معلومات تفيد ❤️

شنو تاكل الام المرضع؟

شنو تاكل الام المرضع؟
صحيح تحتاج إلى طاقه أكثر؟
صحيح تحتاج إلى ماء أكثر؟
الجواب اي نعم

تحتاج المرضع إلى ٤٠٠ إلى ٥٠٠ كيلوكالوري زياده
و هي كميه الطاقه اللازمه لانتاج الحليب

عليها اكل أكثر الا اذا كنت راغبه بفقدان الوزن لان الرضاعه الطبيعيه راح تخليك تنزلين وزن أكثر
على الرغم انه ما ينصحون أبدا بالريجيم خلال فتره الرضاعه

نرجع للاغذيه
الأغذيه هي صحيه متنوعه غنيه بالالياف
من الخبز او الرز او المعكرونه
و الكثير الكثير من الخضراوات الخضراء الورقيه و البقوليات الغنيه بالفيتامينات

و ٥ حصص من الفاكهه
الحصه تقريبا ١٥٠ غرام فاكهه او نصف قدح عصير غير محلى او كوب فواكه مجففه

حصتين من الحليب او ما يعادله
الحصه الوحده: ربع لتر حليب او ربع لتر لبن شنينه او شريحتين جبن ( ٤٠ غرام) او ٢٠٠ غرام لبن ( علبه صغيره)
لا تنسين حصتين من اللحم او السمك و البيض و الدجاج

و الماء؟
اصلا الرضاعه الطبيعيه تعطش و لازم الكثير الكثير  من الماء و يفضل تشربين مي مع كل مره ترضعين بيها طفلك لان اصلا راح تحسين بالعطش و ٨ أكواب ماء هي الهدف

شنو اتجنب؟
ماكو شي ممنوع بالمره اكو اشياء فعلا تسوي مغص عند الطفل مثل البرتقال و البقوليات

بس اذا طفلك ما عنده مغص تگدرين كلشي تاكلين

بس نطلب منك تقليل الكافيين اللي هو موجود بالشاي و القهوه و الكولا
صحيح الكميه اللي تعبر للطفل كلش قليله بس احيانا الكافيين يؤثر على إنتاج الحليب لذلك قللي قدر الامكان مو الا تكطعين

هل تناول الفيتامينات ضروري؟
ممكن نعم بس مو روتيني
يعني ماكو شي او مصدر يگول لازم تاخذين فلان فيتامين مثل حاله فيتامين دي للأطفال اللي صارت روتينيه لاطفال الرضاعه الطبيعيه
اذا ما اكلتي اكل متوازن من الفوگ او شهيتك قليله ممكن تاخذين فيتامينات متعدده

و ابسط شي تگدرين تكملين عليه هو الفيتامينات المتعدده اللي كنت تاخذيها لفتره الحمل كملي عليها

اي نعم ببساطه كملي على مقويات الحمل اللي كنتي تاخذيها

بس ركزي على فيتامين بي و دي و سي بالتركيبه اللي تاخذيها حضرتك

د. سيف سمير البياتي
اخصائي طب الأطفال