#ورد_العمر
الحلقة :: 1 ::
زياد :شكر الله سعيكم ,, صحيت عمي عامر تعبناك معانا
عامر: ولو ياولدي هدا بوك وصاحبي وعزيزي وانتم في مكان ولادي ,, هي تصبح ع خير
زياد:وانت من اهل الخير .. بارك الله فيك
خش زياد للحوش لقي امه مازالت تبكي ع بوه ..
زياد: خلاص يام ,, انتي هكي بتعدبيه في قبره .. ادعيله ربي يرحمه ويغفرله
امه: ان شا الله ربي يرحمه ويجعل مثواه الجنة ,, تعشيت وليدي
زياد: لا ماعنديش نية بنخش نرقد ..حاس روحي تاعب شويا
امه:علاش ياوليدي ماتاكلش من لما توفى بوك ماريتكش تاكل .. اصبر نحطلك عشي يللي تحبه انت
زياد: يمة بالله عليك ماتعبيش روحك والله ماعندي نية
امه: باهي براحتك ياولدي .. خش ارتاح في دارك
زياد:ان شا الله .. قولي وين كناينك امالا ؟؟
امه: كل وحدة فيها ماسادها يللي ركبت اضم في حويشها ويللي تغسل لصغارها ويللي تحط في عشي راجلها ..اهي والله جني رقدت هنا ماعندي حيل نركبها تو تجي امها ترفعها
زياد: اها .. باهي علا وعبير في الدار ؟؟
امه: علا تبدل لولدها ,, وعبير مسكينة من الصبح ع الماشي والجاي ماارتاحت خشت رقدت وياودي مانضني جاها النوم
زياد: اوكي ماشي بندير عليهم دورة وبنرقد .. تبي شي؟؟
امه:لا سلامتك ياولدي ,, تصبح ع خير
زياد:وانتي من اهل الخير
طبعا ,, خلوني نعرفكم علي عيلة #زياد بطل الرواية هادي ..
زياد عمره 28 سنة يشتغل في المصرف
بوه توفى ليه ايام وهوا متعلق ببوه هلبااا اكتر من خوته التانيين
خوه الكبير صالح متزوج ومرته اسمها ريهام
عنده زوز بنات غيداء عمرها 22 سنة
وجيداء عمرها 17 سنة
علي عمره 24 سنة
وخوه يللي بعد اسمه علاء متزوج ومرته اسمها نهلة
وعنده زوز بنات تواما نسيم ورنيم عمرهم 10 سنوات
والصغيرة جني عمرها سنتين
وخوه يللي بعده اسمه محمود متزوج ومرته اسمها سوسن
مازال ربي مارزقه بصغار
واخته الكبيرة اسمها علا متزوجة وراجلها اسمه خالد وعنده زوز ولاد
اياد عمره 10 سنوات
والياس عمره سنة
وبعدين زياد
واخته الصغيره اسمها عبير عمرها 25 سنة مخطوبة وخطيبها اسمه يوسف وتشتغل في الصيدلية ,, خريجة صيدلة وماشا الله عليها جمال وادب واحترام وحشمة
وامه اسمها مريم مرا كبيرة في العمر وطيبة والناس كلها تحبها وبوه علي الله يرحمه طيب ومش متاع مشاكل ويللي في قلبه ع لسانه
,,,,,,,,,,,,,,,,,,,,,,,,,
كيف خش زياد لداره بيرقد تليفونه شرين وميار المتصلة
زياد: الو حبيبتي .. شن الجو ؟؟
ميار: اهلين زياد .. وينك اليوم ؟؟
زياد: انتي عارفة الناس قاعدة تمشي وتجي علينا .. والله حاس ظهري تكسر
ميار: اوكي حبيبي نخليك ترقد وترتاح
زياد: مش قصدي ع التعب .. والله مش عارفة كيف بنكمل حياتي من غير بوي انوووض من غير مانسمع صوته ولا نصبح عليه ولا ح نعاونه في الجنان ومعاش نسهرو مع بعض ونشربو شاهي العالة تعرفي مكانه كبير بوي مش عارف كيف بنكمل حياتي من غيره
ميار: خلاص حبيبي ادعيله بالرحمة ..معاك حق لما يغيب بوك تحس في الدنيا كلها سودا والعيلة تتشرتع ومعاش يكون فيها كبير .. لكن انت احمد ربي بوك توفى وخلاكم كبار .. امالا كان زي جارنا توفى وخلاهم صغار والله يسخفووو
