مجنونة اقتحمت حياتى (مكتملة )

الفصل الخامس

الفصل الخامس

(اللهم وفقنى لما تحبه وترضاه )

-: تاخدى كام وتبعدى عننا ..

-: انتى اتجننتى انتى ازاى تقوليلى كده !

سمر :اهدوا بس يا جماعة هو فى ايه يا بوسة مين دى ؟

نظرت بسمة لنجلا التى تقف امامها وقالت
-: الحلوة تبقى انثى السلطعون الى لسه كنت بكلمك عنها ..

نجلا بغيظ : تصدقى انك واحدة واقحة ..

-: هو يعنى ايه واقحة اوعى تكون شتيمة

اجابت سمر  مؤيدة صديقتها قائلة : ولله شكلها شتيمة بت يا بوسة تحبى اعرفها تمامها ولا اسبلك الطلعة دى ..

نظرت نجلا لهم بخوف وقالت
-: بب بقولك ايه انا جاية وعاوزة مصلحتك يا ريت تفكرى كويس فى عرضى

-: عرض ايه يا ام عرض هو انتى جية تشترينى وعوزانى اوافق ..

جالت نجلا بعينيها فى هذا المنزل الشبه متهالك لتقول
-: انا ممكن اشتريلك شقة فى احسن مكان فى مصر وهتعيشي فى مستوى احسن من الى انتى فيه ده بكتير  ..

تقدمت سمر ومنها وهى تعقد زراعيها قائلة
-: وايه المقابل ؟ هى الحداية هتحدف كتاكيت ؟

نظرت نجلا لها باشمئزاز وقالت
-: حداية وكتاكيت .. اوه نو .. بيئة .. المهم المقابل انك تبعدى عن جدى وعن عيلتنا نهائى تمام !!

نظرت لها بسمة بحزن وقالت
-: وليه انتى عوزانى ابعد ليه ؟ انا ولا جاية طمعانه ولا انا عاوزة حاجة ..

لوت الاخرى شفتيها وقالت
-: ده كلام بيتقال .. المهم هما كلمتين هقولهملك من الاخر جدى كبر ومبقاش عارف هو بيعمل ايه ولا بيتصرف ازاى واجلا ولا عاجلا الفلوس والاملاك دى حتكون لينا احنا مش لبنت ابن الخدامة ..

كانت سمر سترد الا ان بسمة منعتها وقالت
-: عرضك مرفوض يا مدام واتفضلى من غير مطرود ..

نظرت نجلا لها بحقد وقالت
-: انتى اتجننتى يا بتاعة انتى بتطردينى ..

سمر بغيظ : اتفضلى يا اختى طريقك اخضر ياريت تفهمى بالزوق ولا تحبى نفهمهالك بطريقة تانية ؟

تحركت نجلا نحو الباب الا ان استدارت قبل ان تخرج وقالت
-: انتى حرة بس احب اعرفك حاجة انتى مش هتطولى جنيه واحد من فلوس جدى حتى لو اضطريت انى اقتلك ...

خرجت نجلا سريعا عندما لمحت سمر تقترب منها وهى تكشف عن انيابها ، اغلقت سمر الباب بقوة وقالت
-: كنتى سبينى عليها كنت قرقشتها بسنانى ..

-: سيبك منها .. خليها كده تاكل فى نفسها ...

وبعد أسبوع كانت بسمة تداوم على زيارة جدها ، بينما كان الجد دائما ما يحرص على تجمع افراد العائلة حتى يشعر بسمة انها جزءا من هذه العائلة الى ان جاء اليوم الذى فجر فيه الجد قنبلته حينما اجتمع بها هى وسراج  وقرر اخبارهم بما يريد ان يفعله ..