DEAREST BABY GIRL [COMPLETED]

Letter #17 - Photos

Dear Baby Girl,

To be honest, ang dami kong nilaktawan sa liham mong pang-dalawampo't pito. Siguro hindi ko pa rin matanggap na mas sinuwerte ang Damian na iyon kaysa sa akin. Mantakin mong nakasama ka niya at nakapiling ng kung ilang taon samantalang ako'y ni hindi nakaranas ng ganoong pagkakataon. Tapos hindi ka pa niya pinahalagahan? He was an a**hole! Paano niya nagawang ipagpalit ka lang sa ibang babae? You were the creme dele creme of the women of our generation!

Nang sinabi mong for a while ay naging okay kayong mag-asawa, kahit masakit, okay na rin sana sa akin iyon. Siguro kung tuluy-tuloy na naging ganoon ang inyong pagsasama, kahit na nagkita tayong muli noon ipapaubaya na kita sa kanya. Hindi ko na nanaisin pang guluhin ang nananahimik mong buhay. Subalit nang mabasa ko kung ano ang ginawa niya sa iyo, gusto kong magwala. Alam kong buhay pa rin siya hanggang ngayon. Kapag nakita ko iyon, magtago na siya kamo sa kanyang pinanggalingan! Nanggigigil ako sa hinayupak na iyon!

Walang kasing pait ang binalita mong nagbunga ang pagsasama n'yo ng lalaking iyon. Inaamin ko. Naninibugho pa rin ako! Hindi ko pa rin naiwasang h'wag masaktan. Marahil iyon at sa kadahilanang nabuo ang batang galing sa kanya samantalang ang bunso natin ay hindi pinalad.

But then, I felt so good upon knowing that you did come to the resort I named after you! Nang mabasa ko iyon sa sulat mo kaagad akong napatawag sa staff ko roon at pinahanap ko sa kanila ang luma nilang record book ng mga guests ng hotel. Napataas pa ang boses ko sa manager dahil bakit hindi nila pinagbigay-alam ang tungkol sa pagbisita mo roon samantalang mahigpit ang bilin ko noon na sa oras na bumisita ka'y tawagan nila ako o sulatan. I should know!

Napahiya ako sa manager. May pinadala raw silang sulat sa akin sa lumang mansyon ng mga magulang ko sa Forbes. Ang sulat nila ay may kalakip na mga photos mo at ng iyong kaibigan habang nag-e-enjoy kayo sa resort natin. Pinadalhan din daw ang address ko sa Oslo maging ang dati kong office sa UK. Noong mga panahong iyon kasi ay doon sa Europa ako naglalagi. Pero wala raw silang narinig na reply mula sa akin. They just assumed I got the letter and the photos and decided to just keep quiet about it. Sa totoo lang, wala akong natanggap na ganoong sulat. If I did receive them siguradong napauwi ako ng Pilipinas agad-agad. All I needed then was a reassurance that you did not take my offer against me. Na hindi ka nainsulto sa pagyaya ko na naman sa iyong magtanan kung kaya hindi mo ako sinipot no'n.

Naisip ko agad si Lily matapos sabihin ng manager kung ilang beses nila akong napadalhan ng photos n'yo ng iyong kaibigan habang nagliliwaliw sa resort. Ang nasa isipan ko, baka binasket iyon ng aking asawa? If she did it, hindi ko alam kung ano ang magiging reaksiyon ko. Ngayon pa lang na kinukutuban ako'y gusto ko na siyang kagalitan.

Nataranta ang mayordoma ng dati naming mansion sa Forbes nang ipahanap ko sa kanya ang naturang liham na kung ilang dekada nang nakarating sa amin. Nang magkandautal-utal siya sa pagpapaliwanag tungkol doon, na-sense ko agad na she knew about the letter from the resort's manager. Nakaisang tanong pa lang ako, humagulgol na sa harapan ko. Naawa rin ako sa kanya dahil sa kanyang edad. She had devoted five decades of her life with us. Hindi na rin siya naiiba sa pamilya ko. Kinausap ko na lang nang mahinahon. Umalis ito sa harapan ko at makaraan ang ilang sandali'y bumalik with a square white envelope na dahil sa tagal ng panahong lumipas ay medyo naninilaw na ang kulay.

Walang kasing saya ang puso ko nang masilayan kitang muli kahit sa lumang larawan lamang. You looked like a very happy birthday celebrator. Naantig ang puso ko nang masilayang muli ang iyong matatamis na ngiti. Napaluha pa ako nang mabasa ang sinulat doong caption ng noo'y katatanggap na manager lamang. Sinabi niyang sinabi mo raw sa kanya na that was the best birthday you ever had! Kahit paano, natuwa ako na sa maliit na bagay ay naparamdam ko pa rin sa iyo kung gaano ka kahalaga sa akin.

You will always be my queen, baby girl. Always and forever!

Your Big Daddy forever,

Greg