Jimin ဘက်က တရား၀င်စိန်ခေါ်စကားဆိုပြီးသည့်နောက် Choi Li Han ဘက်က အတော်လေး ပြောင်းလဲသွားသည်။
မထိတထိ စကားနိုင်ထိုးတာတွေ၊ စောင်းမြောင်းပြောဆိုတာတွေ သိသိသာသာ နည်းပါးသွားသည်။
Jimin နဲ့ Li Han ကြားထဲက ပြိုင်ပွဲကို
ကုမ္ပဏီတစ်ခုလုံးက စိတ်၀င်တစားစောင့်ကြည့်နေကြတာမို့ အဆင့်အတန်းတစ်ခုနဲ့ professional ဆန်ဆန် ပုခုံးချင်း ယှဉ်ဖို့ ကြိုးစားသည်။ နဂို လူမသိသူမသိ တိုက်ခိုက်နေရာကနေ သူတို့နှစ်ယောက်ကြားက ဆက်ဆံရေးကို Jimin က လူသိရှင်ကြားဖြစ်အောင် လုပ်လိုက်တာမို့ သူ(မ)ရဲ့ အပြုအမူတွေကို ထိန်းသိမ်းလိုက်ပုံရပါသည်။
အလုပ်ချိန်ကလွဲရင် မျက်နှာချင်းဆိုင်တွေ့ရသည်မှာလည်း နည်းပါးသွား၏။
သူတို့နှစ်ယောက်ရဲ့ ပြိုင်ပွဲက ဘယ်အချိန်မှာ အဆုံးသတ်လိမ့်မလဲ။ နောက်ဆုံး ဘယ်သူက အနိုင်ရမလဲဆိုတာကတော့ စိတ်၀င်စားစရာကောင်း၏။
ကိုယ့်ကိုကိုယ် ယုံကြည်မှုတွေအပြည့်ဖြင့် အရည်အချင်းပြည့်၀သည့် စိန်ခေါ်သူနှစ်ယောက်ကြား တစ်စုံတစ်ဦးက ဒီနယ်ပယ်ကနေ နှုတ်ထွက်အနားယူသွားမှသာ ဒီပြိုင်ပွဲက အဆုံးသတ်လိမ့်မည်ဖြစ်ပြီး
ထိုအချိန်ထိ သူတို့နှစ်ယောက်ဟာ ပြိုင်ဖက်တွေ ဖြစ်နေဦးမည်ပင်။
နောက်တစ်ခု ထူးဆန်းတာက Jimin ကိုယ်ပိုင် ရုံးခန်းရလာခြင်းဖြစ်သည်။ ဒါသည်လည်း သူ(မ) နှင့် သက်ဆိုင်နေမည်လား တွေးမိသေး၏။ သို့သော် Jimin က ကင်မရာရှေ့မှာ အလုပ်များတတ်သူမို့ သူ့အတွက်နေရာက စာရွက်စာတမ်းတွေ စနစ်တကျသိမ်းထားနိုင်တဲ့ အလုပ်စားပွဲတစ်ခုရှိနေရင် လုံလောက်ပြီဖြစ်သည်။
အလုပ်နားချိန်ဆို နားနေခန်းတွေက ဘယ်နေရာ၀င်၀င်ရ၏။
ထို့အပြင် Jimin မှာ အကောင်းဆုံးသော နားနေခန်းကြီးတစ်ခုရှိနေပြီလေ။ ထိုအခန်းကနေဆိုရင် မှန်နံရံကတစ်ဆင့် ရှူခင်းကြည့်လို့လည်း ရသေး၏။
ထို့ကြောင့် သူ့အတွက် စီစဉ်ပေးထားတဲ့ အလုပ်ခန်းကို ဌာနဆီ ပြန်အပ်လိုက်ပါသည်။
---
'တစ်စုံတစ်ယောက်ကတော့ ရည်းစားရသွားတာနဲ့ သူငယ်ချင်းကိုတောင် သတိမရတော့ဘူး'
Jimin ရဲ့ ပုခုံးကို ဖြန်းခနဲ ရိုက်ချလိုက်သူက နှစ်ယောက်မရှိတဲ့ သူငယ်ချင်းမလေး Eunhee။
လက်ထဲမှာ စာရွက်တစ်ထပ်နဲ့ Recording လုပ်ပြီး ပြန်လာပုံရသည်။
Jimin မျက်နှာမဲ့ပြလိုက်သည်။
