'မင်းမျက်နှာမြင်ရဖို့ ခက်လိုက်တာ'
'အလုပ်တွေများနေတာ Hyung မဟုတ်ဘူးလား'
ရိုက်ကူးရေးအတွက် နယ်ဘက်ကို ရောက်နေတဲ့ YoungHa Hyung က မနက်ကမှ ပြန်ရောက်လာပြီး Jungkook ကို နေ့လည်စာစားဖို့ ချိန်းဆိုသည်။ ညီအစ်ကိုအရင်းတွေဖြစ်သော်လည်း ကိုယ်စီအလုပ်တွေနဲ့မို့ မျက်နှာချင်းဆိုင်တွေ့ဖို့မဆိုနဲ့ ဖုန်းတောင် တော်ရုံဆက်ဖြစ်သည်မဟုတ်။ သို့သော်လည်း အနေစိမ်းသွားခြင်း လုံးဝမရှိ။ ချိန်းဆိုမှုကို Jungkook ဘက်က ဝမ်းသာအားရပဲ လက်ခံလိုက်ပြီး တွေ့ကြဖို့ ဖြစ်လာခဲ့သည်။
စားသောက်ဆိုင်ကို ရောက်သွားတော့ YoungHa Hyung ရဲ့ ဘေးမှာ Jungkook မမြင်ဖူးသော လူစိမ်းတစ်ယောက်ထိုင်နေသည်။ မျက်နှာချင်းဆိုင်တစ်ဖက်မှာ ဝင်ထိုင်လိုက်တဲ့ Jungkook ကို နှုတ်ဆက်သည့် အပြုံးတွေက ချိုမြနေ၏။ YoungHa Hyung နဲ့ အသက်တူတူပဲ ရှိလောက်မည်။ မသိတာမို့ အလိုက်သင့်ပဲ ပြန်နှုတ်ဆက်ဖြစ်သည်။
'မင်းကို မိတ်ဆက်ပေးရဦးမယ်။ ဒါက ငါ့သူငယ်ချင်း Yasashi တဲ့'
'မင်္ဂလာပါ။ ညီလေးအကြောင်းတွေ ညီလေးရဲ့ အစ်ကိုဆီကနေ အများကြီး ကြားဖူးတယ်'
ဂျပန်လူမျိုးတစ်ယောက်ဖြစ်သောသူက ဘာသာခြားစကားကို ကျွမ်းကျင်စွာပြောတတ်နေသည်။ သူရဲ့ ရုပ်ရည်သွင်ပြင်ကို ကြည့်ရတာ အနုပညာရှင်တစ်ယောက်လိုပဲလို့ တွေးမိနေတုန်းပဲ YoungHa Hyung က ဆက်ပြောလာသည်။
'Internation Flim Campaign တစ်ခုမှာ ကိုယ်တို့တွေ့ဖြစ်ရင်း ရင်းနှီးသွားကြတာ။ အခု Seoul ကို အလည်လာတုန်း ဧည့်ခံဖြစ်တာနဲ့ မင်းကိုပါ မတွေ့ရတာကြာလို့ ခေါ်လိုက်တာ'
Jungkook က အပြုံးနဲ့ ခေါင်းညိတ်ပြရုံကလွဲပြီး လော်ကွတ်ချော်တဲ့ စကားပိုတွေမဆိုဖြစ်တော့။ ကိုယ့်ဧည့်သည်မှ မဟုတ်တာပဲ။
စားပွဲထိုးလေးတစ်ယောက် လာချပေးသွားသည့် အစားအသောက်ကိုသာ အာရုံစိုက်စားသောက်နေတဲ့ ကောင်လေးကို ကြည့်ရင်း Yasashi က သဘောတကျပြုံးသည်။ လူစိမ်းတွေနဲ့ဆိုရင် စကားပြောဖို့ ဝန်လေးတတ်တဲ့ အကျင့်လေးကို အားမရဟန် ငြင်းငြူဖူးတဲ့ အစ်ကိုဖြစ်သူကို လှည့်ကြည့်တော့ မြင်တယ်မလားဆိုတဲ့ အကြည့်တွေနဲ့ မျက်ခုံးပင့်ပြသည်။ အစ်ကိုဆီက ကြားထားရသည့် သတင်းတွေအတိုင်းပဲ ဒီကောင်လေးဟာ အတော်ကို ငြိမ်တာပဲ။ သူ့အကျင့်အတိုင်း တည်ငြိမ်နေတာမျိုးဖြစ်ပြီး ကိုယ်တို့ထက် သုံးနှစ်လောက်ငယ်တဲ့ လူငယ်လေးတစ်ယောက်ဆီကနေ ဟိတ်ဟန်တစ်မျိုးကိုလည်း ခံစားမိနေသည်။ လုပ်ငန်းကြီးတစ်ခုလုံးကို ပုခုံးပေါ်ထမ်းထားရတဲ့ လူတစ်ယောက်အနေနဲ့ ဒီလောက်တော့ ရှိမှာပေါ့လို့ Yasashi တွေးလိုက်မိပါသည်။
