ليش النسوان يباوعون للمرأة المطلّقة علىٰ أنّها وصمة عار، خطّافة رجال، خرّابة بيوت؟! هم عمركم فكّرتو بكمّ الأذىٰ اللي تتعرّضله المرأة المطلّقة من النساء اللي حولها بس لأن غلطتها الوحيدة -من منظورهم- أنّها تطلّقت؟ عمركم فكّرتو بإحساسها من تشوف نظرة الخوف منها بعيون أقرب الناس إلها؟
البنات دائمًا يباوعون للمرأة المطلّقة علىٰ أنّها متمرّدة، ومصدر تهديد لأسقف بيوتهم.. كلّ هذا بس لأنّها اتّخذت قرار هي شايفة أنّه رح يريّحها.
بمجتمعاتنا يذبّون كلّ حمل الطلاق علىٰ ظهر المطلّقة لوحدها، وكأنّه الزوج معفي من المسؤوليّة تمامًا.. فالمطلّقة فاشلة، ويرجع عليها فشل العلاقة، وكان لازم تصبر أكثر، وتتحمّل أكثر، وتسكت أكثر..
لشوكت تبقىٰ المطلّقة تعاني من أمّها وأختها وصديقتها وجارتها وزميلتها بالعمل؟!
كوني مصدر قوّتها، كوني إنتِ السند.
