#ورد_العمر
الحلقة :: 31 ::
الشرطي: في حاجة غلط في كلامك .. لو البنت فعلا قادرة تتواصل مع اماليها راهو مابكت للدرجة هادي وتهدرز في منامها .. في حاجة لو ماقلتهاش بالطيبة تقولها بالغصب :)
صالح: اوكي .. الموضوع ومافيه ان في واحد حقير معتدي ع بنتي .. وهيا خايفة منه جبتها لعند خالها ترتاح وتفتكى منه وبس :(
الشرطي: ممكن تعطيني الاسم والعنوان !!
صالح: اسمه جلال.... عنوانه في طرابلس الشارع ........
الشرطي: تمام .. توا توكل ببنتك وتهنى وارتاح تو نقبضو عليه خلال 5 ساعات فقط .. نستاذنو :)
صالح: بارك الله فيك .. سلامات :)
,,,,,,,,,,,,,,,,,,,,,,,,,,,,,,,,,,,,,,,,,,,
غيداء: ربي يخليك ليا ان شا الله :)
منذر: ان شا الله يارب .. شن وتيتي روحك والا لسا !!
غيداء: لسااا .. مازال كاب وعباية للمناسبات :)
منذر: بس !!
غيداء: لا مازال .. حتي ساعة ذهبية و كندرة بشنطتها .. وعندي قفطان عند الخياطة بنجيبه الاسبوعين الجايات .. ومازال حتي تاج للفيلو ماخديته و.....
منذر: ياسر ياسر .. ماكتر قشيشكم يانساوين شني هدا .. تي انا حدها طرحة العرس وبس :\
غيداء: ههههههه هدا هوا شن تبيني نطلع قدام الناس امبهدلة باش يقولو شوفو مرت المهندس منذر كيف :(
منذر: هههههه اهو بدي يطلع اللسان .. ايه وجيداء امتى مروحة ؟؟
غيداء: اممم امتى تطلع نتيجتها ان شا الله :)
منذر: اها ان شا الله .. بالك نبوها لمعاذ هههههه
غيداء: عينك .. هديكا حاطة عينها ع الحاجة الباهية :)
منذر: شن قصدك ع الحاجة الباهية خيره معاذ ؟؟
غيداء: ماقصدي شي ماديرش مشكلة -_-
منذر: هههههههه تمام معاش نبي مشاكل معاك انا :)
غيداء: يؤبرني العسول :)
,,,,,,,,,,,,,,,,,,,,,,,,,,,,,,,,,,,,,,,,
في الطريق ::
جيداء: حقااا بابا .. نجحت امتياز انا :)
صالح: قولي والله !!
جيداء: والله ماقلتلكش امي ؟؟
صالح: امك ادور يمين يسااار لعرس اختك .. توا احني مروحين نخطمو ع شارع المدار واشري آيفون يللي تبيه :)
جيداء: عندك 1900 توا !!
صالح: ليه عليك 1900 مش هلبااا يابنتي ؟؟
علاء: هههههه امالا شني تبي آيفون ب 200 ؟
صالح: ربي يعاونا وخلاااص -_-
جيداء: حتي هيا شهادة وامتياز معاها كبيرة بكل ههههههه
علاء: ايه تستاهل بنتك حتي تليفون ب 3000 ههههههه
صالح: ايه زيد اشحنها انت التاني -_-
,,,,,,,,,,,,,,,,,,,,,,,,,,,,,,,
عبير مقعمزة هيا وامها يهدرزو خشت عليهم سوسن مطرمة شواربها
مريم: كيف حالك يابنتي ؟؟
سوسن: الحمد لله كيف حالكم انتم ؟؟
مريم: الحمد لله .. تفضلي قعمزي عبير نوضي ديري قهوة :)
عبير: باه -_-
ناضت عبير طلعت من الدار .
