روايه حب الفرسان الجزء الثالث من رحم للإيجار . (((سلسلة عشق الرجال)))

الفصل السادس والاربعون

(((سلسلة عشق الرجال الجزء الثالث من رحم للايجار)))
((( حب الفرسان)))
(((الفصل السادس والاربعون )))
🌹بقلم ريحانة الجنه🌹

شعورهم واحساسهم الطبيعي والفطري تجاه ابوهم ووجوده مع ست غريبة عنهم وخصوصا في غياب والدتهم كان رد فعل طبيعي جداااا ومتوقع كمان بس مايا  كانت مختلفة كتيير عن حلا يمكن حلا رقيقة بشكل كبير ويمكن جواها وجع من غياب هنا عنها وعنهم كلهم... ويمكن كمان الاحداث اللي بتمر بيها وبعائلتها واولادها شاغلة جزء كبيير من تفكيرها وحزنها ..ويمكن كمان وجود فادي جنبها بإحتوائه مخفف عنها الاحداث الجديدة اللي بتحصل قصادها وخصوصا علاقة عشق وعدي واللي لسة ماظهرش ليها معالم ولا ملامح...

لكن مايا لا فيه اختلاف واصخ في استقبال الحدث والتفاعل معاه وكمان رد الفعل كانت واقفة وعيونها كلها شر وغليل من عشق والنظرة الاكثر غموض هي نظرة الوعيد اللي مالية عيونها ...

شريف فاهمها وفاهم اللي جواها وبتفكر فيه وبص بعيونه علي عدي وعشق ورجع ليها بنظره بحيرة من سكاتها وهدئها الغريب!!

شريف: مالك يا مايا ليه ساكتة كدة وليه بتبصي لاونكل عدي بالشكل ده!! انتي اكتر واحدة كنتي بتحسبي يوم رجوعه ووقت ما كنتي بتسافري ليه كنتي بترجعي بالعافية وانتي مغصوبة !! ليه بقي مش حاسس انك فرحانة برجوعه وخصوصا الليلة !!؟

مايا وعيونها مازالت علي عدي وعشق وخصوصا عشق ومازل الغيظ والغيرة محتلين نظراتها...

مايا بغضب: علشان كنت منتظرة رجوعه ورجوع مامي معاه..لكن للاسف رجع وبردوا مش لوحده بس مش مامي اللي معاه لا معاه واحدة تانية..

شريف بيستبعد الفكرة والظن : بس ايه علاقة الست دي بأونكل علشان تضايقي كدة اللي عرفناه كلنا من شوية انها شريكة في شغل جديد معاه ومع اونكل رعد كمان يعني الموضوع مش محتاج كل الدراما اللي انتي عملاها دي ما عندك اهو حلا بتتعامل عادي وكمان كريم وامير ليه انتي اللي مكبرة الموضوع بقي!!!؟

مايا اخيرا بعدت نظرها عن عدي وعشق والتفتت لشريف بضيق وغيظ..

مايا : علشان انا دايما احساسي صح وانا متأكدة ان الست دي مش مجرد شركة شغل ومتأكدة اكتر انها هتكون السبب في تدمير العلاقة بين بابا وماما...بس انا مش هسمحلها ولا هديها فرصة تهد البيت ده مهما حاولت حتي لو كان الثمن اني اقتلها انت سامع!!؟

شريف مر مع مايا بسنين كتيرة وقابل معاها مواقف واحداث كتيير من وقت ازمتها النفسية زمان مع شهاب ..هي ايوة شفيت منها لكن كانت دايما بذرة لازمات كتيير حصلت ليها مع مرور السنين وهو اكتر واحد كان جنبها ومتابع كل تغير فيها وفي شخصيتها وبيقدر يتعامل معاها بشكل علمي وده بسبب شغله وكمان بشكل عاطفي بسبب حبه ليها ..لكن المرة دي الشر والتصميم اللي في ملامحها وصوتها  خوفه منها وعليها وقلبه بيحذره انها هتكون ايام جاية مش مريحة ولا فيها هدوء !!!!