꧁ختم ماس꧂

♕الجزء الثالث عشر♕

                   ♕عقد مع سيد الختم♕
هو ممنوع يلمسني لازم نكون أكثر حذر ... بصح علاش راه يشوفني ومصرا والو!!
مجربتش مع الناس ثانين وحتى منعرفش إذا موجودين غير هو قابلتو يمكن لأنو هو ساعدني ؟
ولا لأنو أول واحد شفتو !!!
آااااع رايحة نهبل أنا خاطيني هاذ المعمعة منقدرلهاش ... ياريت نولي حجرة في قاع البحر حتى نتفتت ونتهنى لا هموم لا مشاكل لا أفكار لااا أطيااف لا وهم!!!
خبطت وجها بكف وعيطت : مااااس أنتي سبيل الوحيد تنقضي كل سلالتك علاش هكذا أنانية خممي فيهم خمي في الأطفال النسا الصغار الكبار....مكانش أمل من غيرك خممي واش تمدي لسيد الختم هذا ولا معرف واش يكون باش تقدري تفهمي اللغة وتدي الي تحبيه خممي!!!
يعني واش قادر يكون يحوس ؟ شي مادي ؟ شي معنوي ؟
بقات مدة رايحة جاية في وسط الغرفة تخمم وصوابعها مغروسين في وسط شعرها قريب تڨلعو من الجذور مقلقة بزاف خترة شعرها خترة تعض صوابعها خترة تكزز على ظفارها وهي تخمم ...
خممي ماس خممي حتى حبست وعيطت لقييييتها لقيييييتها ياريتو يقبل ياااارييييت ..
بقات تدور هكذاك بثياب داخلية تاعها العلوية وهي تنقز فرحانة كي لقات حاجة تقدر تمدها مقابل تعرف لغة هاذ العالم ... حتى سمعت صوت وراها .
يوسف: هاي أنتي نضتي علاش تنقزي؟
مفهمت شي لكن عرفاتو هو بقات كيف هي ومدارتش ليه الا دارت يشوفها ويشوف الختم وتخلى عليه وعليها بقات تشوف تريكو وين رماتو ؟
يوسف شافها من فوق مش لابسة من غير ثياب داخلية تاعها حشم طلع وجهو حمر بلع ريقو وعينيه ترشقو في  ظهرها بلا إرادة منو ...
بقوة دار وعيط عليها البسي ثيابك أزربي ...والغش عماه...
سمعت صوتو يعيط يديها حاطتهم جهة الختم تخبي فيه ...
شافت تريكو مرمي في الأرض دارت براسها لقاتو داير وجهو للباب تبسمت وراحت تجري هزت التريكو لبساتو بزربة حتى متولهتش انها لبساتو بالمقلوب ودارت ليه يديها ورى ظهرها تلهث ...
دار يوسف بعدما سمع حسها مكانش ...  لقاها تشوف فيه ولابسة تريكو بالمقلوب .
يوسف : ياربي صبر على هاذ المصيبة ياااااارب...
ماس بقات تسمع في كلمة يارب وبقات تعاود فيه : ياااارب يااااارب اااارب...
يوسف قرب منها وتبسم حاجة مليحة أنك تعلمتي كلمة الرب وجذباتك يادرا وصلكم الإسلام ولا مزال ؟
بقات تشوف فيه مقالت والو ... وعاودت كلمة يااارب ..
قرب منها جا يمد يدو يخليها تقعد نقزت من بلاصتها ولات في مكان آخر من الخلعة ...

‎ماس :( ممنوع لا تلمسني)  Ona jikano haziro !!
عقدت حواجبها وهي ترجف ... تخلع منها يوسف ومفهمش علاش تهرب منو بقى مدة يشوف فيها وبعدها تنهد وهو يدير يديه في وسطو ويعوج رقبتو عذباتو يعني فالاخير بعد كل الي عملو تشوف فيه مغتصب ؟! 