زياد: ايه ربي يكون في عونهم ان شا الله .. قولي غدوا بتمشي للجامعه انتي ؟؟
ميار: ايه ان شا الله عندي محاضرتين ,, قصدك بتجيني ؟؟
زياد: شن كنت نقول ياميار.. الحوش مازال مافضاش مانقدرش نجيك .. نفوت الزحمة وحااضر تو نجي
ميار: اها اوكي رد بالك ع روحك
زياد: وحتي انتي .. هي تصبحي ع خير
ميار : وانت بالف الف خير
سكر وخش رقد .. لكن النوم ماجاه تفكيره كله لبوه .. اذكر ايام معاه بوه .. وكل لحظة كان بعيد فيها ع بوه ندم عليها .. وهكي لين خداه النوم
,,,,,,,,,,,,,,,,,,,,,,,,,,,,,
علا ترقد في ولدها وماباش يرقد قعدت تضرب فيه .. ارقد ارقد .. لين فاقت بيها عبير
عبير: خيرك ع الولد ؟؟
علا: مايبيش يرقد .. تعرفي خلاص تعبت انا .. طول الليل يقعد امفنص
عبير : هاتيه انا ماجانيش النوم بري ارقدي
علا: مانبيش نرقد .. بس خلاص حاسة روحي مخنوقة مش قادرة نتنفس ..مش مصدقة انه وبيي الغالي ماات وخلانا
عبير: انتي اهو درتي عيلة وصغار تلهي فيهم وتروحي لحوشك ترتاحي امالا انا شن نقول ريحة بوي وصورته في كل مكان نمشيله في هالحوش .. حتي وين نرقد يطلعلي .. الله يرحمه يااارب
علا: امين .. بس يقعد البو هوا يللي يلم العيلة .. هاه شوفي خوتك كل واحد لم مرته وصغاره وركبو رقدو وخلو امي بروحها ,, كان بوي قاعد راهم نابتين اهنا معاش رحلو
عبير: مالنا ومالهم كل واحد فيه ماساده .. خللي يركبو يرقدو ويرتاحو اليوم كله شاقيين مساكين
علا: والنبي فكيني .. لهينا في الدوة الياس رقد ههههه .. خللي نمشي نحطه في الدار التانية
عبير: اهو حطيه اهني ع فراشي انا بنمشي نرقد مع امي
علا: والله .. حتي انا بنمشي هي هههههه .. نوضي قدامي وجيبي شرشفاف ياسوو
عبير: هههههه باهي
,,,,,,,,,,,,,,,,,,,,,,,,,,,,,,,,,,,,
نزلت نهلة باش تاخد جني يللي رقدت ع الصالون .. تلاقت هيا وعلا وعبير
نهلة : مازال مارقدتووش ؟؟
عبير: منين بيجينا النوم يامرت خوي وبوي مهناش
نهلة : يلا هذا قضاء وقدر ولازم نصبرو ونتحملو .. ادعوله بالرحمة
علا: الله يرحمه ويغفرله ان شا الله..خيرك نزلتي انتي ؟؟
نهلة: رقدت هدوكم الفرخات هبلوني وجيت بناخد جنونة رقدت هنا جنب حناها امبكري ههههه
عبير: مسكينة من امبكري تقولي نبي جدو نلعب معاه
نهلة : ايه والله متعلقة بجدها هلبا .. هي امالا بري ارفعي ولدك خللي نجيبها
علا: ايه والله ايديا طاحو .. تصبحي ع خير
مشت نهلة رفعت بنتها وركبتها لدارها ورقدتها ..كل واحد يفكر في بوه من جيهة وامه من جيهة تانية .. يلي بيفضالها الحوش بعد وفاة شبانيها هيا ماعندها حد في الدنيا غيره بس هذا قضاء وقدر .. ورحمة ربي واسعة ماتجيش نقنطو منها وزي ماقال الله سبحانه وتعالى ( ولا تقنطوا من رحمة الله ) .. واكيد بعد ظلام طووويل فجر وشمس ساطعة وباذن الله الغيمة تزووول ...
,,,,,,,,,,,,,,,,,,,,,,,,,,,,,,,,,,,,
فاق زياد علي صوت تليفونه .. دوووب مافتح عيونه يللي منفخات من البكي ع بوه
زياد : الووو ؟؟
يتبع
#Dudu
