ماس: لاااااا متقتلوش...
قصي : هو سبق لازم يموت جا يقوص عليه القوة الي تجبد في ماس كانت كبيرة بزاف جبدتها من رجلها طارو في سما ملقات متدير من خوفها على يوسف غير تشد فيه بقوة بزوج يدين وتعنقو من ورا قبل ميقوص لقى روحو تجبد بقوة وراه والثغرة سحباتو هو وماس دخلت ماس فيها وتبع قصي لأنها شداتو بقوة وجات تتغلق ...
يوسف يشوف بصدمة ملقى روحو غير شاد في السلاح بيديه الزوج ونقز تبعهم دخلت رجلو الاخرى وتسكرت الثغرة.... مش مأمن أنو دخل فيها وحتى كيفاه ...
في ثلاثة كانو غايبين على الوعي ... يشوفو غير في الظلام الشديد وخيوط ضوئية تفوت بسرعة البرق قدام عينيهم كي شغل خيالات ...
حتى حبس كلش وسمعو صوت قوي كأنو شي كبير طاح وتكسر ...
قصي تخبط في الأرض جا يحل عينيه وهو يحس بشي قوي طاح فوقو عيط طول صوتو حس أنو ضلعو تكسر ....حل عينيه لقاها ماس فوقو ...بقى مدة يشوف فيها مش مستوعب شي من الي صار ...
جا يسقسي حتى يسمع صوت يعيط هز عينو لقى يوسف يطيح بقوة من الثغرة الزمنية ثواني تسكرت وهو دخل وجهو في التراب ...
قصي : هذا الي تستاهلو أنو وجهك يتمرغ في تراب ...
طلع يوسف راسو وهو يسب بكل لغة يعرفها حس نيفو تكسر خترات يدير حوايج ميخممش في نتيجهتم كليا...
يوسف : شاف من ومن وهو يعوج نيفو الي يوجع معقد حجبانو ...وين راني؟
شاف لقى ماس في الأرض قريبة من قصي الي قاعدين يشوفو فيه...
يوسف : أنت السبب يارخيس...بسبتك صرا هاذ الشي كلو...
ماس ناضت تجري ليه ...
ماس: يوسف نيفك مجروح...ِ
يوسف : بقى مدة يشوف في عينيها الي فيهم لمعة دموع مش مصدق أنو رمى روحو في متاهة الزمن غير على جال هاذ الطفلة؟
يوسف : راني مليح متخافيش علاش درتي هكذا ودخلتي قلتلك مترجعيش ...
ماس: هذا كان مش قراري قرار تاخد ونفد عليا معنديش حق الإعتراض لكن المشكلة كيفاه الثغرة زمنية سمحت بمرورك ومرور هذا الغريب....
شاف يوسف فيه وعوج فمو...
حتى انا راني نخمم لكن بما أنو هذا سعدي باينة علاش دخل ِ..هذا كلشي سيئ درتو في حياتي تجسد في هاذ الوجه الباشع....بقى يخنزر في قصي الي كان بدورو يخنزر فيه وعيونو كلما تلمع أكثر بلمعة خوفت يوسف نضرة وحشية كأنها سبق وشافها لكن وين معرفش ....!!!
يوسف : علاش راك تشوف فيا هكذا رواح كولني خير ...
قصي: حقييير بسبة غبائك رانا هنا منعرف وين جبدتوني تسلكها غالية.
يوسف : ههههههه واش نسلك كنت حابني ندخل للحبس عادي راك رجعتني ألااف سنوات لعصر الي ينومو يتمنى يفيق ميشوفو حتى في كابوس تحوس يعيشو يعني عقاب اكبر ...تبسم شطر تبسيمة وهو يشوف فيه بنضرة شيطانية ...لكن الممتع أنو هاذ العقاب نفوتوه سوا سوااا ...✌😏
قصي : جا يهجم عليه سمعو صوت يخوف ....ِوقفو الكل يشوفو من ومن ...ِ
قصي : وين راني واش هدا ياربي وين جبتوني والصوت هذا منين جاي؟
يوسف : ماس واش هذا وهدا البلاصة وين؟
ماس: بقات تشوف من ومن بعدها شافت فيه بخوف ...
منعرفش انا منعرفش البلايص هنا بصح الصوت هذا باين شي حيوان بري متوحش....
يوسف : اوووه هذا مكان متخافيش عندنا حيوان بري متوحش أكثر منو نخلوهم يتفاهمو وحنا نروحو نحوسو على عشيرتك واش رايك وشاف لقصي...
