FEAR

💜 24

Unicode

အခန်းထဲတွင် မျှော်လင့်ထားသလို Jeon ရှိမနေသည့်အပြင် Jeon ရဲ့အသုံးအဆောင် ပစ္စည်းများလဲ တစ်ခုမှရှိမနေပါ.....ခါတိုင်းကဲ့သို့ အင်္ကျီတွေ တွဲလောင်းချိတ်ဆွဲထားခြင်းလဲမရှိနေသလို သူတို့နှစ်ယောက် စာကြည့်နေကျ စားပွဲခုံလေးထက်တွင်ရှိသော ပန်းအိုးလေးအတွင်းထဲမှ ပန်းပင်အသေးလေးမှာပင် ခြောက်ကပ်ကာ သေဆုံးနေလေသည်။ ရေလောင်းပေးမည့်သူ မရှိသည်မှာ ရက်အတော်အတန်ကြာပြီ ဆိုသည်ကို ခြောက်ကပ်ကပ်အပင်ကို ကြည့်ယုံဖြင့် သိနိုင်ပါသည်။

သူတို့နှစ်ယောက် ဒီစားပွဲခုံလေးမှာ အတူတူစာကြည့်ဖူးပြီး ဒီအပင်လေးကိုလဲ နှစ်ယောက်အတူ ရေဖျန်းကာ ဂရုတစိုက် စိုက်ပျိုးခဲ့ဖူးသည်။ သူစိတ်ပင်ပမ်းတဲ့အခါတိုင်း ဒီကုတင်ပေါ်မှာ Jeon ရဲ့လက်မောင်းကို ခေါင်းအုံးပြီး မှေးစက်အနားယူဖူးသည်။ Jeon သူ့ကို ဒီအခန်းနံရံမှာ တွန်းကပ်ပြီး ပြင်းရှရှအနမ်းတွေ ခြွေခဲ့ဖူးသလို သူကိုယ်တိုင်ကလဲ ကျေနပ်စွာ ထိုအနမ်းတွေကို ခံယူခဲ့ဖူးသည်။
ဒီအခန်းလေးထဲမှာ သူတို့နှစ်ယောက် စနောက်ပျော်ရွှင်ခဲ့ဖူးကြပြီး သူစိတ်ဆိုးတိုင်း Jeon က မငြီးမငြူချော့မော့ကာ စိတ်ဆိုးပြေစေခဲ့ဖူးသည်။
ဟိုတုန်းက သူတို့နှစ်ယောက်ရဲ့ စကားသံတွေနဲ့ ဆူညံခဲ့ဖူးတဲ့ ဒီအခန်းလေးဟာ အခုတော့ဖြင့် တိတ်ဆိတ်ကာ ခြောက်ကပ်လို့နေသည်။

Taehyung ထိုအခန်းဝမှာပင် အတော်အတန်ကြာ ငေးငိုင်နေမိပြီး အခု လက်ရှိအခြေအနေကို သူနားလည်နိုင်အောင် မနည်းကြိုးစားနေရသည်။
ရုတ်တရက် သူ သတိပြန်ဝင်လာပြီး ခြေလှမ်းတွေက ဗီဒိုရှိရာဆီ အလျင်အမြန်သွားကာ ဗီဒိုကိုဆွဲဖွင့်လိုက်သည်။ အဝတ်အစား အနည်းငယ်သာ ဗီဒိုထဲ ကျန်ရှိနေတော့ပြီး Jeon ဝတ်ဖူးနေကျ အဝတ်တော်တော်များများကို ဗီဒိုထဲမှာ ရှာ၍ မတွေ့တော့ပါ။

"ဘာလဲ....ဘာတွေ ဖြစ်နေတာလဲ....Jeon ကဘယ်သွားလို့လဲ ဘာလို့ Jeon အသုံးအဆောင်တွေ တစ်ခုမှ မရှိရတာလဲ"

ဗီဒိုနားမှာ ငေးငိုင်နေစဥ် အခန်းဝမှ ခြေသံကြား၍
လှည့်ကြည့်လိုက်ရာ အိမ်အကူ အဒေါ်ကြီးဖြစ်နေပြီး တစ်စုံတစ်ရာကို သူ့ထံ ပြောချင်နေသည့်ဟန်...သူလဲ Jeon ရဲ့အကြောင်းစုံကို သိချင်နေ၍
အားကိုးတကြီးဖြင့် အဒေါ်ကြီးထံသွားကာ ထိုအဒေါ်ကြီးရဲ့ လက်ကို တင်းတင်းဆုပ်ကိုင်လိုက်ပြီး...