နောက်တစ်နေ့မနက်ခင်းမှာ ကုန်းတက်အတိုင်း လမ်းလေးတစ်လမ်းမှ သူ နှစ်သက်သည့် အိမ်တစ်အိမ်က အခန်းတစ်ခန်းကို ရှာတွေ့သွား၏။ အခန်းလေးမှာ ကျယ်ပြီး၊ နံရံကို ဝိုက်၍ စွန်းထုတ်ထားသော ပြတင်းပေါက်တွင် အပင်ငယ်များဖြင့် ပြည့်နေကာ၊ အဖြူရောင် ခန်းစီးလိုက်ကာများလည်း ရှိသည်။ တိုင်ထောင်ကုတင်တစ်လုံးနှင့် ကြမ်းပြင်တွင် ဘဲဥပုံ ခင်းနှီးကိုလည်း ချထား၏။
အမျိုးသမီးကြီးကတော့ တစ်ပတ်နေလျှင် ၇ဒေါ်လာ ကျသင့်မည်ဟု ဆိုသည်။ သို့သော် ဒီမှာ တစ်ပတ်မျှ နေဖို့ မသေချာ၍ တစ်ရက်ချင်းကြေး ငွေရှင်းလျှင် ပို အဆင်ပြေမည်ဟု တရက်ဇ်က ဆိုလိုက်သည်။
"ဒီလိုဆိုလည်း အတူတူပါပဲ၊ တစ်ရက် တစ်ဒေါ်လာပေါ့"
မိန်းမကြီးက ပြော၏။
"သမီးက ဘယ်ကလာတာလဲ"
"နယူးယောက်ကပါ"
"ဒီမှာပဲ နေသွားတော့မှာလား"
"ဟင့်အင်း။ ကျွန်မ မိတ်ဆွေတစ်ယောက် လာမှာကို စောင့်နေတာ"
"အော် ... ယောက်ျားလေးလား၊ မိန်းကလေးလား"
တရက်ဇ်က ပြုံးလိုက်သည်။
"မိန်းကလေးပါ။ ဒါနဲ့ ကားဂိုဒေါင်အလွတ်နေရာရှိရဲ့လား။ ကျွန်မမှာ ကားပါလာလို့"
ကားထားဖို့ နှစ်နေရာစာ အလွတ်ရှိပြီး၊ လူနေမည်ဆိုလျှင်တော့ ကားထားဖို့အတွက် ငွေ ထပ်ပေးချေစရာ မလိုတော့ကြောင်း မိန်းမကြီးက ပြောပြ၏။ သူက သိပ်တော့ အသက်မကြီးပေ။ သို့သော် အနည်းငယ် ခါးကုန်းနေပြီး၊ သူ့ပုံစံက အားအင်ချည့်နဲ့နေသည်။ သူ့နာမည်မှာ မစ္စစ် အဲလိဇဘက်ကုပါဖြစ်ပြီး၊ ဒီအခန်းငှားအလုပ်ကို လုပ်လိုက်တာ ၁၅နှစ် ရှိပြီဖြစ်ကြောင်း၊ သူနှင့်အတူ လက်တွဲ အလုပ်လုပ်ခဲ့သည့် သုံးယောက်ထဲက နှစ်ယောက်ဟာ အခုထိ ဒီမှာ ဆက်လုပ်ဖြစ်နေကြောင်း သူ့ကို ပြောပြသည်။
xxxxx
ထိုနေ့မှာပင် ပြည်သူ့စာကြည့်တိုက်နားက လမ်းဘေးစားသောက်ဆိုင်ငယ်မှာ တရက်ဇ်က ဒတ်ချ်ဟူဘာနှင့် သူ့ဇနီးကို ရင်းနှီးသွားသည်။ ထိုလူက သိချင်စပ်စုချင်စိတ် ပြင်းပြသည့် အပြာရောင်မျက်လုံးများဖြင့် အသက်ငါးဆယ်အရွယ် ပိန်ကပ်ကပ် အမျိုးသားပင်။ သူ့ဇနီး အက်ဒ်နာကတော့ ဝပြီး၊ အချက်အပြုတ်လုပ်သည် ဆိုသည်။ ဒတ်ချ်လောက်တော့ စကားသိပ်မပြောပေ။ ဒတ်ချ်က လွန်ခဲ့သည့်နှစ်အနည်းငယ်လောက်က နယူးယောက်မှာ အလုပ်လုပ်ဖူး၏။ ဒတ်ချ် မကြားဖူးသည့် ဒါမှမဟုတ် သူ မေ့သွားသည့် နေရာဒေသတွေအကြောင်း ပြောနေစဥ် တရက်ဇ်လည်း လုံးဝ မသိသည့် မြို့နေရာတွေအကြောင်း မေးခွန်းပြန်ထုတ်ဖြစ်နေရာ ထိုစကားဝိုင်းမှာ သူတို့ကို ရယ်မောလာစေ၏။ ဒတ်ချ်က သူရယ်၊ သူ့ဇနီးရယ်နှင့်အတူ မြို့အပြင်ဘက် မိုင်အနည်းငယ်အကွာက စနေနေ့တွေမှာ ကျင်းပတတ်သည့် မော်တော်ဆိုင်ကယ်ပြိုင်ပွဲကို လိုက်ကြည့်ချင်သလားဟု မေးလာရာ တရက်ဇ်လည်း သဘောတူလိုက်၏။
YOU ARE READING
Carol (မြန်မာပြန်)
RomanceMyanmar Translation of A Romance Novel - well known as Carol on the screen. (love between the two women in 1950s)
