تخيّلوا كمّية القرف اللي واصليلها، مجتمع عنصريّ ما عنده ذرّة إنسانيّة يقيّم الإنسان علىٰ أساس الشكل والمظهر، ويصنّف الأفراد بكيفه علىٰ هواه "حلو" و"مو حلو" والأتعس من يلفظ كلمة "قبيح" علىٰ صنع الله، جد مرّات أصفن وأگول اللي يحچي هيچ ميستحي من الله؟ منو إحنه حتّىٰ نقيّم صنع العظيم؟ منو إحنه حتّىٰ نگول علىٰ خلق الله الدقيق العجيب "مو حلو".. الله ميخلق شي سيّئ ومو حلو أبدًا لأنه هو الجمال المطلق وكل اللي يجي من الجميل جميل، كافي نتانة عنصريّة، كافي أسلوب مقرف ونظرات ازدراء وتنمّر، مللتونا والله.
ازرعوا بأطفالكم إنه رب العالمين خلقنا مختلفين ومتنوعين بأشكالنا وألواننا حتّىٰ يصير العالم أحلىٰ باختلافنا، كلنا حلوين، كلنا بينا شغلات تجنن، ما خلقنا نُسخ من بعضنا؛ لأن الجمال ماله مقياس، واللي مو حلو بنظرك، اكو ملايين غيرك تشوفه حلو، فمن ميعجبك شخص احتفظ برأيك لنفسك رجاءً، ولا تبدي تعلّق تعليقات مقرفة تدلّ علىٰ روح مليانة سخام الكراهيّة والحقد، حبّوا الناس وتقبّلوهم مثل ما هُمّ لأنهم حلوين هيچ علىٰ طبيعتهم وفطرتهم بكل تباينهم، وهوّ هذا السرّ الحلو بهذا الكون اللي اسمه: الاختلاف اللطيف.
خلّوا الجيل الجديد يعيش علىٰ الحُبّ وتقبّل الآخر، جيل سليم بدون عُقد نفسيّة. ✨