قصي هجم عليه وهو يكزز في سنيه حكمو من كول الشومييز الي لابس وهو مقدرش يدافع على روحو بسبة يديه المربوطين لكن نضراتو كانت ليه نار ...
قصي: انا حيوان يا سراق اليوم نوريك توحش كيفاه يصرا تتعدى على ظابط في خدمتو...
يوسف : من نيتك؟ ظابط وخدمة مراكش تشوف وين نتا ...
قصي : ميهمني شي الي يهمني نخليك تبلع لسانك الطويل هذا...ِ
يوسف: تشوفو عدل تضرب راجل مربوط وتحس برجولتك عادي يعني ...طلقني وقاتلني راجل لراجل...
قصي : حسبتني خايف منك ميكون غير خاطرك...خرج لمفتاح وحللو يديه مسدهم وهو يشوف فيه وبعدها جاو يهجمو على بعض ...
حتى عيطت ماس ....ياااااه شوفو واش خرج مش وقتكم نضن هذا دب ....ِدارو الزوج لقاو دب قد السخط جاي جهتهم وهو يحل في فمو بشراهة الظاهر يمات مكلاش!!.
يوسف : مااااااس ...
دارت ليه واش ...
يوسف : أجرييييييي.....اجرييي...
قصي : ماس أجري وأنا واش ندير ؟!
دار ليهم لقاهم مخليين غير العجاج وراهم!!!
قصي: يلعنك ياتافه هربو خلاوني ...
انا ظابط مش صياد حيوانات متوحشة...
شاف لقى دب يجري ناحيتو وهو يزمجر....
ملقى روحو غير يجري وراهم بكل قوتو اذا لحقو هاذ الدب الا ميكون وجبة خفيفة ليه...
ماس تجري بكل قوتها ويوسف وراها ...
ماس: يوسف ملازمش نخليو هذاك المهبول ورانا وحدو ياكلو الدب....
يوسف : خممي في روحك برك أجري ياخي لعبها راجل خلينا نشوفو هذاك تهجم كل واش يفيدو مع هذاك الدب ...
ماس: يوووسف راه دب يدير واش يدير ميقدرلوش مشفتوش قد ماه؟
يوسف : نسيتي حاجة هوما عيلة من نفس الفصيلة فصيلة لحيوانات الهمجية....
مكمل كلامو حتى حس بضربة على قفاه...دار لقاه قصي يجري بكل قوتو وجهو مشبح وهو يعيط ياااخامج عيلة اااااه!!! الا منخرج من هاذ الخرا الي دخلتني فيه بعدها حسابي معاك ...
مجا يهدر حتى شافو سبقو وشد ماس من يدها ويجري بيها بسرعة اكبر لأنو الدب قرب بزاف منها....ِ
يوسف : هذا كيفاه قدر يلحقنا هكذا ويسبقنا في حياتي مشفت واحد سريع كيفو...؟
دار لقى دب قرب منو عيط طول صوتو وعطى ريح لرجليه كثر وقلبو قريب يخرج من لهاث...
لحقو لواحد الشجرة كبيييرة في وسط الغابة شافت فيها ماس لقاتها محفورة عند جذعها ...
ماس : طلقني لازم نشوف هاذ الشجرة....ِ
قصي: لازم نحميك ...
ماس : خليني لازم نحبسو عند هاذ الشجرة...ِ
قصي: علاش ؟.
ماس : اصبر ...طلقها وراحت تجري ليها شافت من ومن وشافت مليح تبسمت ...ِدارت ليه وعيطت ماس ....ارواحو هنا تبعوني.....
قصي عقد حواجبو وهو يشوفها تدخل في الغار الي في جذع الشجرة تبعها ولحق يوسف لقى قصي يدخل راح يجري دخل وراهم...
لحق الدب للشجرة بقى يشم يشم شم فالغار لكن مقدرش يدخل مد مخلبو للداخل محبش يدخل ضيق بقى يدور يدور وهو جيعان حتى يأس وراح.....
أنت تقرأ
꧁ختم ماس꧂
خيال (فانتازيا)القصة من وحي الخيال يعني خيالية بحتة من نسج افكاري الخاصة لا تمت للواقع بأي صلة ليس لها علاقة لا بدين ولا بأي شي يتعلق بأي طائفة كل الأفكار وليدة خيالي قصة جديدة ونوع جديد مقريتوش كيفو مغامرة راح تديكم لأبعد العوالم متابعة ممتعة.... ♕فنتازيا ♕...