سوسن: شكلي غير مرغوب فيا ياعمتي :(
مريم: لا حشاك يابنتي .. غير عبير تعرفيها انتي ماتحب من ينوضها ع تليفونها :)
سوسن: ايه وااااضح وااااضح .. امالا وين كناينك القراب ماجوكش ؟؟
مريم: اليوم ماشفتهمش .. ريهام توتي لبنتها ونهلة عندها صغويرة واللي عنده صغار مايرتاح مسكين :(
سوسن: باهي ياعمتي فهمتك تلقحي خلااص -_-
مريم: علاش يابنيتي .. مش قصدي شي
سوسن: ايه عادي مرات كناينك معبيلك راسك :(
مريم: ايه يابنتي بنقولك ع حاجة .. انتي وسلفاتك تتعاركو تعاركو بس مادخليش الرجالة بينكم .. عيب عليك امبارح يجينا محمود واالع وتكتر بينهم الدوة وتصير المشاكل :(
سوسن: لا مش عيب عليهم هما يخلو نساوينهم يلقحو ويعزرو لان ماعنديش صغار .. ومش هكي بس انا ماقلتلاش ع الكلام يللي قالاته نهلة تحساب الراجل ميت فيها .. شويا ويطق عليها ضرة مش ح يتحمل يعيش من غير صغار -_-
مريم: مادخليش بينك وبينهم .. وانتي نفس الشي ماتحطيش راجلك في النص
سوسن: والله يللي يصير معاي نحكي فيه لمحمود الواحد خلااااص قلبه انغم .. مالقيت لمن نحكي وياخدلي حقي غيره .. حتي انتي جاية معاهم :(
مريم: شن جاية معاهم ؟؟.. شن الكلاام هدا ؟؟.. يابنتي الرجالة يشدو في قلوبهم .. ومش باهي يشد ع خوته مواقف نساوين دوة وتفتفيت -_-
سوسن: والله عندك انتي تفتفيت .. بس عندي انا عزارة وتعجيب في خلق ربي .. قصدي ياعمتي ربي مارادش يكون عندي صغار شن تبيني ندير ؟؟
مريم: ادعي لربي وخلاااص .. ربي يفرج عليك يابنيتي :(
سوسن: راهو عااادي عايشة بيهم وبلاهم الصغار يعني عاااادي عندي ومحمود مستحيل يبدلني .. غير كلامهم جرحني بس :(
عبير خشت بالصفرة ..
عبير: باهي كان عندك عادي تعيشي من غير صغار ليش العراك يللي مدايرتيه .. سيورا ربي يرزقك شن تحسابينا احني فرحانين بيك هكي .. لا والله نبي نشوفله صغار محمود .. غير صفي نيتك وربي يعطيك بخير منها :)
سوسن: حتي انتي درتي لسان ؟؟
عبير: مش ح نرد عليك احتراما لامي بس -_-
سوسن: والنبي ردي .. تحسابيني غير ميتة ع كلامك ورايك .. امشي طزززز
عبير: انا نبي نفهم علاش ولعتي ؟؟.. الموضوع صغير وتاااافه .. ولو جاية تشكي لامي ماعندها ماديرلك .. شن تبيها اديرلك سحر باش تحملي .. استغفر الله وخلاص -_-
سوسن: ايه معاك حق الشكوى لغير مذلة -_-
عبير: عليك نوووور .. هي توا اشربي قهوتك وهدي اعصابك :)
سوسن: تي شن قالولك حارقة دمي انا ؟؟
عبير: ماتقوليليش خيرك كل حبة مدايرة قبة ؟؟
مريم: خلاااص اسكتي عبير .. هي يابنتي اشربي قهيوتك وقوليلي شن وتيتي روحك لعرس غيداء ؟؟
سوسن: علاش بنوتي روحي .. اصلا مش ح نحضره العرس -_-
مريم: من غير سو .. لوااااه ؟؟
سوسن: ماشية عمرة ماقاللكمش محمود ؟؟
مريم: قال لكن مانحساباش بسيب خوه في اول فرح عنده ؟؟
عبير: ماتستغربيش يااام .. هوا ع خاطر كلمتين من سوسن جي وماخلا كلمة ماحاطها ع خوته -_-
سوسن: آوووووف -_-
مريم: مش قلتلي اسكتي عبير ولاه !!