يوسف : حبيت برك نخليك تقعدي ونطمن على صحتك الا راكي مليحة بعدما تغاشيتي قبيل خفت عليك شفتك في حالة مزرية ومدختيش برك حتى أنك بديتي تتقلبي وبديتي تهدري شي مش مفهوم يعني كلش تقوليه مش مفهوم خفت يكون صرالك شي هذا واش حبيت متخافيش مني أنا مش رايح نضرك ماااس ...
فهمت منو غير ماس ياااااه شحال نطقها حلوة تهبل من فمو يبان زعفان وحزين من هروبها منو يعني راه يهدر على هاذ الشي تبيع حياتها وتفهم واش يقول متحبش تتعلم اللغة باش تنفذ المهمة مجرد عذر أكثر متحب تفهمو وتفهم واش يقول متعرفش علاش لكن هذا الي يقولو قلبها وبرك ... تتصرف على حساب رغبتو عماها .... شاف يوسف فيها مليح حس أنها مليحة خرج وسكر الباب ... قعدت فالأرض بعدما خرج مش مصدقة الي يصير كلو عمرها ولا تخيلت تبدل عالم باش تجي لهاذ العالم وتشوف هاذ الشي كلو بصح علاش تحزن ليه وتخاف على مشاعرو ؟ تنهدت من قلبها وشافت من من الظلمة غير ضو الفايوز مضوي ... قامت طفاتو وتنهدت من قلبها اليوم تفريها لازم تحكي مع يوسف وتفهمو بزاف أمور وهو ثاني ... مشات شمال جنوب شرق غرب في بلاصة وحدة من الغرفة ... ورسمت دائرة برجليها تمشي وتدور فيها وهي تمتم بشي بين شفافها شعرها مطلوق كلو بعدما نحات قشها كلو لبست شي أسود وخفيف ... جسمها كل مغطي  ... بقات رايحة جاية تمتم بعدها في ثانية رمات روحها في نص الدائرة الي بدات تشعل بخطوط حمراء من نار شوي شوي ولى لهيب أحمر داير بيها وهي في النص تمتم ويدها على الختم الي بدا يتوهج اكثر فأكثر صح الرعب تملكها لكن قوات عمرها وقالت أنو لازم تعملها... ماس : تقدري ياماس تقدري تقدري جربي توصلي مؤمنة بلي نحب نوصل ليه ومؤمنة بلي حابة نديرو ... بقات تعاود التعويذة وهي نفسو اللحن الي علماتو ليها خالتها ومكانتش تعرف واش معناتو ومعاه كلمات  ويدها الى الختم يزيد يتوهج أكثر فأكثر ... حتى خرج  شعاع أحمر تقول عليه لهيب نار وهي مغمضة عينيها في الضلمة مش حابة تحل خايفة بزاااف ... حتى حست أنو كاين شي يراقبها ويشوف فيها وحتى أنو يلقف أنفاسها 😨‎
بقات ساكتة غير صوت نفسها المتقطع من شدة الخوف يخرج ...حست نفسها بدا يضيق أكثر وأكثر وكأنو كاين حجرة فوق صدرها تحس لحمها يتشوك ويتزغب كأنو شي يفوت بخفة فوق جلدها...الرعب طعى عليها وقررت تحل عينيها ... لكن تراجعت في أخر ثانية تعرف أنو مثل هاذ الشي رايح تندم عليه لأنو أشياء كيف هاذي مش لازم تتشاف ...
تنهدت وقوات روحها ونطقت بلغتها...
ماس: نعرف أنك موجود هنا ولبيت الدعوةِ
حست ريح قوية ضربت في جسدها الكل...
وطيرت شعرها لورى ...
بدات ترجف لكن كملت ...
ماس: سيد الختم نحب نعقد معاك صفقة ...
ولهذا استدعيتك ...(كلما تقول كلمة الريح تدور عليها وتلفها كلها كيما راهي لكن ريح سخونة حست جسدها شاعلة فيه نار وشعور مش مستحب تحس فيه...)
