روايه حب الفرسان الجزء الثالث من رحم للإيجار . (((سلسلة عشق الرجال)))

الفصل الثامن والثلاثون

(((سلسلة عشق الرجال)))
(((الجزء الثالث والاخير من رحم للايجار)))
((( حب الفرسان)))
((( الفصل الثامن والثلاثون)))
🌹بقلم ريحانة الچنه🌹

كانت في الاستديو مع حمزة وفتون تجهيزات كتيير بتحصل علشان اغنيتها الجديدة واللي هترجع بيها بعد غياب وتوقف كبير من وقبل جوازها من اكمل وهو رفض استمرارها في الغناء من غيرته عليها بعد اللي حصل قررت انها تكمل طريقها وتبدأ بشكل مختلف مع ان جواها لسة حنين بيفكرها بيه والاكيد انها مستحيل تنساه برغم كل اللي حصل ومر عليهم.....

كانت ساكتة وهادية مش حاسة ولا واعية لمعظم الدوشة اللي حاوليها كانت كالعادة عقلها معاه وقلبها لسة موجوع منه ولسة جرحه غائر ومش بسهولة يطيب....

حمزة قرب منها وابتسم: حبيبة قلبي جاهزة هنسجل خلاص ولا محتاجة بروڤة كمان قبل التسجيل!!؟

چنا انتبهت ليه وابتسمت : لا لا يا بابي انا جاهزة وهسجل..

فتون قربت منها وابتسمت: انا متأكدة ان الاغنية دي هتنجح وهتبقي ترند في وقت قليل والاجمل منها صوتك انتي حبيبتي...

چنا بحب: ميرسي ليكي يا مامي دي اصلا اغنيتك وكنتي بتجهزيها لنفسك بس انتي فضلتيني علي نفسك...ربنا يخليكي ليا..

فتون ضمتها بسعادة: ولا الف اغنية تعوضني عن ضحكة واحدة اشوفها علي وشك ولا عن لحظة واحدة تنوري بيها حياتي انا اتفقت انا وحمزة مع الملحنين والشعراء هيجهز ليكي البوم ما حصلش ده غير كمان حفلة قريب بنجهزلها علشانك من دلوقتي مستقبلك ونجاحك قبل اي شئ...واللي يحبك يحب نجاحك وظهورك عمره ما يخبيكي ويخجل منك اكنك عار وشي لازم يختفي عن الناس ابوكي من اول يوم قابلته كان جنبي ومعايا ودايما هو اللي بيدفعني للنجاح عمره ما اخرني ولا اتمني فشلي...وعايزاكي بعد كدة تغيري كل تفكيرك وحياتك وتنسي تنازلاتك اللي ضيعت وقت كبير من حياتك...فاهمة يا چنا!!؟

چنا دمعت مع كل كلمة من امها كانت عبارة عن ابر بنغز في كل شبر منها يفكرها هي دايما كانت بتتنازل عن ايه!!؟؟ وتسيب ايه!!؟؟ وتتخلي عن ايه!!؟ علشان بس هو يكون مرتاح!! يكون معاها!!؟ ضحت كتيير بس في النهاية خسرت اكتر....

حمزة قرب منها بحماس: خلاص يا قلبي اللي عدي انتهي وخلص المهم اللي جاي وانا وامك جنبك خطوة بخطوة والعمر قصادك واللي ما حققتهوش زمان هتحققيه النهاردة والايام اللي جاية....

چنا ابتسمت وحست براحة وامان...ودخلت معاهم تستعد لتسجيل الاغنية وتبدأ مشوار نجاحها..

.من اجمل الحاجات اللي بتمر بينا وقت الازمات والمحن والالم..اننا نلاقي اللي يسندنا من قبل ما نطلب الدعم ولا السند...نلاقي اللي يداوي جرحنا من غير ماستني يشوف دموعنا ويتشفي بنزيف قلوبنا....لما نلاقي الحنان والطبطبة في الوقت اللي بنكابر فيه علي جرحنا....وقتها بنحن ونهدي ونطمن ونتأكد اننا مش لوحدنا....وخصوصا لو كل ده كان من ااقرب مالينا...وقتها بتكون راحة وفرحة وامان....