#ورد_العمر
الحلقة :: 15 ::
مصعب: السلام عليكم
حميد & ابتهال : وعليكم السلام
مصعب: عادي نقعمز معاكم ؟
حميد: شن تبي اختصر؟؟
مصعب: خيرنا يابوي عاد .. مانبي شي بنهدرز بس
ابتهال: خليه ياحميد يهدرز .. شن ماشي في خدمتك تمام !
مصعب: ايه الحمد لله .. اسمعوني نبي نفتح معاكم موضوع ميار ؟
حميد: الموضوع اهوا مايخصكش انا عطيته وتم
مصعب: قصدك كلمتهم ووافقتو ؟؟
حميد: ايه كلمناهم .. ونراجو فيهم يحددو الفضانية
مصعب: علااااش استعجلتووووو ؟؟ >_<
ابتهال: لان الولد كووويس .. واحني عطلنا هلبااا بالرد .
مصعب: بالله عليكم قولولي الحق رديتو عليهم خلاااص ؟؟
ابتهال: ايه ^_^
مصعب: تي علااااش ؟؟
حميد: شن يللي زاعجك في الموضوع انت ؟
مصعب: ميااار طبعا
ابتهال: خيرها ؟؟
مصعب: مانعرفش كيف بنقولها ؟؟
حميد: قووول شن في ؟
ابتهال: ماتقولش مش موافقة لانها قريب اطير من الفرحة وانا سمعتها بوذني قالتلي موافقة
مصعب: اكيد بتوافق بعد ماسيبها وجدي طبعا
حميد: كيف يعني سيبها وجدي ؟؟ :\
مصعب: ميار كانت علاقة مع وجدي وانا سمعت بالصدفة تكلم فيه .. بوووي ميار خانت الثقة يللي عطيناهالها ومش هكي بس مع صاحبي لعبتها وضحكت علينا .. ولما خطبها زياااد كانت متعاركة مع وجدي وخلاااص معاش عجبها .. ولقت حاجة تشد فيها قبل ماتطيح ويللي هوا زياد .. زياد شاب وسيم ومحترم وفلوس وربي ناعم عليه بأم اطيب من قلبها مافيش .. وين بتلقى واحد زي هدا .. بس العااار يابوي يللي دارتهولنا ويللي وجدي لتوا قاعد يهدد فيا كان عطيناها لزياد ح يشهدر بيها ويفضحها وينخرب بيتنا يأمي .. وهوا قالهالي بعظمة لسانه .. (( يأما تعطيني أختك يأما قسما بالله تكون حديث الساعة )).. وانتم اختارو بعد هالكلام .. بالنسبة ليا عجنته طريحة باهية ... بس لواني من ايدي يللي توجع فيا ويللي هوا العرض والشرف .. ومن جيهة تانية زياد شن ذنبه يحصل في وحدة لاعبة عليه دور الطيبة والكويسةونظيفة ويللي مازيها حد !!
ابتهال مصدومة بكلام مصعب .. ومش قادرة تصدق يللي قاعد يصير لان قبل ساعتين ميار كانت تحكي لأمها يللي صار معاها وكيف تعرفت ع زياد وجي لخطبتها !! ..
:: قبل ساعتين من هالكلام ::
ابتهال: اهو جيتك هي احكيلي كيف تعرفي زياد ؟؟
ميار: قصة طووويلة هلبااا
ابتهال: ايه احكيلي نسمعلك وماتكدبيش عليا اوكي !!
ميار: اوكي ^_^ .. أول ماخشيت للجامعة تعرفيني كيف .. خشيت لقرايتي وبس وباقي المواضيع معاهدة نفسي نغمض عيوني عليهم .. وفااات الوقت لعند امتحان قبول لقسم العمارة وقتها في السيمستر التالت .. خشيت ودرت امتحاني وحسيت روحي فشلت ومش ح يقبلوني .. لاني قعدت متوترة وخايفة في المقابلة الشخصية .. طلعت وقعدت نبكي قدام القسم كانت الساعة 2 الظهر وبسمة روحت .. نراجي في معاذ يجي يروح بيا .. المهم وقف عليا شاب عيوني معاش قدرت انزلهم من عليه ماشا الله كان في قمة الاناقة والشياكة .. وطبعا يللي نحكي عليه هوا زياد <3 ..