عبير: هآآآ -_-
سوسن: عادي مازال عنده ولد وبنت تو نحضرو عراسهم .. هي محمود رن عليا شكله البرا خللي نروح :)
عبير: وخيره مايخشش والا مش محرم علينا ؟؟
سوسن: يالطيف شكلك ناوية النشاف انتي >_<
عبير: لا مرات انتي تنوي .. المهم لما خاطرك بتعاوديله يللي صار كلميني باش نفكرك في كليمات ناسيتيهم رغم اني عارفاتك تهني -_-
مريم: خلاااص عبير .. نوضي سلم بنيتي محمود مايحبش يراجي :)
سوسن: اوكي تصبحو ع خير :)
مريم: وانتي من اهله
عبير: اجعنك ماشفتي خير -_-
سوسن: قلتي حاجة عبير ؟؟
عبير: سلامتك بس -_-
طلعت سوسن .. تلفتت عبير لامها
مريم: ماتشوفليش ماعندي مانديرله :(
عبير: لدرجة هادي تفوتيله يايمة ؟؟.. قصدي مالاخير ولدك والله مايتحشم -_-
مريم: الله غالب يابنتي .. تو يتفهميني ان دمك محروق اكتر مني .. مستحييييل ولدي هدا ياعبير.. صح اطيرللي ونزعل بس مانقدرش نقسى عليه .. هوا اختار حياته احلى مع مرته .. ماعندي ماديرله ومش ح نجبر روحي عليه وخلاااص تمينا :(
عبير: آآآه قداش ماتسحنيلي في كبدي بكلامك هدا .. مانقدرش نقسى عليه .. تي تعرفي كان انا ولدي هكي لما نتبرا منه والله ماشاف ريحتها الجنة -_-
مريم: غير تقولي هكي مجرد ماديري عيل تو يرق قلبك وتقولي كلام امي حق :(
عبير: لا حول ولا قوة الا بالله وخلاااص .. انا بنرقد ماتبي شي ؟؟
مريم: سلامتك يابنتي .. تصبحي ع خير :)
,,,,,,,,,,,,,,,,,,,,,,,,,,,,,,,
غيداء كانت مقعمزة تتفرج ع فيلم .. ع فتحة باب حوشهم تحسابها امها لان رفعها علي باش تشري طواسي وحاجات ناقصة للعرس ..
غيداء: مني !!؟؟؟
جيداء خشت تجري للصالة يللي فيها غيداء
جيداء: تتترااااااا
غيداء: حي جيداااااء :o :o
نقزت وكبشت في رقبتها وتهز فيها
غيداء: استاحشتك ياحيوانة .. حتي منذر اليوم سألني عليك :\
جيداء: هههههههه ربي يحفظك لبعض .. غير شوفي شوفي
غيداء: حي والله ماتتحشمي آيفون مرة وحدة ياكلبة .. خزززززي ع الخونة :(
جيداء: ههههههههه انتي ضربتي راجل وانا آيفون بس انا افلح منك طلعت ههههه
غيداء: ايييح تو بتفهميني الآيفون خير من محمد !!
جيداء: عينك .. معاش تقارني شي بشي ياحليلي وخلااااص .. واخيرا روحت لطرابلس باش نشوفه والله استاحشته :)
غيداء: قصدك قاعدة هنا للابد ؟؟
جيداء: ايه الحمد لله :)
غيداء: حيييي معناها من غدوا بنطلع انا وياك وبنبدو نشرو بضاعتنا مع بعض :)
جيداء: ايه .. حي شن صوت الدوشة البرا ؟؟!!
غيداء: صوت سيارة الشرطى .. حي من شادين في الشارع ؟؟
جيداء: خللي نشوفو :(
طبسو من روشن الكوجينا .. كان بين حوشهم وحوش جلال العمارة يللي كانو ساكنين فيها .. سيارات الشرطى مدرسين تحت حوشهم .. وشافوهم كيف يكركرو في جلال :\
جيداء: حي شادين جلال خو صفاء .. الحمد لله ياربي الحمد لله ههههههه
غيداء: انتي خيرك فرحانة ؟؟
جيداء: هههههه تفكينا منه الحمد لله
غيداء: والله مافهمت الله :\
جيداء: غير فوتيها القصة توا وتعالي وريني شن شريتي وشن خديتي ؟؟
غيداء: هههههه ايه حق تعالي شريت ساعة فضية يللي خاطرك فيها ههههه
جيداء: حقيرة عارفاتك .. انا نحط عيني ع حاجة وانتي تاخدي :(
غيداء: انبصر عليك خديتهالك <3
جيداء: حي سلمها وخيتي الفالحة ربي يخليك ليا ان شا الله <3
غيداء: ههههه لكن لما شفت الآيفون ماصارش نبيها انا ههههه
جيداء: هههههههههههههههه :)
,,,,,,,,,,,,,,,,,,,,,,,,,,,,,,,,,,,,,,,,,,,,
محمد كان سارح ويفكر في جيداء يللي لتوا مافتحتش الفيس .. مقعمز مع زياد في القهوة ..
