Jimin ဆေးရုံကဆင်းလာရပြီးတာနဲ့ Jungkook သည်လည်း ကွန်ဒိုရဲ့ ၁၁ ထပ်မြောက်က Jimin ရဲ့ တိုက်ခန်းထဲမှာသာ နေ့နေ့ညညရှိနေတော့တာဖြစ်သည်။ အလုပ်မသွားတာလည်း ခုဆို ၃ ရက်မြောက်နေခဲ့ပြီဖြစ်သည်။ Jungkook က သူ့အလုပ်တွေကို Jack နဲ့သာ စေလွှတ်ထားပြီး သူလုပ်ရမည့်အပိုင်းတွေရှိနေခဲ့ရင် ဧည့်ခန်းထဲမှာ laptop တစ်လုံးနဲ့ အလုပ်ရှုပ်နေတတ်သည်။
အလုပ်ရှိသူက သူ့အလုပ်သူ လုပ်နေပေမဲ့ အလုပ်မရှိဖြစ်နေသူက Jimin ပါ။ တစ်ခါမှ ဒီလိုမျိုး စိတ်လွတ်ကိုယ်လွတ် နားချိန်ဆိုတာ မရရှိခဲ့ဖူးတာမို့ နေရထိုင်ရခက်လှ၏။ ခါးစောင်းမှ ဒဏ်ရာက သက်သာနေသော်လည်း Jungkook က သူ့ကို အပြင် လုံး၀ထွက်ခွင့်မပြု။ Jimin မှာ တစ်နေ့လုံး ယောင်လည်လည်နဲ့ ဇာတ်ကားကြည့်လိုက် စာအုပ်ဖတ်လိုက်လုပ်ရင်းသာ အချိန်ကုန်နေရသည်။ နားရက်ရတုန်းလေး အိမ်သန့်ရှင်းရေးလုပ်ဖို့ကြံတော့ ရှေ့ဆုံးက တားမြစ်နေသူက Jungkook။ Jimin ကို ဘာဆိုဘာမှ မလုပ်ခိုင်းတာပင်။
ဓာတ်လှေကားမှာ ဖြစ်ခဲ့သော ဖြစ်ရပ်က Jimin ထက် Jungkook ကို ပိုပြီး ရိုက်ခတ်ခဲ့သည်ဆိုလည်း မမှား။ Jungkook က Jimin ပြောပြလိုက်သည့် ကြိုတင်ကြံစည်မှုဟု ယူဆရသည့် ဖြစ်စဉ်ကိုပါ ရှေ့နေကို ပြောပြပြီး အမှုကြီးအောင် လုပ်ခဲ့သေးသည်။ ဖြစ်ချင်တော့ ထိုတရားခံဟာ ဒီကွန်ဒိုတိုက်ခန်းမှာ နေထိုင်သူမဟုတ်။ Door ID Card ကို ခိုးယူပြီး အဆောက်အဦးထဲ ၀င်ရောက်ခဲ့သူဖြစ်လေရာ တစ်မှုပေါ် တစ်မှုဆင့်ပြီး ထောင်သက်နှစ်က ရှည်ကြာသွားခဲ့ရပါတော့သည်။
အခုဆို Jimin ကို Jungkook က အရိပ်တကြည့်ကြည့်။ အစားအသောက်ဆိုလည်း ဂရုတစိုက်နဲ့ အစအဆုံးလုပ်ပေးပြီး Jimin ကို မီးဖိုခန်းထဲကိုပင် မလာစေပါ။ သူ ချက်ပြုတ်နေပြီဆိုရင် ပိုဆိုး။ ဒဏ်ရာက ညှော်နံ့မိမှာစိုးလို့ဆိုပြီး Jimin ကို အိပ်ခန်းထဲကနေပင် အပြင်မထွက်ခိုင်းတော့။
ဒီနေ့တော့ အလုပ်ရှိနေတာကြောင့် ထမင်းတစ်အိုးချက်ပြီး ဟင်းကိုတော့ အပြင်ကနေပဲ မှာစားဖြစ်ကြသည်။
ကြက်စွပ်ပြုတ်က ကြက်တစ်ကောင်လုံးပါတာမို့ ပြည့်လျှံနေသည်။ ဟင်းရည်က ဆီဝေ့နေတာကြောင့် အငွေ့မထွက်နေသော်လည်း မွှေးပျံ့ကာ စားချင်စဖွယ် ဖြစ်နေသည်။ သို့သော် ကြက်စွပ်ပြုတ်ကို ကြည့်ရင်း Jimin ပျို့တက်ချင်လာသည်။
ဆီပါတဲ့ အစားအသောက်တွေဆို သူ တကယ် မခံနိုင်ဘူး။
