روايه حب الفرسان الجزء الثالث من رحم للإيجار . (((سلسلة عشق الرجال)))

الفصل السابع والاربعون

(((سلسلة عشق الرجال الجزء الثالث من رحم للايجار )))
((حب الفرسان))
((الفصل السابع والاربعون))
🌹بقلم ريحانة الجنه🌹

كانت الشمس مركزة شعاعها علي عيونها وعكست لون عيونها بشكل برئ ومثير في نفس الوقت..

وهو كالعادة كان معجب ومغرم بيها وبملامحها وبرائتها...

كانت لاول مرة تكون ذات طلة وشكل كاچول وخفيف بالشكل ده دايما بتكون  حريصة في لبسها وشكلها وحتي لما بدأت تتغير معاه وبسببه من فترة كبيرة بس برضوا كانت متحفظة لحد كبير لكن من اول ما وصلوا المغرب وهو قلب الموازين وغير كل طريقة لبسها وشعرها وشكلها بشكل عام....كانت مستغربة نفسها بالفستان اللي لبساها واللي برغم بساطته وهدوئه الا انه جرئ ومختلف بالنسبة ليها هي ولعادتها في لبسها...

اما هو كعادته كان انيق وشيك بالقميص الابيض البسيط والشورت الكاچوال اللي كان لابسهم واللي كانوا مناسبين بشكل كبير للبحر اللي بيضمهم بينه وبين الشمس المنورة ..وكأن الشمس ونورها كانت بتنور حياتهم كمان مش بس المكان والشط ...

ماليكة بغيرة واعجاب: هي الستات والبنات دي ضاقت بيهم الدنيا يعني مافيش غيرك قصادهم كل واحدة عنيها تدب فيها رصاصة وعمالة تبصلك!!؟ انا بجد علي قد ما انا بحب وسامتك دي وشياكتك اللي بتخطف عنيا !! علي قد ما انا متغاظة منهم  وهفرقع!!

مالك ابتسم بخفة وبص في عيونها ببرائة: مش مهم هما بيبصوا فين ولا معجبين بإيه المهم انا وعيوني وكل جوارحي فين ومع مين وهنتجنن علي مين!!؟

ماليكة قلبي انتي حلم كبير وصعب واخيرا اتحقق وصدقيني من بعدك انا مش شايف ستات ولا عايز اشوف..

ماليكة ببرائة وخوف مرعب: يعني مهما هتعدي السنين وتمر وتتعاير بيا وبكبري عنك مش هتتغير معايا!!! مهما  ملامحي تتغير ويبان كبري وفرق السن بينا يبان مش هتنفر مني وتهملني وتشوف غيري !!! معقول يا مالك هفضل حبيبتك لوحدي !! مش هيجي يوم وتندم انك حبتني وكملت معايا!! مالك لو في يوم حسيت ببعدك عني و انك فضلت غيري عليا وشوفت حبك واعجابك بغيري انا مش هبالغ واقولك هموت لا انا هعيش زي ما انا بس هعيش مكسورة وقلبي بيتمزع القلب يا مالك بيتعب من الحزن وانا حزني وقتها مش هيكون هين لا ...الست ممكن تتحمل اي حزن الا الزل والمهانة والمعايرة بأنوثتها وسنها...عارف الست ممكن تتحمل الم وحزن فراق وموت اعز ماليها حتي لو حبيبها ..لكن للاسف حزنها بيكون اضعاف مالهاش عدد ولا نهاية لما تشوف حبيب عمرها واللي ادته شبابها وحبها وحنانها وكل اهتمامها وماقصرتش معاه ولا حرمته من اي احساس ولا شعور ...لما تشوفه مع غيرها ويسبها وحيدة حزنها ما يتوصفش...لما تشوف في عيونه اعجابه بغيرها واهتمامه بيها وخصوصا لو غيرها دي اصغر منها واجمل منها ...لما غيرها دي تاخد مكانها وحقها...الست وقتها بتموت بالبطئ ..انت مش هتتخيل انا حالتي كانت ايه وقت ما شوفتك في الوضع اللي كنت فيه وانت مع واحدة تلميذة عندي واحدة بتتععمد تبين فرق السن بيني وبينها ...واحدة نظراتها كانت بتقولي انا اجمل منك واصغر منك...مهما وصفتلك الوجع اللي كان في قلبي لما جاتني المكالمة اياها الكلام اللي سمعته ووجعني وحسسني بخجل وكسوف من نفسي واني فعلا لازم افوق لاني مش مناسبة ليك  واني بسرق شبابك وحبك بشتريه بالفلوس...مش هعرف اقولك وجعي ونزيف قلبي وانا ببص في المرايا ومش شايفة ملامحي الحقيقة دي لا ااا..ااانا كنت شايفة ملامح عجوز بشعة قبيحة شكلها مرعب...شوفت نفسي وحشة اوي يا مالك...شوفت نفسي مسخ ...عارف انا عمري ماكان بيلفت نظري شكلي وملامحي ..مش بيلفت نظري بكبر ولا بصغر ...لكن من يوم ما قابلتك وحبيتك حتي بيني وبين نفسي ومن قبل ما نتصارح حتي بدأت اقارن نفسي بكل بنت صغيرة من سنك بكل واحدة حلوة بدرسلها في الجامعة بكل زميلة ليك وفي نفس عمرك واقول لنفسي يمكن انا النهاردة حلوة ويمكن النهاردة العمر مش واضح وفرق السن مش عائق لكن بعد سنين !! انا هعمل ايه وقتها وانا بكبر عنه وهو لسة شباب!! مالك انا حقيقي محتاجة اطمن ..محتاجة تحضن قلبي وتوعده وعد ما يتنقضش ولا يتخلف انك مش هتجرحني الجرح ده!! انك مش هتغرز الخنجر ده بالاخص في قلبي وتمزعه وتسيبني في بركان دم...مالك انا مش هتحمل اشوفك مع غيري مش هتحمل...