زياد: تبي اي مساعدة ياأختي ؟؟
ميار: لا شكرا
زياد: باهي خيرك تبكي وحالتك حالة ؟؟
ميار: مافي شي مضايقة بس
زياد: ويللي مضايق يبكي ؟؟
ميار: ايه .. مش ح يقبلوني في القسم وانا خاطري فيه
زياد: باهي كان ماقبلوكش الدنيا بتوقف ؟؟.. معاش في امتحان تاني ؟؟.. بتموتي متلا ؟؟.. وباهي لو قبلوك بتخشي الجنة ؟؟.. حسستيني تبكي ع حاجة كبيرة
ميار: وهدا مش حاجة كبيرة بنظرك انت .. اما انا شي تاني -_-
زياد: باهي كان تبكي بيقبلوك ؟؟
ميار: اووووف انت خيرك عنكشت اهنا ؟؟
زياد: لا عنكشت لا سو .. اصلا نايض ومخليلك المكان .. شويا تانية بتغرقيني بدموعك .. تشاو
ميار: ههههه دمك خفيف
زياد: شكرا
مشي وخلاني حتي التلفيت ماتلفتلي .. حسيت روحي غلطت فيه بس مع هذا كابرت لين رن فوني والاتصال من معاذ .. طلعت روحت .. بعدها معاش ريته بكل كنت نتمنى يقرا في نفس كليتي خاطري نشوفه ونتأسفله .. بس خاب ظني .. طلع مايقراش معانا بكل ..
ابتهال: وبعدين شن صار ؟؟
ميار: هكي رسمت في مخيلتي انه انسان ناجح في حياته وانسان رزين ومش متاع دوة فاضية بكل ^_^
ابتهال: ههههههه اي بنت لما تشوف ولد يعجبها ح ترسم نفس يللي رسمتيه في مخيلتك .. لانها تتمناه يكون ملكها بس .. هدا علاش !
ميار: هههههههه صح ممكن .. وبالصدفة مرة شفته لابس بدلة رسمية وقرواطة حمرا وجاي مع مجموعة شباب .. قعدو عيوني عليه وكنت فرحانة لاني شفته من جديد وزبطتتني بسمة وضحكت عليا .. بس مابينتله شي .. وهوا وين شافني غير اتجاهه مافهمتش علاش اختفى فجأة وقعدت اندور عليه يمين ويسار ومافيش فايدة مالقيتاش لا وراي ولا قدامي .. يأست وجيت بنركب لمحاضرتي .. وانا راكبة ع الدروج سمعت صوته يقوولي :: قبلوك في العمارة ياباش مهندسة ؟؟
ضحكت وتلفتت لقيته واقف في نهاية الدروج وعيونه يلعبو فووق ولوطة ومش مركز معاي بكل .. رديت عليه : ايه الحمد لله .. والفضل لله وليك ياباش مهندس ^_^
زياد: انا مادرت شي غير عنكشت فيك بس -_-
ميار: شكلك ماتنساش :\
زياد: الانسان ممكن ينسى كل شي الا الجرح بالكلام صعب
ميار: اصلا دورت عليك باش نتأسفلك ومالقيتك
زياد: باهي علاش تجرحي من الاول كانك عارفة روحك بتتأسفي ؟؟
ميار: مانعرفش
زياد: عالعموم انا مش مهندس .. انا خريج تموين ومصارف وبأذن الله بنشتغل في المصرف .. هي بعد اذنك
ميار: جاي هنا ع خاطر تبي تعرف قبلوني او لا .. ولاه ؟؟
زياد: لا للاسف -_- .. صاحبي متخرج من الهندسة جيت بنحضر حفل تخرجه ^_^
ميار: -_-
زياد: هههه ولما لقيتك ماحبيتش تحرجيني قدام صحباتك .. قلت نوقف عليك بروحك ونسألك قبلوك او لا ؟
ميار: ايه قبلوني الحمد لله
زياد: قلتيلي من الاول.. هي صاحبي يراجي فيا
ميار: انا نحسابك انت المتخرج ؟؟
زياد: ايه حتي انا اليوم تخرجي بس في جامعة ناصر انا
ميار: اها .. سعدودك كملت وتفكيت منها القراية ... يلا ربي يوفقك
زياد: اوكي سلامات
ومشي وانا عيوني قعدو متعلقات فيه
ابتهال: اصلا باين من اسلوبه في الكلام انه رزين وانك خديتي عقله .. ولو معتبرك اي بنت عادية راهو ماوقفش عليك وتفكرك بعد هالمدة الطويلة زي ماقلتي :\
ميار: ههههه نفس كلام بسمة لما حكيتلها ..
