علاش بلعت ريقها وبقات تبع فيه وعينيها قريب يخرجو وهي تبحلق فيه كان غايس يفهم فيها حتى لقاها قريبة ليه بعينيها الكبار كيف القطوطة وذيك النضرة معلية وجهها تاع غباء وصوابعها جايين بشوية بشوية فوق صدرو قربو يمسوه نقز من لقا روحو في كوانة وعيط ...
اااااععععع على شيبي تغتاصبني فرخة 😨
قلتلك اللمس ممنوع متقريبش مني أبعديييني الي تديريه عييب متشوفيش فيا ومتلمسيش هنا شور بيدو لصدرو وهو وجهو حمار بالغش وبالحشمة بعديني يا مهبولة يعني واش نستنى من عريانة كيفك غير التحرش متحرشة نشكي بيك لا حسبتيني منشكيش نشكي بجدك ترشاي في الحبس وأبقاي تتحرشي بالمسجونات ياعوريااانة ... وراح خرج بزربة خلاها حالة فمها واش بيه تقول ملسوع هي مقصدتش أي شي عقلها جامي خمم بطريقة منحرفة برك جاها شكل جسمو غريب مختالف علي موالفاتو وهذا الي حبت تفهمو!!!
طاحت فوق السرير تضحك بقوة شدها فورير من الي تفكراتو وجهو كان كيف المرا الي رايح يتعداو عليها...😂😂
هزت منشفة ودخلت للدوش غسلت ودارت كيف علمها تغسل وخرجت لفت منشفة على جسمها تحوس على واش تلبس عندها غير ديك البيجامة ملي جات تلبس فيها حتى متعرفش واش هي هو فهمها أنها للبنات يلبسوها هكذا جات تلبسها وتخرج بيها حتى شافت الباب تحل ...
حست قلبها طاح من الخلعة وهي تشوف أنو الختم يبان ... وقدام عينيه ثاني إذا هبط عينيه شوية يشوفو ...
بدا قلبها يضرب وهو واقف في الباب مصدوم مكانش متوقع يلقاها دوشت وحدها ولفت المنشفة كان ديما يدوشها لكن اليوم تبان بواحد الصفة حس قلبو تزعزع منها ...!!
جسمها بيض وشعرها كحل ليل يقطر بالما كانت تبااان كيوووت لدرجة كبيرة عينيه بلا ميحس جملولو الصورة ومقدرش يركز في تفاصيل وهو يشوف وجهها قريب يطرشق بالحمورية وعينيها المحلولين على وسعهم وهوما لاصقين في عنيه بصدمة... ملقا روحو غير يهمس بينو وبين روحو
« ساحرة»
كانت مشوكية من دخولو هكذا بلا متحس لقاتو واقف يشوف باهت معرفت واش بيه من خوفها أنو يشوف ختمها حطت يدها جهة قلبها تجبد في المنشفة لذيك الجهة تخبيه ودارت بخوف ... تدعي أنو ميكونش شافو...
يوسف كي دارت فاق على روحو وخزى الشيطان وحط الي جابو فوق السرير وخرج مسكر الباب بقوة...
دارت للباب مسكر وهي ترجف خوف كبير تملكها شافت فوق السرير لقات حاجة محطوطة هزتها لقاتها روبة بيضة وفيها نوار تهبل معرفتش واش هاذي لكن حسب واش تشوف كيما الي بيجامة الي جابهالها الظاهر أنها للبسة ...
بقات تشوف فيها وتعاود وتخمم كيفاه تتلبس عيات تلبسها بكل الطرق وتشوف في لمراية تلقا غريبة شوي حتى لقات الطريقة صحيحة لابسها تبسمت وهي تدور بيها عجبتها بزاف وزادت فيها الشطر...
لقات باسكات معاها تبسمت تعرف كيفاه تلبس هاذي لكن فيها خيوط وهي لخيوط متعرفش تربطهم !!
لبستها وخرجت تحوس عليه يربطلها الخيوط ...
وصلت للصالة لقاتو قاعد حاطط يدو على جبهتو ويفوت في صباعو فوق حاجبو بقلقة ... قربت منو وتنحنت.
شاف فيها باقي مدة يشوف وعينيه يقولو حوايج بعدها تبسم ...
يوسف : جاوك شابيين تهبلي ياصغرونة ياريت برك تعرفي واش راكي تديري في قلبي...
كانت تفهم كل كلمة لكن معرفتش المغزى من هاذ الكلام من غير أنو قلبها يرجف من كل شي قالو ... وهذا شي يخوف ... خدودها طلعو حمر بعد كلامو...
يوسف شاف خدودها وضحك ... خترات نقول راكي تفهميني شوفي خدودك كي حمارو هذو ميكونو غير من الي تفهم الكلام الي يتقال علاش حشمتي يادرا؟
يوسف شاف خدودها وضحك ...خترات نقول راكي تفهميني شوفي خدودك كي حمارو هذو ميكونو غير من الي تفهم الكلام الي يتقال علاش حشمتي يادرا؟
بقى يشوف فيها وهي كلما خدودها يحمارو أكثر ويديها يشدو في طرف الروبة قريب تقطعها.