لكن كمل... أنا المختومة ماس الحامية لعشيرة الأميسان بنت جاهان صافي من عيلة الصافي العريقة الي ضحات وضحات علجال النجاة والعيشة الهانية والحرة نطلب منك طلب تزودني بالمعرفة الي نسحقها ...
بقات ساكتة تستنى الرد حتى أنها كانت مترددة واش هاذ الشي سمعها ولا لا جا ولا راح يعني هاذ الريح يدل على وجودو ؟
ولكان تكون تحكي وحدها كيفاه؟!
بقات بين سؤال وجواب بينها وبين روحها هايمة معندها حتى جواب...
حتى حست بالريح بعدت عليها وسمعت حس وسمعت صوت قوي ...خشين يرعب...
و رغم أنو عينيها مغمضين شافت ضو أحمر لامع بشدة يبان بين عينيها ... جات تنطق سمعت صوت جهوري قوي يهدر يقوللها.
الصوت : أنتي شجاعة وفي سبيل أهدافك للتحقيق طماعة...
تجرأتي وستدعيتي سيد الأختام بنفسو وبإلحاحك حيرتيه وللقدوم لرؤيتك أجبرتيه...
هربتي من المحتوم ورحتي للامعلوم غيرتي الزمان والمكان وشكلتي لنفسك بينهم عالم ليك كونتيه ...
خليتي الي مش لازم يصير يتحقق المستحيل ولى ممكن والمجهول ولى معلوم لكن سلالتك للمجهول خليتها وللدمار دزيتها...
كانت تسمع وترجف صوتو يبعت الرجفة مزية مش تشوف فيه...
الصوت: حلي عيينيك تشوفي خيالي يحكي معاك أنا روحي في مكان آخر وجهي الحقيقي عمرك تشوفيه حلي عينيك وأطلبي الي حابة تطلبيه والمقابل منك نديه...
ماس : بعدما سمعت أمرو خافت لكن قال أنو متجسد برك مش صورتو ... حلت عينيها بشوية تشوف .
حتى تصدمت وهي تشوف لهيب أحمر شاعل مقابلها وفي وسطو شكل وجه تلمح منو غير عينين كبار يخوفو وفم أكبر سنيه بارزين تقول تاع السبع وقرون كبيييرة وجهو من اللهيب غير ملموس يعني مجرد تجسد .
حطت يدها على قلبها الي قريب يحبس من الخلعة وخذات نفس قوي حاولت قد متقدر متبينش خوفها حتى سمعاتو يضحك بأعلى صوت...
الصوت: ههههههههههههه كان صوتو يرعب ...
ماس : متعجبة تشوف برعب ...
الصوت: قبل ما تتوهمي وتقولي أنك قوية ومشاعرك عليا خفية أعرفي أنو الي قدر يجسد وجه في هاذ اللهيب وروحو نقلها عبر آلاف الأزمان عارفك من ساسك لراسك وعارف ماضيك وحاضرك كوني هانية أحكي ومتحاوليش تبين عكس نفسك...
ماس: واش هاذ الحصلة الي حصلتها هو عندو الحق شحال انا غبية نكمل هكذا يدفني هنا...
ماس : احم انا نحب نعرف اذا كاين طريقة.نتحرر منها من هاذ الختم ...وبما انك السيد تقدر تعاوني....
سيد الختم : تزعزع وزمجر وقرب من وجهها في ثانية قريب حرقها حتى قريب حبس قلبها....
أنتي غبية وجاهلة وبدنيا مش فايقة تضني انو لعنة كيف هاذي ساهلة تتنحى وفي ثانية تمحى؟
ماس: لا لاا نعرف صعيب اما سقسيت برك...
مش هذا موضوعي الي حبيت نطلب عندي طلب اخر...
سيد الختم: بعد عليها ورجع بلاصتو وبقى يشوف فيها ..هممم قوليه ونتمنى مع المطلب الأول ميكونش عندو علاقة....