أما زياد فاتح الفيس وخشتله المجهولة ع الشات
البنت: كيف حالك زياد ؟؟
زياد: ممكن نعرف من انتي ؟؟
البنت: انا البنت يللي حباتك بجديات وعمرها مافكرت تخونك ولو بظرة لغيرك :(
زياد: ميار انتي !!
البنت: حبيبتك يللي تزوجت اسمها ميار .. اما انا اسمي حنين :)
زياد: آها عاشت الاسامي ياحنين :)
البنت: تعرف يازياد من كتر حبي ليك عرفت كل تفاصيل حياتك من غير ماتحكيلي حرف :)
زياد: ترا شن تعرفي ؟؟
البنت: اسمك زياد .. عمرك 28 سنة .. تخدم في مصرف الأمان .. وطلعت من 6 شهور فااتو كورس للندن .. انت أخر العنقود في الشباب .. بوك متوفي ليه تقريبا سنتين .. عند زوز خوات بنات وحدة متزوجة والتانية المدة يللي فاتت راجلها توفى في يوم الفاتحة .. وجيت حتي عزيتها :( .. وعندك صاحب الاقرب ليك اسمه محمد :)
زياد: ماشا الله .. ومنين تعرفي هدا كله ؟؟
البنت: قلتلك من حبي ليك تعمقت في تفاصيلك .. بس انت مش شايف في البنات غير ميار .. تلفت يمينك ويسارك تلقى ستين وحدة تحبك <3
زياد: آها .. وانتي كم عمرك ؟؟
البنت: عمري 23 سنة :)
زياد: بطول عمرك ان شا الله .. نستاذن حنين بنروح للحوش :)
البنت: يعني بنهدرزو في الليل ؟؟
زياد: والله ان شا الله كان فضيت وفتحت .. يلا سلامات :)
البنت: سلامات :)
زياد قام عيونه لقي محمد ع نفس الوضعية سارح ومش معاه بكل
زياد: في من تفكر ؟؟
محمد: ءء شي .. خللي انووض نروح امي تراجي فيا :)
زياد: ايه رابخة عندكم اماليك في الحوش ماشا الله :)
محمد: هههههه ياملا ربخ والله .. يلا سلام
زياد: حتي انا مروح تشاوات :)
طلع زياد من القهوة .. كيف قام محمد فونه مفاتيحه .. رن عليه رقم غريب استغرب ماردش في الاول .. ركب السيارة رن مرة تانية رد
محمد: السلام عليكم
جيداء: وعليكم السلام
محمد: نعم يااختي .. من معاي ؟؟
جيداء: وحدة تحبك :)
محمد: اممم شن المطلوب ؟
جيداء: نتعرفو :)
محمد: ماتعرفينيش وحبيتيني ؟
جيداء: هههههههههه مايتبصرش معاك بكل انت ولاه !!
محمد: بالله عليك ماتقوليش جيداء !!
جيداء: والله لما نقولها ههههه
محمد: ياروحي شريتي شفرة ؟؟
جيداء: ياعيني .. اليوم وعندي خبر تاني :)
محمد: قولي :\
جيداء: شريت آيفووون <3
محمد: الف الف مبروووك عليك ياقلبي :)
جيداء: والخبر الأقوى والاحسن :)
محمد: آها فاجئيني ؟؟
جيداء: روحت لطراااااااااابلس <3
محمد: بجدياااات !!.. مش مصدق المفاجآت كلها مع بعض <3
جيداء: مش هكي بس .. جلال شدوه اليوم وحبسوووه يامحمد :)
محمد: الله !! .. ارتحتي منه ياعيوني الحمد لله ع سلامتك والله فرحتلك هلبااااا :)
جيداء: آممممم .. ماتبيش تعرف علاش روحت لطرابلس ؟؟
محمد: مش لازم نعرف .. المهم عندي روحتي !!.. بنسألك خيرك مافتحتيش الفيس ليك يوم كاااامل ونا نراجي فيك ؟؟!!
جيداء: لاني مرضت وخشيت للمصحة امبارح :(
محمد: ياساتر شن فيك !!
جيداء: حرارتي ارتفعت وصار يللي صار :(
محمد: احكيلي بالتفصيل شن صار ؟؟
جيداء بدت تسرد يللي صار بالتفصيل وكانت فرحانة لانها سمعت صوته ولانها رجعتله وبتشوفه شبه يوميا .. أهم شي ولت قريبة من محمد يللي وقف معاها وماخلاها بروحها :)
,,,,,,,,,,,,,,,,,,,,,,,,,,,,,,,,,,
#Dudu