يوسف : تنهد من قلبو وهو يشوف كل حركة تديرها حس روحو مش مليح ... شد شعرو بقوة عاود طلقو وهو يحك لحيتو خلينا في المفيد نحسب روحي مهبول وخلاص هاتي تحبي نربطلك الخيوط.
هزت راسها ايه قبل ميشرحلها بالإشارة ... هز حاجبو متعجب!!!
يوسف : ثاااني ياااربي هذي راهي تفهمني قبل حتى منفهمها بالاشارة واش هبلت ولا واش صرالي؟
بلعت ريقها وفاقت على روحها حطت راسها فالأرض تضرب رجلها بتوتر في الأرض.
يوسف : اااه يارب الصبر .
نزل ربطلها الخيوط وقام يتبسم يوسف خلاص ياصغرونة نروحو ؟
هزت راسها إيه كي فاقت بروحها ومن نضرتو بدات تهز راسها يمين وشمال كي لمهبولة ضحك يوسف على جنب وتمتم بشي بين شفايفو وقام خرجو ...
كانو يتمشاو مع بعض في الطريق لأنو معندوش سيارة ... تمشي وتشم الهوا حست روحها في عالم آخر فرحت بزاف كي خرجت ... كلما تشوف حاجة تشد فيه بقوة في ذراعو وتبقى باهتة وتشور بيدها تحب تنطق تحب تستفسر لكن خلي شوية تحب تهبلو كثر ... وهو كل مرة تمسو عينيه تتبدل نضرتهم وجسدو كلو يرعش مفهمش علاش لكن مقدرش يقاوم هذا الإحساس ...
وهي نسات الوجع الي كلما يزيد مع لمستها العفوية ليه والختم كلما يبان اكثر ويظهرو خطوط كحلين عليه...كأنهم جذوع خفيفة لشجرة...
كانت تشوف ناس تمشي تفوت قدامها تفوت عليها ولا كأنها موجودة ... كي يفوت عليه عبد تولي كي طيف يبعد عليها تولي عادية؟
كان يوسف يشوف كلش وفمو محلول مفهمش واش صاري...!
وهي تحاول تبين نورمال ... وصلو باش يقطعو الطريق بانت الإشارة خضرا ..
يوسف : هااايااا مد يدو ليها باش تجي معاه...
شافت في يدو وشافت ناس كل تفوت شدتها موجة رعب ... ملي خرجت وهي تشوف في لعباد بزاف رايحن جاييين واحد ميشوفها الوان انواع ركبها خوف ولات ترجف وذرك تفوت بيناتهم هاذو كل وهاذ البنايات أكل هذا الطوموبيلات كلش غريب عليها شدتها نوبة رعب متأخرة من الشي الي شافتو كل..
يوسف حس عليها جبدها من يدها وقربها شوي منو مش بزاف وبقى يهدر وهو يشوف لعينيها...
يوسف : متخافيش اوك راني معاك مش رايح نخليك وهاذو كل واحد لاتي مع راسو نتي نحيهم اكل من راسك وشوفيني غير انا...
نعرف متفهمينيش لكن حاولي تفهمي إشاراتي ...
ماس: فهمتك ونفهم كل حرف تقولو رايحة ندير كيف تقول ونشوفك غير نتا راني خايفة متخلينيش ...
يوسف : الصدمة قليلة فيه بقى يشوف فيها وناس تفوت وتجي والكل يشوف فيه واقف وحدو وماد يديه مهبول هذا واقف وسط الطريق بهاذ الشكل أكيد مهبول واحد يفوت يضحك عليه وثاني يغيضو كل حد واش قال وهو مش سامع بحد غير يشوف فيها في هاذ الجنية الي خربت عالمو !
ماس بقات تشوف فيه معرفتش علاش نطقت كانت مقررة تسكت حتى تفهم نواياه لكن نضرتو بسيف نطقتها وخلاتها متحس على روحها الا وهي تحل أكبر مشاكلو وتخبرو أنو مش مجنون على الأقل في هاذ النقطة بقى كيف هو..... شعل الضو الأحمر ... ولاو سيارات يفوتو صوتهم يولي من بعيد ولا هو فاق من صدمتو...
ماس : علبالي مصدوم لكن راني نفهمك واش قلت كل نقدرو نفوتو ذرك لأني خايفة...
بقى ساكت هز راسو وشاف في الإشارة يستنى تولي خضرا وهو مش مستوعب الي يصير يدو تزير بقوة على يدها كلما خمم أكثر حست بوجع في يدها ولكن الوجع ميجيش قدام فرحتها بقربو ولو محرمة عليه ومحرم عليها ...وتناسات الوجع وعقاب هاذ اللمسة...
♕يتبع😘♕
أنت تقرأ
꧁ختم ماس꧂
Fantasyالقصة من وحي الخيال يعني خيالية بحتة من نسج افكاري الخاصة لا تمت للواقع بأي صلة ليس لها علاقة لا بدين ولا بأي شي يتعلق بأي طائفة كل الأفكار وليدة خيالي قصة جديدة ونوع جديد مقريتوش كيفو مغامرة راح تديكم لأبعد العوالم متابعة ممتعة.... ♕فنتازيا ♕...