ابتهال: وكيف عطيتيه رقمك وعطاك رقمه ؟؟
ميار: في السيسمتر السابع عطاهولي .. وقتها كان عندي امتحان الساعة 11 ومعاذ عنده امتحان الساعة 8 .. قاللي مانقدرش نوليلك بري معاي واقعدي في السيارة ومش ح نعطل عليك نكمل ونطلع نوصلك لجامعتك .. هونا يقرا في ناصر هوا لغات ..
ابتهال: هههههه ايه ايه نتفكر
ميار: قعدت مقعمزة في السيارة ونقرا وطارحة شيتاتي ليه ليه ع الكرسي ههههه .. كنت مسكرة الرواشن فاتحة المكيف طبعا .. حسيت بظل وقف ع السيارة .. نحسابه معاذ مادورتش بعدين طق الروشن قمت عيوني لقيته هوا واقف خفت .. واطيت عيوني من جديد .. من شق روشن معاذ حذفلي ورقة ومشي .. ع طول خديتها دسيتها خفت .. وين فتحتها لقيته كاتبلي رقمه (( زياد ))
ابتهال: بكل بساطة هكي ؟.. باهي تخايلي جي خوك معاذ هي ؟؟
ميار: مانعرفش شن كان ممكن يصير .. الحمد لله جت خفيفة ههههه
ابتهال: باهي وكلمتيه اول ماروحتي ؟؟
ميار: لا طبعا .. باش نبان رزينة معاه بس هههههه
ابتهال: اصلا عرفتك بتقوليها ههههههه
ميار: كلمته بعدها باسبوع وهكي هكي تعرفنا وصرنا أحبة <3
ابتهال: ههههههه ربي يهنيكم ان شا الله هوا فعلا طلع ولد حلال ويحبك <3
:: خلونا نرجعو لــ بعد هالقصة كلهــا .. لمصعب وأمه وبوه ::
طلع مصعب وخلاها في صدمة ..
ابتهال: يكدب عليك ره
حميد: تو معقولة واحد يرضى في اخته هكي .. ويكدب في العرض .. تي شوفي حتي وجهه مستزرق .. اسمعي يامرا .. العار مايطفيه غير النار .. وبما انه وجدي جي خطبها ح نرفضه زياد ونعطيها لوجدي هالكلبة هادي .. ميااااااااااااااااااااااااار >_<
ابتهال: اصبر ماتستعجلش وماتحكمش خلينا نتأكدو قبل
حميد: مافيش حاجة نتأكد منها هاتي الهاتف هاتي
ابتهال: مايجيش ياراجل اليوم كلمناهم ع اساس موافقين وتوا نكلموهم مش موافقين عيب ره
حميد: لمصلحته الولد مانخليشي ياخد وحدة زي هادي
ابتهال: والله يكدب عليك الله
حميد: انتي بري الهي في بنتك يللي دارت كل شي من وراك وانتي قاعده تهزيلها .. نوووضي من قدامي مش رايق لكلامك بكل
ناضت ابتهال تجري لميار بتزفها بالخبر المشؤوم
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
#Dudu
